Drummelinstruggter Pascal Kottmann

In Rinach ufgwaggse, het dr Pascal in sine erschte Läbensjoor nüt mit dr Fasnacht zdue ka. Bis är öbbe säggs-jöörig gsi isch. Denn isch es bassiert: Sini Nochbere, wo sälber im e Schyssdrägzygli drbi gsi sin, hän en mit an d Fasnacht gno. Au mit drbi isch d Marceline gsi, sini domols beschti Kollegin. «Ich ha e Waggis agha und d Marceline en Alti Dante, das weiss y no ganz genau. Vo dört a isch es um mi gschee mit dr Fasnacht», sait dr Pascal Kottmann, won är im Schneidersche-Garte bi herrlichem Friehligsswätter Platz nimmt. 

Doch dr Pascal isch nit nur Instruggter, sondern au Drummelbauer, Grafiker, Larve- und Ladäärnemoler und no vyyl me. Es drait sich also alles um d Fasnacht bi ihm. Also fascht alles: Syt e baar Monet haltet ihn sini ei-jöörigi Hündin uf Trab, mit däre är gärn d Zyt in dr Natur verbringt. Aber sunscht ka me sage, dass bim Pascal ─ au wenn är sich gege die Ussag wurd wehre ─ 365 Daag im Joor Fasnacht isch. Und trotz Nit-Fasnacht het är bi divärse Projäggt mitgmacht und unter anderem au d Blaggedde gstaltet. Doch dodrzue spöter me.

«Was fasziniert dy vo all dine Tätigkeite eigentlich am Maischte?», will ich als Erschts wüsse. «S Larve- und Ladäärnemole. S Kreative schaffe für d Fasnacht isch das, wo mi raizt.» Und är ka sich au no gnau dra erinnere, wies zu dere Faszination ko isch. Bi sim erschte Morgestraich ─ und do sin mir wider bi dr Gschicht vo dr Alte Dante und em Waggis ─ sig är dur d Yysegass gloffe. «Und denn isch die Märtplatz-Ladärne uf ys zuekoo. Ich bi stooblibe, ha sie aagluegt und für mi isch klar gsi, ich will au mol Ladäärnemoler wärde.» Mit 14 isch denn dä Draum in Erfüllig gange und är het für die Jungi Garde vo de Schnurebegge sini erschti Lambbe gmoolt. «Natürlich sällmol me schlächt als guet». 

Nach e paar Jung Garde-Ladäärne heig ihn d Moolerei denn nüm so interessiert, bis aber die erschti Aafroog für e Stammladäärne ko isch. Nämlig für die vo de Basler Rolli, won är au grad dr ganz Zug mitgstaltet und d Larve gmoolt het. «Dört hani gmerkt, dass mi die grossi Moolerei fasziniert. Irgendwenn entwigglet me denn au e eigeni Handschrift. Das het aber vyl Zyt brucht.» Doch was macht denn sini Handschrift us? «Vyli sage ich mool dunggel. Ich würd aber sage ich mool kritisch.» So sige d Bilder bi ihm immer realer und skurriler worde. Ihn würde drum au me die tiefe politische Theme fasziniere, weniger dr «Comic-Kitsch», wo die lokale Sujet mit sich bringe.

Mittlerwyle sin bim Pascal 18 Stammladäärne, 5 Jung-Garde-Ladäärne und no zwe glaini Lambbe für d Vorstadtgässler zämmeko. Und au wenn s gstalte vomene Zug e huffe Arbet und Nachtschichte mit sich bringt, sig är nonig mied drvo. «Wenn s Resultat denn am Morgestraich gsehsch, het sich alles gloont.» Jä, s Füür, wo bim Pascal für d Fasnacht brennt, isch bim Gspröch weder z’überhöre no z’überseh. «Ich bi Vollbluet-Fasnächtler», bringt ärs kurz und knapp uf dr Punggt. Mit Achti het ihn e Kolleg mitgno zu de Aagfrässene ins Drummle. Mit 27 isch är denn zunere Drummelgruppe gwäggslet, de «Ueli 1876». Vor öbbe 10 Joor hets aber dätscht und s isch zur Spaltig ko. Sithär ischr bi de «Hörnli» aggtiv. «Mir sin e tolli Gruppe vo 14 Lüt. Ich bi immerno mit de gliche Lüt zämme, wie vor 30 Joor, das macht Spass.»

S syg aber nit persee s Drummle gsi, sondern d Fasnacht an sich, wo ihn vo Aafang a überwältigt het.«Die Masse, 72 Stund Rambazamba und denn isch es uf ei Schlag verbi». E Kontrascht mit däm är lang nit z’schlag ko sig. «Do macht d Wält im erschte Momänt kei Sinn me und du keisch für zwei Wuche in e Depression.»

Wenn me so vyl für d Fasnacht schafft und die drei Dääg denn verbi sin, isch es wie wenn me würd in e Loch kheye. So hets in sine 51 Joor au immer wider Durchhänger gäh. «Ich ha e Zyt lang bi de Wirrlete mitgspielt, Ladäärne gmolt und alles drum und dra. Drnoo bini richtig usbumbbt gsi, so dassi am Morgestraich ygstande bi und mi gfroggt ha, was y do eigentlich mach.» So het amigs bis am Zyschtig bruucht, bis är wider Freud dra gfunde het. «Jetzt mit em Älter wärde, kann ichs langsam wider gniesse.»

Öbbis wo ihn an dr Fasnacht au scho immer fasziniert het, sig d Blaggedde gsi. «Als Binggis isch das immer so öbbis grosses gsi, wo halt jede het. Drum hani au mit Achti scho ganz beschaide gsait: Ich wird mol e Blaggedde entwärfe», sait är lachend. Und au wenn me e acht-jöörige Binggis in däm Momänt für ganz schön ibermietig haltet, isch es denn au tatsächlich so koo.

Bi sim vierte Entwurf, won är ygsändet het, isch es bassiert. «Woni s erscht mol gwunne ha, isch das e Bestätigung gsi, ass y s Thema droffe ha. Das het mi stolz gmacht.» S isch d Blaggedde us em Joor 2007 gsi, wo e Strosseschild mit dr Ufschrift «Fasnacht» und vielne Fasnachtsfigure zeigt het. S Sujet het gheisse «D Stroos gheert uns», dodrmit hetr druf aagspielt, dass es jo gar kei Fasnachts-Strooss git und schleunigscht mol eini aane miessti.

Und im Joor druff hets grad wider klappt mit em Sujet «Mir spiile us» sowie au bim 100-Jöörige Jubiläum vom Comité im 2010 mit em Sujet «E rundi Sach». Und im 2014 het sich schliesslig no dr Mischtküübel mit em Sujet «Gäll, blyb suuber», in d Sammlig ygreiht.

Doch wie kunnt me uf so e geniali Idee für e Blaggedde? Maischtens sigs e ganz banaale Momänt: Är gseht öbbis und denn machts klick. «Ich bi e sehr bildlaschtige Mensch. Bim Stroose-Schild bini z’frie im Drummle gsi, ha mit eme Kolleg greedet, s Schild vom Imbergässli aagluegt und drbi gmerggt, dass es jo gar kei Fasnachtsstrooss git.» S sig denn aber au ihm nit immer alles glunge. So hets au Entwürf gä, wo ihm bim Ysaände scho klar isch gsi, dass es nüt ka wärde. «Do fallt eim denn nüt gscheits yy und me macht eifach irgend e Gugus.» 

Was em Pascal aber bsunders ligt, sin d Sonderfäll. Und so e Sonderfall isch es au in däm Joor gsi. «Es het mi graizt uusezfinde, ob ich uffs Thema Fasnacht söll setze, oder uff Corona.» Är heig denn im April scho gmergt, dass s Motiv e Schissirolle söll sie, won är bim Yykaufe eifach kei WC-Papier me griegt het, wells anderi Lüt ghamschteret hän.

«Die grööschti Herusforderig isch es denn gsi, sone schwierigs Thema nit ins Lächerliche z’zieh, aber glichzyttig dr fasnächtlichi Humor z’bhalte.» Won är denn fertig gsi isch, heig är gwüsst: «Das muess zerscht mol öbber schloo. Vom ganze Inhaltliche und vom Witz här, isch es eifach uff dr Punggt droffe gsi.» Das het sich denn au beworhaitet und är het dr Blaggedde-Wettbewärb scho wider gwunne. «Jo denn sins jetzt halt Fünf», sait är lachend.

In däm Joor het är no bi ganz viele andere Projäggt mitgmacht, wo trotz allem, ebitz Fasnacht in d Stadt brocht hän. So zum Bispil bi dr Solidaritäts-Aktion DrummelKunscht, wo si bi de Drummelbaufirma Schlebach, won är sälber schafft, initiiert het.

S Konzäpt isch ganz eifach gsi: 12 Basler Ladäärne-Künschtler, unter anderem au dr Pascal sälber, hän e Drummle dörfe gstalte, wie sie hän welle. Am Mäntig vor dr Fasnacht sin die denn im Schaufänschter vo dr Galerie Sarasin Art an der Spalevorstadt usgstellt worde. Und nach Sage und Schreibe 20 Minute sin alli Drummle für je 3’500 Frangge verkauft gsi.

Zudäm het är au bi dr Aktion vo unserem Larvemooler, em Dani Ebner, mitgmacht. Dr Dani het e neui Larveform kreiert und die denn an Glygge zum Sälbergstalte witergä. Zudäm hän au 30 Künschtler e sone Larve dörfe bemoole, wo denn usgstellt und schliesslig verstaigeret worde sin. Die Düürschti isch für 1’800 Frangge wäggange. 

Nit zletscht hän sie bim Schlebach au e Bryysdrummle organisiert, wo ganz bsunders au die Glainschte hän ihr könne dörfe bewiise. «Die Junge ligge mir eifach am Härze. Drum gibi au gärn mi ganz Wüsse an si wyter.»

Und do sin mir jetzt au bi uns, bi dr Wettstai aaglangt, wo d Dambuure vom Pascal instruiert wärde.«S isch glaub kai Ghaimnis, das für mi bsunders die Junge e Härzensaglägeheit sin, do ich bi ihne am maischte Potenzial gseh. Grad dr Drummeliufftritt vor zwei Joor het mir so guet gfalle.»

Zur Wettstai isch är ko, well dr Schnitzge sällmol nüm ufghört het stürme, nodäm dr Simon als Instruggter zruggträtte isch. Vorhär het dr Pascal 11 Joor lang d Glunggi inschtruiert. «Dört hets au vyli Jungi ka, wo hänn welle wyterko und die hani au probiert z pusche. Das het denn klappt.»

S gliche will är jetzt au mit dr Wettstai probiere. Aber natürlich het är nit nur an de Junge Freud. «In däre Glygge hets e huffe tolli Mensche, woni guet mag. Ihr händ e unglaubligs Potenzial, wenns um s’Kreative und um s Feschte goht. Das isch das, wo für mi dr Charakter vo dr Wettstai ussmacht.»