D‘ Wettstai Schutted

An däm Wucheänd wär’s wider emol so wyt gsii, s Glygge-Grimpeli hät uf em Sportplatz Schützematt stattgfunde. Leider kas jetzt au scho zum zweite Mol in Serie nit duregfiehrt wärde und drum möcht i euch als Ersatz durch e schuttendi Wettstai-Chronik fiehre. I ha mi durch die gsamt Stammchronik kämpft und debii jedi  fuessballerischi Aggtivität usegsuecht. Leider hets vieli grossi Lugge in unserer Chronik, was s’Schutte aabelangt. D‘ Knorzi hani leider nit könne iibezieh, wills sunscht dr zytlich Raame meh als gsprängt hät.

Ahfoo dien mr mit e paar Highlights wo mr e gnauere Bligg druff wärfe, gfolgt vonere legendäre Mannschaftsfotigalerie. Drnoch gits e chronologischi Uflischtig vo allne Wettstai-Fuessballaggtivitäte und abgschlosse wird dä Byytrag mit-ere Hampfle bewegte Schuttbilder.

Highlights

Die erscht fuessballerischi Aggtivität wo in dr Glygge-Chronik uftaucht, het anno 1970 stattgfunde. D‘ Glyggemitglieder sin domols folgendermasse aagschriebe worde: 

„Liebi Hand-, Fuess-, Volley-, Schnee-, Korb-, Fuscht-, Schnuer-, Kopf- und sunschtigi Ballkinschtler, kurz liebi Wettstainlemer.

Alles isch fuessballverruggt, noh dr WM z’Mexico, z’Europa, Basel und dr FCB, und nit minder het’s uns paggt. Au d’Clique will go fuessballspile. Dasch ebbe glych wie schutte, ginge, schupfe, catche, pfätze, drugge, knalle und was alles no unter dä Begriff fallt. Dorum stürze mir ys in kurzi Ringerheesli, in Stülpe und Fuessball-Lybli und kämpfe um dr hochbegährti Sieg als Wettstai-Maischter.“

Am Samschdig, dr 13. Juni 1970 isch’s denn so wyt gsi. D‘ Wettstai-Pfyffer sin gege d‘ Damboure aaträtte und hän um e Fass Bier kämpft. Dä Match à 2×30 Minute isch uf de St. Jakob Trainingsplätz usdraage worde und aaschliessend isch me s‘ Siegerfässli im Sääli vom Stadtkäller go leere.

Anno 1979 isch’s denn sowyt gsi, d‘ Wettstai het s‘ erscht Mol in ihrer Gschicht s’Glygge-Grimpeli dörfe organisiere. Stattgfunde het’s am 19./20. Mai 1979 uf dr Sandgruebe, wos Jöörlich bis ins 2012 usdrait worde isch. Über Achtzig!! Mannschafte hän sich domols aagmolde zum in de verschiedenschte Kategorie d’Glygge-Schuttchampions z’küüre. D‘ Wettstai het uf ihrne Plakat mit eme grosse Programm für’s Grimpeli gworbe. Am Samstignomidaag het’s zem Bispiil näb em normale Schuttbetrieb e Plausch-Match zwüsche-n-em FC-Grossrat und em FC Glygge-Obmänner gää. Für die glainere Gäscht het me e Tombola, e Käsperli-Theater, e Ballonwettfliege und e Fuessballwand im Aagebot gha. Au d‘ Eltere sin nit z’kurz koo, z’Oobe isch me vom Jaschi-Himbi-Orchester unterhalte worde und für dr spööter Oobe isch uf em Plakat mit „Tanz – Bar – Bierschwemmi – Freinacht bis 04.00“ gworbe worde. D‘ Fläsche Bier hesch übrigens für Zweifranggezwanzig und e Steak mit Pommes und Gmies für Nüünfuffzig bikoo! Wie s‘ Spiil zwüsche de Grossrööt und de Obmänner usgange isch het me am Mäntig druff in dr BAZ könne läse, „Eine spektakuläre Angelegenheit war das als Auflockerung gedachte Spiel zwischen dem FC Grossrat und dem FC Cliquen-Obmänner. Enrico Callacchi zeigte sich in Höchstform und steuerte zwei Tore bei. Die Obmänner glichen jeweils aus, und das anschliessende Penaltyschiessen (Werni Buess hütete das Goal mustergültig) endete wiederum remis.“

Als letschts Highlight wärfe mer e Bligg uf d‘ Grimpeli-Gwinner vom Wettstai-Stamm. In dr Chronik könne mr vo zwei grosse Sieg lääse, allerdings isch die Chronik bi wytem nit vollständig und drum möcht i mi do bi däne entschuldige wo d’Wettstai au scho zum Sieg gfiehrt hän aber do leider kei Erwähnig finde. Ihr dörfed euch aber gärn bi mir mälde und mr euri Grimpelierläbniss schildere drmit i die no in d’Chronik kah ufnäh!

2007 hän Schutterinne und Schutter vo dr Wettstai zaigt, as si die beschte in dr ganze Fasnachtswält sin. In dr Kategorie „Gmischti“ hän si über zwei Dääg de Gegner kei Chance gloo und so am Sunntignomidaag dr gross Pokal dörfe entgegenäh! Leider sin uns keini wytere Details vo däm erfolgriiche Wucheänd überliefered, immerhin e herrliggs Siegerfoti het’s bis in d’Chronik gschafft.

2018 vomzweite und bis jetzt letschte Wettstaisieg hän mr zum Glück meh Infos zur verfiehgig. Unter em Name ASRTAiniine isch die Wettstaiuswahl byraits zum dritte Mol am Grimpeli in dr Kategorie „Schutter“ aaträtte. Im Bricht erfahre mr as s’Mannschaftsziel gsi wär, innerhalb vo 10 Joor das Grimpeli emol zgwinne. Wie ene das Kunschtstigg scho bim dritte Aalauf glunge isch, erfahre mr jetzt. Dr Start ins Turnier isch miteme e 2:2 gege d‘Staine Old Stars e biz missglückt, defür ischs drnoch umso besser gloffe. D Gruppephase hän mr souverän mit drei Sieg und eim Unentschiede hinter uns gloo, nur hän mr leider debii, wägeme Muskelfaserriss, e Teamkamerad für dr nägscht Daag verlore. Dr Sunntig het mitere wytere Hiobsbotschaft aagfange, e wytere Schutter het wägere Zerrig nit könne aaträtte. Mit zwei Maa weniger sin mr in die zweit Gruppephase gstarted und hän au dört unserne Gegner kei Chance gloo. Mit eme Goolverhältniss vo 10:1 zu unsere Gunschte sin mer mit guedem Gfüül in richtig Halbfinal zooge. Dört hän mr d‘ Biefront Santihans suuber miteme 3:0 vom Platz gfäggt und so sin mr zem erschte Mol in däm grosse Grimpelifinal gstande. Uns gegeüber sin d‘ Staine Old Stars gstande, gege die mr am Samstig ins Turnier gstarted sin. S’isch e hart umkämpfte Final gsii, wo nach eme 0:0 Ändstand miteme Penaltyschiesse het miese entschide wärde. Dangg ere Wahnsinns Leischtig vo unserem Goali, wo nit nur e Ball vo de Linie kratzt het, sondern au no sälber vom Punggt erfolgriich gsi isch, hän mr das Penaltyschiesse miteme 4:3 Erfolg beändet und soo dä riesig Pokal dörfe in d‘Höchi stämme. Im Joor druff hän mers widr in Final gschafft, leider isch dä vonere schwere Verletzig überschatted worde und druffabe im Penaltyschiesse verlore gange. 

Witer goots mitere Galerie vo allne in dr Chronik uffindbare Mannschaftsfotene.

Und abschliesse dien mr dä Byytrag mitere chronische Uflischtig vo sämtliche Wettstai-Fuessballaggtivitäte!

1970: D‘ Chronik started mit em byraits detailliert beschriibene Blauschmatch zwüsche de Wettstai-Pfyffer und Damboure.

1971: Dr FC Wettstai tritt aa gege dr FC JB-Santihans uf em Sportplatz vom Banggverain.

1972: Wieder uf em Sportplatz vom Banggverain isch dr 1. FC Wettstai diismol gege die Verainigte Rhygwäggy-Gingger aaträtte. Gspielt het me um e 50L-Fass Bier wo noch em Spiil im Clubhuus gleert worde isch.

1974: Näb dr WM74 het au d’Wettstai ihri Maischterschaft gha, uff dr Exi (vis à vis Fuessballplatz Glaihinige) hän d’Knorzi gege dr Stamm um e Sieg kämpft.

1976: Nach em Glygge-Grimpeli, organisiert vo de Rhygwäggi hesch in de Wettstai-News könne läse: „Unseri Schuttmannschaft het am off. Grimpeli 4 Mätsch lang s Goal vo de Gegner erfolgrych verdaidigt und kai Goal ynegloh, im aigene derfir umso mehr. E Bravo zem glorryche 13:0!“

1977: Glyggematch gege d’Rhygwäggi uff dr Sandgruebe. „Mir bruuche vyli Aggtivi, dermit mir emool gwinne, und nohmeh Supporter, wo schreye kenne.“

1978:  „Clique-Match Gwäggi geege d Stai“ „s goht wie allewyyl um 50Lt.Bier, und dismool mien mer nundefahne ändlig emool gwinne, denn mer kenne mit em Ruubel Gscheyters aafoh.“

1979: Näb em beraits usfiehrligg beschriibene, vo dr Wettstai organisierte, Glygge-Grimpeli isch au no dr traditionell Match gege d’Rhygwäggi uf em Programm gstande. „Noh 400 Liter spendiertem Bier probiere mers nohnemool und wemmer dismool wider verliere, derno isch wirgglig Hopfe und Malz verloore, d.h. wird ys wohrschnynlig dr Primus das 50-lt Fass im Budget ändgiltig stryche.“

1980: „Thumbs down! – unsere Kriegsruef, denn dismool wämmers de Rhygwäggy wirgglig zaige.“ Wider het meh sich de Rhygwäggi gstellt, in dr Hoffnig ändligg au emol e 50L-Fass spendiert z’bikoo.

1981: „S letscht Johr hämmer jo dr Bann broche, und mir derfte dismool em Sieg gwiss sy (sofärn die Rächte mitschutte…).“ Leider het d‘ Titelverteidigung gege d’Gwäggi wäge zvyyl Wind miese abbroche wärde. Am disjöörige Grimpeli isch au no e Wettstaidelegation unter em Name „Tschogger“ aaträtte und het d’Gruppephase mit zwai Sieg und zwai Unentschiede abgschlosse, was leider nit zum Wyterkoo glängt het.

1982: Am 12/13. Juni het’s Glygge-Grimpeli, organisiert vo de Rhygwäggi, stattgfunde.

1983: Dr FC Wettstai het’s wider mit em FC Rhygwäggi uffgnoo und souverän mit 6:1 gwunne. „s’isch aifach s’Magsimum gsi.“

1995: D’Wettstai het zum zweite und bishär letschte Mool s Glygge-Grimpeli organisiert. S‘ Traditionsturnier isch am 17./18. Juni erfolgriich über d Büüni gange. Näb em Schutt –und Feschtbaizbetriib, isch‘s ältere Publikum am Ooobe in dr „Villa Wettstai“ bi Oggtoberfeschtstimmig vo de „Die 3 Steier“ und am Sunntig vom „Rocking‘ Max“ unterhalte worde.

1999: Dr FC Schleuderwade vo de Wettstai het’s am Grimpeli bis in Achtelfinal gschafft.

2000: D’Wettstai isch wider mitere Mannschaft am Grimpeli verträtte gsi.

2001: E Gmischti und e Schutter-Mannschaft hän sich am Grimpeli für d’Wettstai im Schutte gmässe.

2003: Am Glygge-Grimpeli „Die gmischti Mannschaft (26 Mannschafte) het sich bis uff e zweite Platz dribblet, und d Schutter (42 M’twerechafte), naja…! sind nach eme Chaos und eme durenand in dr Spielleitig in dr Zwüscherundi usgschiede….!

2007: Dr Grosserfolg vo de Gmischte am Grimpeli isch byraits gschildered worde.

2008: Ainzig e Mannschaftsfoti verrooted uns as d‘ Wettstai am Grimpeli vo Schutter verträtte worde isch.

2011: E Gmischtis Team kämpft am Grimpeli für d’Wettstai.

2013: Wider vertritt e Gmischti-Mannschaft unseri Glygge am Grimpeli.

2015: „ Am offizielle Glygge-Grimpeli vom 28./29. Juni 2015 hänn in de Kategorie Gmischti und Schutter je e Mannschaft mitgrümplet. By de Gmischte het sich d’Mannschaft under em Name „Puma“ erscht im Halbfinal miesse gschlaage gä. Em Spiil um e 3. Blatz hänn si sich wiider duregsetzt und gwunne. Bravo. Au d’Schutter under em Namme ASTRAiniine hänn d’Qualifikazioon am Samschtig iiberstande. Beesi Zunge behaupte d’Iberaasträngig haig nit uff em Blatz stattgfunde! Drotz em Pirlo synere Mithilf het s am Sunntig nur no in d’Zwischerundi glängt! S’Highlight isch em Schnytzge syni sensazioonelli Sytefallruggzierkischte gsi.“

2016: S‘ Glygge-Grimpeli het leider nit stattgfunde!

2017: D‘ Wettstai-Pumas und d‘ ASTRAiniine kämpfe am Grimpeli um jede Sieg, für beidi längts bis in d’Zwüscherundi am Sunntig, wo si allerdings chancelos usscheide.

2018: Vom grosse Erfolg vo de ASTRAine isch byraits verzellt worde, e Gmischti Mannschaft het disjoor nit dailgnoo.

2019: De ASTRAiniine wär d‘ Sensation am Grimpeli fascht glunge, im Final het meh sich im Penaltyschiesse miese gschlaage gää und somit au dr Traum vo dr Titelverteidigung miese begrabe. Leider isch dr Final au no durch e schweri Verletzig in unsere Reihe überschatted worde. D‘ Wettstai-Pumas hän ebefalls ihri Schuttkünscht zum Beschte gää.

Sooo das wär’s gsi…uf vieli wyteri glatti Wettstai-Schuttmomänt!

(no e Hampfle Bilder in aggtion als Zugabe)