Broobedaag im Top Secret Drum Corps Lokaal an dr Voltastross 30, 4056 Basel im zwaite Stogg vom Nachtclub "Nordstern".
Dr Bricht vom Andy Refer zem Iebigsdaag vom Stamm
Au in däm Joor het sich dr Stamm vo dr Wettstai Glygge im Novämber wider zem traditionelle Iebigsdaag zämmegfunde. Aer het, wie in de letschte Joor, im Iebigslokal vo Top Secret im Nordstärn stattgfunde.
D Dambuure hänn sich bereits am Morge troffe zem no e weeneli ellei an de Drummelmärsch z schlyffe, bevor denn uff dr Midaag au d Pfyffer drzuegstosse sinn. Wo d Pfyffer denn ko sinn, hänn d Dambuure s Fäld gruumt und hänn sich dr Midaagspause gwidmet, dermit au d Pfyffer no die geniale Rüümligkaite hänn kenne nutze zem an ihre Piccolokinscht z schaffe.
Mer sinn au in däm Joor wider vo unserem Vortrab verweent worde. Es isch aifach e woori Fraid gsii, wie sy sich um uns kimmeret hänn. Es het ys wiirgglig an nüt gfäält. Vo Nissli, Manderinli, Schoggi über Hot Dog mit Sänf und Kätchup bis hi zu Kaffi, Bleeterli Wasser, Bier, und sogar Prosecco, hets an nyt gfäält. Eso losst s sich nadirlig mit vyyl Elan und Fraid am Repertoir schlyffe.
E grosse Dangg an unseri Vorträbler won ys so guet umsorgt hänn! Au d Instruggtore derfe mer nit vergässe! Au si opfere e ganze Samschtig vo ihrer Zyt dermits an dr näggschte Fasnacht und vor allem generell immer wie besser deent bim Stamm. Ich muess sage, son e Iebigsdaag isch aifach Gold wärt. Aer bringt e jede Ainzelne wyter und duet e Jedem guet.
Nadyrlig isch näben allem Drummle und Pfyffe au s Gsellige nit zkurz koo und mer hänn in de Pause jewyle e huffe glatti Gspröch und Diskussione gha. Mer hänn am Iebigsdaag sogar s erschte Mool dr ney Marsch zämme gspiilt. Woby zämme spiile ka me däm nonig sage. D Pfyffer kenne dr Calvados jo scho syt Joore und das im Schloof und wunderschön. Do mien mir Dambuure scho no e bitzeli an uns schaffe. Ich bi aber zueversichtlig, dass das scho sehr bald sehr guet koo wird!
Ai Randnotiz gits no zem Iebigsdaag: au in däm Joor isch es nadylig wider nit glunge, dr ganz Daag z iberstoo ohni ass e Kalbfäll kaput gange wär. Nonem flyssige Proobe sinn denn die wo no Luscht gha hänn ins Volta Breu go eppis trinke und e glaini Gruppe vo ca. 14 Nase isch no zämme go Znacht ässe und het dr Obe uusklinge loh. Ych frey mi scho uff dr näggscht Iebigsdaag. Hoffentlig au wider in de Rümligkeite vo Top Secret