5. Summerstamm

Dräffpunggt für dr Velostamm isch ab em 6i im Stadtkäller gsi. Vyyl hän sich abr nid traut, sich bi däm heisse Wätter dere Useforderig z’stelle. E Mänge het vilicht au no Nochwehe vom Velostamm vor zwei Joor kha. So simr e überschauberi Gruppe gsi und uf wiiblichi Unterstützig uf dere Tour hani leidr vrgäblich gwartet.

Dr Zögge het uns scho im Stadtkäller verrote, wo unsri Reis anefiehrt – nämlig uf Schönebuech ind Krone. Wär sich also traut het, e Bier z’bstelle, het das jetzt schnäll drungge und scho hän mr uns ufs Velo gschwunge. Los ischs gange Richtig Bluemerain und denn diräggt die steili Petersgass duruff. Do sin die Erschde scho ins Schwitze kho und dr eint odr ander Oberschänkel het afo brenne. Durch d Grossbasler Altstadt simr Richtig Binnige gfahre. Dört hets denn unerwartet frieh diräkt e Halt gäh. Ich ha scho dänkt, das hämr uns no gar nid vrdient. Mr hän denn abr doch no zerschd miesse vier Stockwärk ufelaufe, so dass dr Puls nomol ufetriebe worde isch. So isch d Freud übr die kalte Getränk denn trotzdäm gross gsi. Dr Däni het uns nämlich uf sini Dachterrasse iglade, wo mr e herrlige Usblick übr Basel kha hän. Mr hän unsere Salzhuushalt nomol chli ufgfüllt und e schön kalts Wasser gnosse. Bim Bier sin alli zerschd chli schüüch gsi – bis denn die erschd Büchse offe gsi isch, do isch dr Räschde denn au schnäll wäg kho.

Mr hän uns bim Däni für d Gaschdfründschaft bedanggt und ihn grad mitgno. So ischs denn witrs gange übr Bottminge. Witrs kani leidr nid so genau sage, wo mr duure gfahre sin. Mr hän einigi Buurehöf passiert und es isch au immr widr duruff (au mängmol durab) gange. Wär e genaui Route möchte wüsse, dörf sich gärn an Zögge wände. Mr hän uf jede Fall zwüschezitlich sehr e schöni Ussicht kha. Dr Sunneuntergang het däm ganze e tolli Stimmig gäh. D Hit zisch leidr witrhin faschd unerträglich gsi und au dr Nieselrääge, wo denn doch no kho isch, isch im wahrschde Sinn Tropfe uf dr heissi Stei gsi. Drfür hämr am Höhepunkt vo unserer Tour e wunderschöne Doppelrägeboge könne bestuune.

Mr hän denn no e kleine Schlänker übrs Frankriich gmacht, womr dr Hügel widr hän dörfe abesause. Und denn simr ufs Mol scho vor dr Krone gstande.

Nass, abr glücklich, hämr unsri Velo parkiert. Jede het sini vrdiente Fischknusperli, si Wurstsalat odr si Cordon Bleu könne gniesse und dr Obe bi e baar Bier usklinge lo. Wies d Tradition schiinbar so will, isch me drnoch no in Adler. Do kani abr leidr nüd me drzue brichte. Vyyle Dangg Zögge für d Organisation – es het tatsächlich Spass gmacht 😀