Dr letschti Summerstamm isch wie immer reserviert für d Knorzi. Mir hän uns au disjoor widr bi dr Sandgruebe troffe und gmeinsam mit de Knorzi, de Knorzi-Familie und Stammmitgliider grilliert und Spiili gmacht.
Wenn dr Grill uffgheizt wird und d Eltere d Grillade und ihr Biilage parat mache, het für d Knorzi und alli wo wän mitmache e erschts Spiili gäh. Mir hän in zwei Gruppe s 11er Spiil gmacht. Ufem Spiilfäld gits zwei Näschtli wo sich d Gruppe könne zruggzieh und gschützt sin. Dört ziehn oder wähle alli Spiiler e Karte useme 11er-raus-Deck. Ufem Spiilfäld mien sich d Spiiler gegesiitig hetze und d Karte vorzeige. Die höcheri Karte gwünnt und dörf die niidrigeri Karte mitnäh. D Karte mitem 20 isch also stärker als alli andere Karte – usser d Karte mit dr Nummere 1, die isch nämlich als einzigi stärker als dr 20er. S Ziil isch so viil gegnerischi Karte z ergattere wie möglich.
Nach däm Gruppespiil hets au no e Quiz gäh wo alli Knorzi einzeln hän könne ussfülle. D Frooge sin uf Zettel rund um d Sandgruebe uffgähngt gsi.
Quizfrooge (d Lösig gits am Schluss)
- Wie viil Schwöstere het d Obfrau?
- Wie alt sin d Wettstai Knorzi?
- Wieviil Klappe het e Piccolo?
- Wenn isch die näggschti Fasnacht?
- Wie heisst dr Obmaa vo dr Wettstai Clique?
- Was het dr Knorzi für e Kopfbedeckig?
Und zum Schluss no e Schätzfroog mit M&Ms imene Glas.
Während alli am Ässe gsi sin, hän d Knorzi e Zettel mit de Quizfrooge könne ussfülle und abgäh. (Me het sich au dörfe bi Eltere oder Stammmitgliider go Tipps abhole.)
D Usswärtig und Siigerehrig Hets denn gäh nachdäm alli ihri grillierte Spiise, Salat und Chipsli gässe kah hän.
D Alana und Ylenia hän alli Frooge richtig beantwortet (d Alana isch no chli nöcher dra gsi bi dr Schätzfroog) und es hän beidi e Kleins Priisli gwunne.
Bi dr Schätzfroog isch dr Kevin nur zwei M&Ms drnäbe gsi (134 sin im Glas gsi und dr Kevin het 132 gschätzt!) und het eso s Glas mit allne M&Ms gwunne.
D Knorzi hän viil au hinde ufem Spiilplatz gspiilt, d Eltere und Stammmitgliider sin zämmeghoggt und alli hän dr letschti Summerstamm gnosse. Es isch widr e wunderbare Obe gsi und etz freue mir uns nach de Ferie widr uf d Pfyffer- und Tambourestunde.
Lösige Quiz
- 3 Schwöstere
- 60 Joor alt
- 6 Klappe
- 27.02.2023
- Matthias Keller
- Beret