Die Alti Garde hett sich bekanntlig an dr Generaalversammlig vom 18. Juni 2020 uffglööst. E groosse Dail vo de Aggtive isch an dr Daagig vom 5. Sebdämber 2020 by dr Rumpel Clique 1923 byydrätte. Die andere hänn sich in Stamm zruggzooge, um am Pilot-Projäggt döörfe mitzmache. Zyt also, um uff 32 Joor Alti Garde zruggzluege und e baar Höhepünggt uusezgryffe.
In de Aafangsjoor sinn die riisige Dambuurmaijoorköpf mit de wyte Roggraife uffgfalle. Dr Niggi isch by de Halt kuum in d Baize koo.
An dr Fasnacht 2004 und 2005 hett me d Sujet „em Couchepin sy Bättelbänd" und „Spaar-Armee" uusgspiilt. Uusegstoche im Zuug sinn die baide prominänte Dambuurmajoorköpf im 2004 dr „Couchepin" und im 2005 dr „HD Läppli".
Unvergässlig blyybt au d Fasnacht 2006. In dr Nacht vom Samschtig uff e Ladäärne-Vernissage-Sunntig hetts e halbe Meter Schnee aaneglegt. Voor dr Vernissage hänn im Waisehuus d Ladäärne miesse vom Schnee befrait wäärde. Yydrügglig sinn au die wäg-pfliegte Schneehüffe em Cortège entlang gsi. Do hett d Stadtrainigung e riise Arbet glaischdet. Mr sinn mit em Sujet „Hääfelimäärt" im e Matroosegoschdyym unterwägs gsi. Jede hett als Larveuffbau sy sälber baschdlets Schiff uff em Kopf ummedrait. Dr Maijoor isch als „Selmeli vom Popcornstand am Hääfelimäärt" mit eme Bluemehaafe uff em Kopf ummestolziert. S Highlight isch dr Gruess voor em Comité uff dr Wettstaibrugg mit em Abwurff vom Kopf bym Verbeuge woorde.
Glunge isch au s Sujet „Tour de Farce" mit de vier Team «VON SAGGG», »Testocom», «BLOODBANK» und «Team E.P.O.» sowie em Tourleader «Lloyd Fänbschiss» gsi.
Blyybe isch au s Sujet „Ciao Bruno", wo me no em Abgang vo s Rhikoffs vom Bruune Mutz e zytlang nit gwüsst hett, was mit däre letschte Basler Bierhalle bassiert. Dr Zuug hett nur uus Bruunbääre bestande.
Zem Schluss isch no z hervoorheebe, dass dr Megge Hofmann vo 1995-2015 allewyyl wiider wunderschööni Ladäärne – ainezwanzig (in Zaale 21) – gmoolt hett.
Gspannt döörf me sy, woo aane daas Projäggt is pilotiert.
