Unseri Gschicht
Dr Stammverain
In dr Feschtschrift 50 Joor Wettstai Clique het dr Eereobmaa Niggi Schoellkopf feschtghalte, dass d Wettstai Clique sich wäge me Generazioonebrobleem vo dr Lälli-Clique abgnaablet het.
Uusschlaggäbend in däre Uusenandersetzig isch d Ergläärig vo eltere Lälliheere gsi, uus Gäldgnabbhait dr Fasnachtsbummel fir die Jungi Lälli kurz no dr Fasnacht 1952 z stryyche. Das het s Fass zem überlauffe brocht. Die Junge sinn zämme mit iire Eltere ainewäg go bummle. Zoobe sinn si stolz drummelnd und pfyffend bis am Zääni dur d Stadt gässlet. Im Goldige Stäärne in dr Äsche bim Schlummerdrungg am spöötere Oobe het aine vo de eltere Junge gfunde, dass mir zämme blyybe und en aigene Glyggenamme wääle. Schliesslig könne mir au ooni Lällivättere Fasnacht mache! An däm kalte Bummelsunntig hänn sich die maischte aawäsende Eltere mit däne Gedangge aafründe losse.
Dr Niggi Schoelkopf het, no däm Bummelsunntig als doomoolige junggardischte Dambuurmaioor, alli Eltere vo de yygschriibene junge Lälli uff e 18. Abrille 1952 in s Reschtorant Gifthüttli zenere Uussprooch zem Thema „Wie wyter?" yyglaade. Dr Uffmarsch isch erfreulig gsi. Fascht alli Aawäsende hänn dr Gründig vonere neye Fasnachtsgsellschft zuegstimmt. Es sinn für die näggschte vier Joor geaigneti Vättere zämme mit ainige junge Aggtive bestimmt woorde, die die no nammeloosi neyi Glygge in e gueti Zuekumpft fiere solle. Uus verschiidene Vorschleeg wie Käppelijoch-Clique, Fähri-Clique, Mätze-Clique und andere Namme, het noch kurzer Diskussioon dr Vorschlaag „Wettstai Clique" gwunne.
Wettstai, wel doomools zaalrychi Jugendligi no im Glaibasel gwoont hänn und d Waisebuebe im Kischtli am Wettstaiblatz dehaime gsi sinn. Au dr legendäri Johann Rudolf Wettstai isch by dr Nammensgäbig mit sym Wirgge fir d Stadt im Vordergrund gstande.
Scho wenigi Wuche non em Gründigsdaag isch au scho s Signet vorglääge. S stellt e Art Baslerstaab dar. Im undere Dail sinn d Baslerstabspitze vom e wysse W ersetzt woorde. In Aaspiilig uff die ehemoolige vier Basilisgge uff dr Wettstaibrugg, het die Fyguur no zwai Dracheflügel und e Dracheschnaabel bikoo. Mit em Alti-Dante-Huet isch das Signet bis hitte s Uushängeschild vo dr Wettstai Clique blibe.
Drotz em Versuech dur e Vorstand vo dr Lälli-Clique, mit eme Dailgständnisbrief an d Eltere vo dr Junge Lälli, hänn sich nur ganz wenigi Buebe abhalte losse, dä Schritt zem Wettstainlemer z wooge!
Au s Fasnachts-Comité het me brieflig informiert, dass e neye Spross am Cortège dailnimmt. Dr Antwort inkl. Regulativ isch seer niechtern z entnää gsi, dass sich d Wettstai zerscht z bewääre het und die erschte drei Joor uff Subvenzioone verzichte miess. Aber weeder fäälendi finanzielli Understützig no kai Drummeliuffdritt het dr Durchhaltewille kenne bräche. Rasch het sich d Wettstai Clique zenere allsyts anerkannte Stamm-Clique entwigglet. Sogar dr Kischtlivater Noldi Schneider het me kenne überzüge, dass au d Waisebuebe jetzt zer Wettstai in d Drummel- und Pfyfferschuel selle ko.
Bym Sueche vom e Stammlokal isch me glyy mit em Stadtkäller fündig woorde. D Wirtslyt Schwarzwälder hänn scho länger dr Wuntsch gha ere Fasnachtsglygge e Stammdisch aazbiete. Dr Stadtkäller isch au als Stammbaiz gwäält woorde, will die Baiz an dr Fasnacht dr ideali Standort isch. D Broobe hänn jewyyle am e Donnschtig fir d Pfyffer im Sääli vom 1. Stogg stattgfunde. D Dambuure hänn iiri Böggli im e Schuelzimmer vom Claraschuelhuus bearbaitet. Vom Claraschuelhuus sinn d Dambuure spööter in s Wettstaischuelhuus gwäggslet. In dr Neyzyt broobe deert alli vom Stamm und au d Knorzi. S Stammlokal isch immer no dr Stadtkäller, obwool me mehrhaitlig no dr Broobestund im Rhyfälderhof sitzt.
S 2002 isch fir d Wettstai Clique zem Juubeljoor woorde und ze de
isch die am Aafang erwäänti Feschtschrift uusekoo. Über d Feschtivideete in däm Juubeljoor wiird uff e separaate Byydraag hiigwyyse. Dä duesch under em Menu Chronik/Archiv finde. (isch no in Arbet)
D Knorzi
10 Joor no em Stamm sinn 1962 d „Wettstai-Knorzi" gründet woorde. 1964 hänn si mit 10 Vordrääbler, 6 Drummler, eme Dambuurmaioor, em e Requisit, dr Ladäärne, eme Zeedel und em Sujet „Kameldaufi im Zirkus Knie" s erschtmool am Cortège dailgnoo. E Joor spööter sinn au d Pfyffer derbyy gsi. Uffdriib hänn d Knorzi im Hornig 1967 dur die erschti Dailnaam am Monschter bikoo. Jewyyle 16 Pfyffer und Dambuure in schwaarze Hoose, schwaarz-wyss gstraifte Lyybli und eme schwarze Béret sinn under dr Laitig vom Bohne Panosetti im Kiechli uff dr Bühni gstande und hänn dr Arabi vordrait. 1969 hänn d Knorzi in iirer Gschicht e Diefpunggt überstoo miesse. Zwische de baide Vorständ Stamm und Knorzi sinn beziiglig Fierig vo de Knorzi underschiidligi Mainige entstande. Dr Knorzi-Vorstand isch mit e baar Knorzi dr Spaltig nit uusgwiche und het en aigeni Glyyge gründet. S Joor druff sinn d Knorzi trotzdäm mit 5 Vordrääbler, 12 Pfyffer und 7 Dambuure uff dr Strooss underwägs gsi. Do au d Wettstai vom Pfyfferschwund nit verschoont blibe isch, hänn d Wettstai-Knorzi ab em Joor 1986 Maitli uffgnoo. Hitte sinn d Knorzi alters- und uusbildigsmässig in d Binggis und Jungi Garde uffdailt.
By de Knorzi lehrt me nit numme Drummle und Pfyffe. Drnääbe wiird vyyl fir d Underhaltig und e Zämmehalt do. Am offizielle Glygge-Grümpeli hänn under em Namme Wettstai United d Binggis e baarmool dr 3. Rang und die Junge sogar scho dr 1. Rang abghoolt. Am Knorzi-Summerstamm wiird nääbe andere Spiil au gschuttet. Fir s Chille und Grille sorge d Eltere, Mitgliider uus em Stammverain und dr Alte Garde. Im Sebdämber findet e Weekend zem s Pfyffe und Drummle z verdieffe statt. Döört wiird au s Sujet für die näggschti Fasnacht geboore. S Spiile, s Grille und Chille kömme nit z kurz. Im Herbscht goot s mit dr finanzielle Understützig vom Stamm und dr Alte Garde an d Herbschtmäss. Ganz wichtig isch d Vorfasnacht mit em Larve kaschiere und moole, s Beerigge kniipfe und die aigeni Fantasie yybringe. By all däne Mögligkaite s Joor dure, lehre d Knorzi zämme epppis z unternää, z gstalte und z erlääbe. E scheene Bruuch isch au, dass an dr Fasnacht jede Knorzi von ere Gotte oder vo me Götti bedreut wiird.
2012 hänn au d Knorzi s 50-zigschte Juubileeum könne fyyre. Dr Juubelumgang mit dr Junge Lääli under em Motto „100 Joor jung und kai bitz erwaggse" isch dr beschti Bewyys gsi, dass sich die baide Glygge hütte beschtens verstöön.
Am Knozi-Summerstamm 2012 het dr Stamm-Dambuurmaioor Thomas Schürch – är bringt allne Junge jewyyle s Handling mit em Dambuurmaioorstägge by – e Stäggeladäärne mit em Knorzi uff dr Vordersyte und em wyyblige Pendant uff dr Ruggsyte als Juubileeumsgschänggli überbrocht.
Mit em Überdritt im 18. Lääbensjoor in Stamm wiird dr Knorzi erwaggse!
