Dr Fasnachtsbummel 2015 isch vo dr Sara und dr Pascale organisiert worde. Dräffpunggt isch am Dreyspitz gseh. Vo dr Haltstell sind mr gmietlig ins Industrieareal gloffe. Wo goht's ächtscht aane? Wildi Theorie sind gmacht worde. Bald druff aabe d'Ufflösig. Im Restaurant Schmatz händ mr e lange Apéro gnosse. Uff de Tisch hetts Jenga-Spiel gha, ass me hett kenne Dürm baue, bis sie zämme grache. No em Apéro sind mr ygstande und sind in Richtig Haltstelle Leimgruebewäg gässlet, sofärn me immene Induschtriegebiet Gässli findet. Drnoh isch es sportlig worde. Laider isch d'Barriere abgschlosse gseh. Do mr joh dr aint oder ander Polizischt in der Clique händ, isch d'Patrouille vo dr Basler Polizei gruefe worde. Laider hett dr Passpartout vo dr Polizeistreife au nitt passt. Drumm händ sich die ainte sportlig uff e Umwäg gmacht und die andere, noh sportligere, sind iber d'Barriere gstiege. Grad äne an dr Barriere isch s'Restaurant Viertelkreis gseh. Dert händ mr unser Mittagässe gha. E toll Menü paart mit guetem Why hett uff uns gwartet. Vor em Dessert isch dr intärn Schnitzelbangg uffdräte. Dr Name vom Bangg isch mr nimm gläufig (d'Naggtwanderer?). S'singe isch untermuurt gseh durch d'Kläng vo enere Linkshänder-E-Gitarre. Dr Refrain isch auch speziell gseh, nämlig
Que sera SARA, what ever will be PASCI ….
Am vieri händ alli miesse dusse stoh, denn e Ysatzkurs vom Drämmli isch vorgfahre. Drmit mr im Dram nitt verdurschte, hett es jede noh e Gedrängg in d'Hand druggt grieggt. S'Drämmli isch iber es spezielle Route zem Mässeplatz gefahre. Ich nimm aa, ass das d'Usswychroute isch, wenn in dr Innerstadt d'Fasnacht, dr Bummel oder d'Meisterfyr stattfinde.
Am Mässeplatz sind mr denn ygstande und sind zem Adler gloffe. Drnoh händ mr uns mit wytere Hält in Richtig Freyi Stroos verschoobe. Noh dr obligate Parade in dr Freye sind mr bis kurz vor de Zähne gässlet.
Vor em Stadtkäller händ d'Tamboure Daagwach und drnoh alli zämme dr Wettstaimarsch gspielt.
Joh und scho isch au s'vorletscht Kapitel vo dr Fasnacht – z'letscht kunnt joh d'Lämpesitzig – umme gseh.
Mr händ e tolle Bummel kenne erläbe. E härzlige Dangg goht an die baide Organisatorinne Sara und Pascale.
