D Fasnacht isch für Kinder öbbis Bsunders. Drum isches au bi uns im Kindergarte jedes Joor e wichtigs Thema. Au Kinder wo bishär weniger Bezug zur Fasnacht kha hän, sölle s Fasnachtsfieber erläbe dörfe. Dodrzue wärde Gschichte vrzellt, Bilder zeigt,Musik gloost und Fasnacht gspielt. Sehr beliebt sin au d Goschdym und Larve wo sie dörfe aprobiere odr e Piccolo, wo alli versueche, e Ton usezbringe – odr denn eifach so dien als wäre sie e kleins Zügli wo durch d Kindergartelandschaft gässled. Emol uf e richtigi Drummle druf zschloh und zloose wie lut das tatsächlich dönt, kame au nid alli Dag.
Das Joor hän d Kinder vom Kindergarte Schoreschuelhuus und Eugen Wullschleger no e witeri Bsunderheit vo dr Fasnacht dörfe kennelerne. Wie d Alina im Buech „Fasnachtsfieber" vom Daniel Löw hän sie dörfe eme richtige Ladärnemooler bi dr Arbed zueluege und die Dimensione vo sonere riesige Ladärne huutnoch erläbe. D Kinder sin sehr neugierig gsi und hän natürlich e huffe Froge kha. Scho im Vorus hän sie sich gfrogt, us was fürme Material denn die Ladärne gmacht isch – ob us Papier, Karton oder sogar us Stei – das hän sie welle usefinde. Interessant isch denn au gsi, was me alles uf dr Ladärne scho entdecke kha. Als Highlight hän sie sogar dörfe in d Ladärne iinestiege und das Ganze mol vo inne betrachte.
Für alli Kinder isch dä Usflug ins Ladärnenatelier e bsundrigs Erläbnis gsi, wo sie so schnäll sicher nid wärde vergässe. Jetzt sin sie aber alli nomol sälber im intensive Ändspurt zum s eigene Goschdym und d Larve für s grosse Schuelumzügli am 9. Februar 2018 fertig zstelle.
Karli – dir nomol e härzliggs Danggschön, dass du dir zwei Mörge Zyt gno und mit viel Geduld dini Ladärne vorgstellt hesch!
Yael Oertli