E Pfyffere, e hoffentlich bald Aggdivmitgliid und zwei Dambuure wo uns an e Doppel-Glyggehochzytt yylaade, das isch sogar fyr d Wettstai öbbis wo nid alli Daag vorkunnt.
E huffe Wettstainlemer/Inne sin am Samschtignoomidaag dr Ylaadig gfolgt und pünggtlig und under Yyhaltig vom gwünschte Dresscode, me macht e Falle, am drei z Midaag zum Apèro im Glaibasel vor dr Bar Pulp am Obere Rhywäg yygloffe. Dört hän yis d Brutbaar empfange. Die beide hübsche Hochzyttere zämme mit de strahlende Hochzytter sin vo dr Gäschteschaar für e Begriessigschmützli oder e Handschüttle richtiggehend belaagered worde.
Ebbis spöter sin alli Aawäsende an Stääg vo dr Münschte Fääri, zur Überfahrt ins Grossbasel gschiggt worde. Es het einigi Faarte bruucht bis die ganzi Gäschteschaar am Grossbaslerufer aakoo isch. No em stränge Uffstyg uff d Pfalz und e me kurze Fuessmärschli sin mer im Pausehoof vom alteerwürdige Rittergass-Schuelhuus aaglangt. Do wartet scho dr näggscht Apèro. Gstärggt vo Amselbräu, Wyss- oder Rotwyy oder em e Blööterliwasser het sich Gligge zem Ständeli uffgstellt.
Es isch e schöne Aabligg gis wo die beide Brutbaar vor dr Gligge gstande sin und gespannt uff das was uff sy zuekunnt gwartet hänn.
Dernoo isch es Ärnschd worde. Dr letscht yberlääbend Geischtlig vom Dale Gloschter, nämmlig dr Abt Pius, isch zur Drauig gschritte. Mit luunige Wort und beschte Wünsch het är de Hochzyttswillige dr Wettstaisääge fyr e langs, glüggligs und Hibligg uff d Zuekunft vo unsere Knorzi mögliggscht Kinderryychs Ehelääbe, mit uff e Waage gä.
Es wird Zyt zem Uffbruch, voraus die neye Gliggeehebaar. Wie by Brominänte üblig, het d Uffgoob vom Personenschutz unsere Vordraab überno. Pfyffend und drummelnd hän mer d Brominänz über e Minschterplatz, via Schlüsselgass, Freie-Stroos und em Märtplatz vor e Stadtwälder begleitet.
Es isch e rundum glungene Aaloss gis. Do blybt numme no e ganz härzligi Dankeschön an d Sunisa und dr Adrian und an d Yael und dr Kevin.
e kürzti Version vom Jürg sim Text im Wettstai-Blatt