An de diisjöörige Fasnacht hätte d'Ammedysli nit nur ihr 75-jöörigs Bestoo gfyyrt, d' Wettstai und d'Ammedysli hätte dezue au no uf ihri 10-jöörigi Fründschaft könne aastoose. Wie die erscht gmeinsam Fasnacht im 2011 usgseh het, hän mr scho am Määndig erfahre, drum mache mr jetzt witer im Joor 2014.
„Quo v(b)adis Mittelstand?" het's Sujet vo dr Fasnacht 2014 ghaisse.
D'Vordrääbler hets scho samt de Zeedel dr Bach durab triibe. In ihrer Mitti isch no e Fääri mitgschwumme, uf däre feini Würscht grilliert worde sin. Hinter de Ladäärne hän d'Ammedysli als elf Keenige vo ihrem Waage uf die mittelständige Bebbi aabe gluegt. Wärend däm die Keenige ihr Ryychtum in volle Züg hän könne gniesse, hets de Bebbi als wie mee dr Stutz us de Däsche zooge und de letschte arme Bebbipfyffer hets nit mol me für e Hoose glängt.
S goot dr Bach ab, sag y numme
Gued Nacht und sali mitenand!
S goot nimm lang und denn ischs umme
Quo v(b)adis Mittelstand?
D'Fasnacht 2016 isch die nägscht gsi, wo mr gmeinsam mit de Ammedysli gmacht hän.
Mit em Sujet „S Lääbe isch e Tombola" sin mr als Verlierer und Gwünner vo dr Lääbenstombola uf d'Cortège-Route. D'Ammedysli sin als Verlierer uf ihrem Schluuchboot em Spiil vorusgfaare. D'Zueschauer am Strooserand hän grossi Auge gmacht, wo si vo de Ammedysli aabättled worde sin. Einzig blaui Räppli sin über Boord gflooge. D' Joker im Vordraab hän Zeedel in Form vo Löösli verdailt. „S Lääbe isch verschisse oder au famoos – Du hesch kai Wahl, das isch dy Loos" und „ Wirf uff d Ruggsytte e kurze Bligg – denn sehsch, eb du Päch hesch oder Gligg" isch uf dr Vordersyte gstande.
Die letscht Fasnacht wo stattgfunde het isch au die bishär letscht gsi wo mr mit de Ammedysli bestritte hän. D'Wettstai und d'Ammedysli hän in däm Joor mit ihrem Sujet e Thema ufgriffe, wo im Spootsummer 2018 für Schlaagzyyle gsorgt het. S isch das s'Logo vo dr Negro-Rhygass gsi wo e grossi Rassimus-Debatte usglöst het.
„Wär het Angscht voor em Schwaarze Maa… miir nit!", so het unser Sujet ghaisse.
Uf em Zeedel hesch könne lääse:
Es isch au doo, wie so oft im Lääbe,
dass me dr richtigi Doon sott aasträäbe.
S isch schnäll iiberdriibe und oft nit so dänggt
und gschwind wird d Mainigsfreihait yygschränggt.
Eb schwaarz, gääl, wyys oder root,
mir sitze doch alli im glyyche Boot,
sinn Mentsche, mache Fääler, mien s korrigiere
und s immer wiider mitenander brobiere.
Die ganzi Sach isch aigedlig biirewaich,
drum nutz dy Verstand und schnuur kai Sach.
Und passend zum Schluss, ebefalls uf em 2019er Zeedel zläse:
„Zwai glaini Wettstainlemer sinn z weenig zem Fasnacht mache,
drumm kemme jetz d Ammedysli und leens mit uns lo grache."
In däm Sinn viele Dangg liebi Ammedysli für die tolli Fründschaft und mr freue is uff hoffentligg vieli witeri gmainsami Fasnachte!