Droffe hett me sich voor em „pneu". Kunschstügg bini zer lätze Baiz, will Schluuch uff franzöösisch „tuyau" haisst! Dr Gümmeler hett dä Stamm als glaini Velotour aagsait. Es isch denn aaber e Tour de Farce à la Zögge woorde. Zem Glügg schiebt är d Cargozüg besser vo Norde no Süde, denn by dr Berächnig vo dr Marschdabälle isch iim ainiges dernääbe gange.
Är hett nit drmit grächtnet, dass e Peladoni, e Reimaa und e Hintermaa derbyy sinn. Zerscht isch dr Bruno uusgfalle, will är sym Staalross zweeni Haaber gä hett und s nit rächt gloffe isch!
Dr anderi Bruno isch in e Sturz verwigglet gsi, so dass sy Gneu e weeneli gschädiget gsi isch. Är hett könne wyterfaare und nit ze Dopinglyyche miesse liige.
Dr Hintemaa hett an sym alte Bike, jedes Mool am Aafang vo de Bäärgbryys, Brobleem bym schalte mit em groosse Kettegranz kaa. Drum hett är sym Namme alli Eer gmacht und isch im Fäld hindedryy und em Bääsewaage vooruus gfaare. Z Aesch bigoot hett is denn e Streggeboschte lätz glaidet. So sinn dr Schnyzgge und ych Richtig Dornachbrugg und vo dört über die vyyle Graisel z Rynach zem Hinterlindehoof gfaare. Spööter sinn mr wiider uff d Spitze vom Fäld gstoosse und denn zämme im Predigerhoof unter Applaus vo de fascht verhunggerete Fuessgänger yygfaare. In dr Gaartewirtschafft hänn mr denn die verloorene Kalorie wiider uffgfüllt. Dangge Zögge, s isch e guete Aaloss gsi. E dangg goot au no an myni Beglaiter Sven und Schnyzgge, wo für e Windschatte gsorgt hänn.
Dr diggi Pfyffer