Dr erscht Summerstamm isch Gschicht

Dr erscht Summerstamm isch Gschicht und um die isch’s au gange. Yglade vom Ruedi, sin mer uf die halb Siebni zem Ortsmuseum Muttenz bstellt worde. Dört ytroffe hän mer e wunderbare Apero dörfe gniesse und dangg dr fründligge Mithilf vom Petrus hän mer d‘ Fiehrig wenigschtens in einere Hiisicht trocke könne starte. Gfiehrt worde sin mer wie jedes Joor am erschte Summerstamm, vom Peter Habicht. Im Ortsmuseum Muttenz gits e Duurusstellig über dr Karl Jauslin z’bestuune, durch die mer vom Peter gfiehrt worde sin. Die Stund isch wie im Flug vergange und drbyy hän mer e Huffe über dr Karl Jauslin erfahre und wunderschöni Wärk vo ihm dörfe bestuune, wie z.B sini iidrüggliche Bilder vo historische Ereigniss oder für uns bsunders interessant, sini prächtige Entwürf für Fasnachts- und Feschtumzüg. Nach däm unser Wüssensdurscht gstillt worde isch, hän mer uns uf e Wääg zur Verpflägigsstätt, em Traditionsrestaurant Rebstock, begää. S’isch herrligg gsi nach so langer Zyt widr mol mit de Glyggegspöönli an eim Tisch z’hogge und zämme e feins Ässe z’gniesse und über säll und jenes z’plaudere. Nach e paar meh oder weniger Bierli isch dä Oobe au für die letschte verbyy gange und so luege mer zrugg uf e sehr glungene Summerstammuftagt. E grosse Dangg goot an Ruedi für dä wunderbaar Donnschtigoobe wo mer zämme hän dörfe gniesse.