S Glöggli het glütte und wie bim Kasperli isch das au für uns s Zeiche gsi, dasses los goht. S Käller-Trio – unser Bummel OK – het uns uf dr Pfalz begriesst und erklärt, dass dr hüttig Bummel ganz unterem Motto „Käller" stoh wird. Isch jo logisch. Und so sin mr au grad loszoge in erschde Käller und zwar ins Marionettetheater. Dört hets emol als erschds e kleins Apéro gä, gsponsered vom Geburtstagskind. S Marionettetheater zeigt sit e baar Joor e Vorfasnachtsverastaltig, unter em Name „Källerstraich". Wo sich jede e Getränk odr au zwei gnähmigt het, hän mir e baar Usschnitt us em diisjöhrige Programm dörfe gniesse. Me kha sage, s Programm isch sehr z empfähle.
Aschliessend het me no d Möglichkeit kha, hinter d Kulisse vom Theater z güggsle. S Fazit drvo: Hinter dr Bühni isch alles sehr äng und eher weniger komfortabel und wär emol vrsuecht het e Marionette zum Laufe zbringe het gmerkt, dasses gar nid so eifach isch, wies usgseht.
S Glöggli het wiederum s Zeiche zum Ufbruch gäh und alli hän sich hungrig ufe Wäg gmacht. Es isch Richtig Unispital gange und wie au an dr Fasnacht het e kurzi Fotisession drbi nid dörfe fähle. S Ziel isch dr Käller zum Holsteinerhof gsi, e grosses Källergwölb mit viel Platz, ändloser Stääge und spannender Akkustik. Als kleini Begriessig het uns d Géraldine Gehrig e kleins Ständeli pfyffe. Si het im 2017 s Priispfyffe, sowohl bi de Junge als au bi de Alte gwunne und het uns mol zeigt, wie me e richtigs Piano spielt – sensationell!
Glii het me sich denn ufs Vorspiisebuffet dörfe stürze und viel hän sich bi dere guete Uswahl gärn no e zweits Mol gholt. Nachm Hauptgang hän mr alli gpsannt de Värsli vo unserer Vizeobfrau glauschd, wo alli vrdankt het, wo für d Fasnacht bsunders gschafft hän. E grosses Dankschön an dere Stell au an sie.
Dessert hets denn au no gäh bevors denn gheisse het: Wettstai istoh! Und so hän mr usem behagliche Käller use miesse, uf die nasse Strosse. Zum Glück het dr Räge abr nid zlang aghalte und so hän mr gmietlich bis Zobe am Zähni könne witrgässle und dr Bummel gniesse.
Viele Dank ans OK für dä glungeni Bummel und dr Yael fir dr Bricht.
