WETTSTAI-AFTERWÖRGG-PARTY und Basler Gschichts-Unter(b)richt
Organisiert und yyglaade hänn dr Fümpf-Persoone-Corona-Donnschtigsstamm in Stadtkäller uff die fümpfi Zoobe. Me hett könne koo und goo, wenn me hett welle.
Für d Unterhaltig hett dr Däni Gross als DJ mit synere digitaalisierte Muusiggkischte gsoorgt. Es isch e Wuntschkonzärt aabote woorde, allerdings mit eme Hindernis. Jede/i/es hett sy Muusig-wuntsch nur erfüllt griegt, wenn s dä am Miggrofoon sälber aagsait hett. Es hett kai Wuntsch gä, wo dr „DJ Gröösse" nit erfülle hett könne..
Für dr Basler Gschichts-Unter(b)richt isch dr Hischtorigger und Stadtfierer Peter Habicht zer Verfiegig gstande. Das isch syt dr Corona-Lockdown-Loggerig erscht sy zwaite Uffdraag. Dur syni spezielli Sälbschtständigkait als Stadtfierer, hett är ze dääne ghöört, wo zwische Stiel und Bängg gfalle sinn. So hett är sich miesse mit wenig Unterstützig dur e Corona-Lockdown süche und isch seer danggbar gsi, dass mir an iin dänggt hänn. Är hett sy Basler Gschichts-unter(b)richt in drei Abschnitt uffdailt.
Do mr mit em Stadtkäller in ere Baiz sinn, hett är sich mit em Alkohol im erschte Dail befasst. U.a. hett är feschtgstellt das Wettstaiglyggemitgliider aigentlig seer stargg mit em Alkohol sotte verbunde sy!
Em Hans Jacob Wettstein sy Familie Wettstai stammt uus Russikon im Zürcher Oberland und isch no Basel uusgwanderet. Är isch vo Huus uus Wyybuur gsi und hett s Amt vom Käller-(au e hüffige Namme in däre Glygge) Maischter am Spittel übernoo. Dur d Hyyroot mit dr Magdalena Betzier sinn säggs Buebe uff d Wält koo. No dr Yybürgerig vom Bappe anno 1579 isch är anno 1610 mit em jüngschte Soon Johann Rudolf in d Wyylütezumpft uffgnoo woorde. Das wär d Verbindig zem Alkohol. Wichtiger isch aber, dass dr Basler Bürgermaischter (syt 1645) Johann Rudolf Wettstein no em 30-ig jeerige Grieg als Verdräter vo de Eidgenosse an de Verhandlige z Münster und Osnabrück für e Westfälische Friide dailgnoo hett. An däre Daagig hett är anno 1648 für d
Stadt Basel und de andere Oort vo dr Eidgenosseschaft die völligi Freihait und rächtligi Unab-hängigkait vom Rych und syne Gricht erraicht. (Wyters ka me im Joorbuech vo Rieche uus em Joor 1994 entnää.)
Zem Alkohol hett dr Peter Habicht no wyteri Aneggdote gwüsst z verzelle und denn vor em Abschluss vom erschte Dail no folgendes gmaint:
In dr Zwüschezyt sinn au no e baar Amedysli yydroffe. Dr alt und neu Obmaa hänn sich für d Dail-naam bedanggt und dr neu hett sich no glychzytig vorgstellt.
Denn hett dr Peter Habicht is im zwaite Dail d Umgääbig vo dr „Bierstuube zem Stadtkäller" bis in s nünzäänte.Joorhundert voorgstellt. Dr Stadtkäller isch erscht ca. um 1911, zerscht als Wystuube entstande. Uff d Froog eb epper waiss wo d Groonegass gsi isch, hänn alli kai Antwoort gwüsst. Friener isch vom Määrtblatz bis zer Schiffländi d Groonegass rächtsuffrig vom Birsig dur d Mitti vom Stadtkäller verloffe.
Spööter isch voor em Bau vo dr neue Mittlere Brugg vom Määrtblatz über e Fischmäärt bis zer Schiffländi wyter nördlig, d Groonegass mit dr Määrtgass ersetzt woorde Drum isch rächtsuufrig d Hüüserraie mit em Stadtkäller und linggsuufrig d Börse baut woorde. Dr Birsig hett me überdeggt und so isch dr Fischmäärt grossflächiger woorde. An dr Stadthuus- und Spiegelgass hett s Altbasel mit dr Zyt au miesse verschwinde. So sinn dr Storche und dr Spiegelhoof, am Aafang vo dr uursprünglig bis zer Heuwoog blaante Daalstrooss entstande.
Zwüsche em zwaite und dritte Habichtsche-Brichtsblogg isch wiider dr DJ Gröösse mit de Muusiggwüntsch beschäftigt woorde.
Em dritte Blogg isch s, bassend zer hüttige Corona-Pandemie, um d Syychine gange. Do hänn mr eppis vo dr Pescht, Cholera, die Spanische Grippe und Ebola vernoo. Wie die entstande sinn, wie me sich drvor hett versuecht z schütze. Au was das für d Bevölggerig bedüdet, in dr Gsellschaft uusglöst und mit wie und was für Umständ me drmit wyter glääbt hett.
Do dr Peter Habicht no e Summerstamm by de Comité Schnitzelbänggler voor sich ka hett, hänn mr iin mit groossem Byyfall friezytig danggend verabschiidet.
Dr Afterwörgg-Partyoobe isch no mit vyyl Muusiggwüntsch gesellig z Änd gange.
dr Diggi Pfyffer