Fasnachtszyschtig Dail 1

Blaui Garde / Popeye / Ysbääre / Zähne-Club

Blaui Garde

Friehner … als d Fasnacht no stattgfunde hett
isch me no go Gässle und nit go Spaziere
me isch sich in de Baize gegesytig uff de Fiess umme gstande
und hett bim Brinzle miesse aastoo
aber ains, das hett sich nit gändert: Alggohol dringgt me ainewäg!

Was am Mäntig und Mittwuch no in dr Glyggedynamik untergoot
kunnt am Fasnachtszyschtig sehr guet zum Vorschyyn
nämlig dass jedes Zyschtigszyygli sy aigene Muntermacher hett
dasch jetzt kai Ode an’twere Flyssige mit Prozäntigem
aifache e erstuunligs Phänomen … und doch kai Usnahmeerschiinig!

E Byyspiil gfällig?
Ohni jetzt dr Namme vo däre blaue Zyschtigsgrubbe z’nenne
handlet sich’s bi däm Muntermacher um e Mischgedrängg
Dä rooti Saft wo mehrhaitlig uss Krüüter gwunne wird
schänggt me sorgfältig in e Glas mit vyyle Yyswirfel
dr Effäggt bi däm Vorgang isch unyberhörbar
es erzyygt e schuurigs schöns Knischtere
uffgfyllt wird’s Glas mit Wasser oder Soda
und fyr die Fruchtige unter uns mit O-saft
Drzue harmoniere Knabberei wie Nüss oder Tschibbs vordräfflig

Nadyrlig gniesse mir unsere Zyschtigssaft au unterem Joor
aifach bi jedere Glägehait wo mir uns dräffe
nit immer isch das zum Vordail vom Musikalische
aber me darf au moll e 5er grad stoo loo

Ybrigens, git’s sogar no e Lied vo däm Gedrängg
dr Refrain isch do lyycht ans Jetzt modifiziert:

Y nimm e no e xxxxxxx-Soda
um uns umme isch s Fasnachtsmeer
d Piccolo jubiliere lyyslig
es isch als wie’s Fasnacht wär!

Zögge


D Popeye 1986

Jo, wenn jetzt Fasnachts-Zischtig wär, denn wurd ich gege die zähni am Morge in Tell laufe und gschpannt vor dr Beiz luege, eb scho e Holzdrummle (s’isch jo s’scheenschte Wätter) mit ere Popeye oder Dalton Larve dert isch. Wenn nit, denn wär ich wiederemol dr erscht und wurd in d’Beiz go und e Bächer bschtelle. Mini Popeye Kollege drudle denn langsam y und mir wähle dr Kassier, wo denn dr ganz Daag unseri Zeche bläche muess. Natirlig fille mir zerscht die Kasse mit eme stolze Batze. Mini Popeye Kollege das sinn das Joor wieder die alte 6 Drummler und 3 Vorträbler wo mir scho vor ebbe 6 Joor gsi sin. Die Junge Drummler, wo in de letschte Joor zue n’ys gschtosse sin, hän sich zu de Saite Spränger abgschpalte. Verständlig, isch doch unser Verhältinis «in dr Baiz und uff dr Gass» stark ze Gunschte vo dr Baiz gschobe und si sin halt no Drummel gail und wänn meh uff d’Gass. Im 86, dr erschte Fasnacht wo d’Popeye gloffe sin, sin nur 2 Wettstailemer drbi gsi. S’het denn immer Wäggsel geh und um’s Millenium isch denn nur no e 3er Grüppli – die 2 Wettstai Dambuure und 1 Vorträbler ybrig blyybe. Mir hän aber sälli Fasnacht voll duurebisse und hän ys denn in de folgende Joor intärn mit Wettstai Dambuure verstärkt.

Aber jetzt gehn mir uff d’Gass. Die letschte Joor maischtens dr glych Ablauf. Erschti Halt im Spärber, denn in dr Rio Bar e Pastis und via Schlissel oder Saffre in Stadtkäller. Do wartet unsere Spinat uff ys – s’isch Mittags Zyt. Sit mir in de Popeye Familieväter hän, isch jetzt Familie Zigli agsait. Mit Pfyffer – maischtens e Mischig us Blaue Garde und Giftschnaigge – goht’s denn yber dr Daich zem Räbhuus, Volggshuus und Schofegg. Dert len mr d’Familie zrugg und freye ys uff’s Träffe mit de Ysbäre. Dr Adler isch s’Ziel. E längere Apéro isch agsait bevor mir ys zem Nachtässe trenne. Villicht mien mir das Joor wieder eme Ysbär Asyl ge, wie au immer, s’Nacht git nach em ybbige Apéro wieder e guets Bödeli. So langsam isch Zyt zem wieder ins Grossbasel z’gässle – dr Wettstai 11fi Waggel stoht bevor. Nach Mitternacht bim Schnabel Halt verliere mir denn immer d’Wettstai und mien denn halt in d’Brötlibar dr knurrendi Maage e bitz beruhige. Friener sin mir no bis am 4ri duuredrummlet – hyt zieht’s ys aber scho noch de 2 zrugg in Stadtkäller und mir nämme no e Schlummerdrungg und leen s’Erläbte nomoll Revue passiere. Aber ebbe, das wurd das Joor in etwa e so passiere – was passiert ägscht s’näggscht Joor?

Pius


Ysbääre

Hmm, mit 2000 Zeiche (so vyl resp. weenig het d Redaggtion bewilliget!) d Gschicht vo 46 Fasnachte und einere (bald zwei!) Nit-Fasnachte au nur aasatzwys z verzelle, das isch leider unmöglig. Dorum stichwortartig:

Gründet am Fasnachts-Zyschtig, 5. März 1974 als zweits Wettstai-Zyschtigszügli no dr Rote Garde. Bestand 1 Vorträbler, 4 Drummler. Spöter sin no 2 Drummler drzueko, aggtuell sin mir wider uff em Aafangsbestand. D Gründig isch nach eme Vorfall innerhalb vo dr Clique im «Alte Stöckli» uss Protäscht erfolgt, und mir sin no in dr glyche Nacht s erscht Mool ellei unterwägs gsi.

Dr offizielli Namme isch «Wombles» (pelzigi Wääse uss eren änglische TV-Serie). Will die niemerts kennt het, sin mir gly als Ysbääre bezeichnet worde, obwohl unseri Gossdüm brun gsi sin.

Gossdüm sin gsi Wombles, Araber, Zwärgli, Buure, Alti Wyber, Waggis.

Mir träffen uns am Fasnachts-Zyschtig zum Midaagässe im Glaibasel, denn wird gässlet (syt vyle Johre freue mir uns speziell uff die zwei «Rieme» mit de Popeys). Dr Apéro und s ussgiibige Znacht im Grossbasel, aaschliessend sin mir mit dr Clique unterwägs und als Abschluss meischtens nomool solo.

Ganz wichtig isch natürlig näbe dr Fasnacht dr Stamm im Rhyfälderhof oder im Stadtkäller nach de Drummelstunde. Allerdings mien mir zuegää, dass vor Johre mehr loos gsi isch in däne Stunde nach de Zähne Znacht und dass d Wombles dört immer zu den Allerletschte ghört hän, wo sich uff e Heimwääg gmacht hän. Me wird halt nit jünger!

Während em Johr träffe mir uns je eimool bi jedem Migliid deheim. Zerscht drummle mir maximal e Stund, denn gits allewyl e feyn Nachtässe. Und e Schlüggli Wy. Au unseri GV findet so statt.

Uiii, scho 1693 Zeiche verbruucht!

Legendär sin unseri vierdäägige Schiiweekends. Klar, do wird au Schii gfahre. Aber nit nur! Was sich dört jewyls uff und näbe de Pischte abspiilt, verschwygt dr Chronischt uss Höfligkeit.

Mitgliider vo den Ysbääre hän dörfe vyli Charge in dr Wettstai-Clique übernäh. Knorzi-Schryber, Knorzi-Obmaa, Materialverwalter, Stamm-Vizeobmaa, Stamm-Obmaa, Alti Garde-Obmaa, das isch nur en unvollständigi Uffzellig.So, fertig jetzt! Äxgüsi für 2140 Zeiche.

Teddy


A PROPOS VIRUS….. Die vom Zääni-Club sind au Alli infisziert.

Der Zääni-Club-Virus isch au bsunders aasteggend. Und gfäärlig wird er heggschtens wenn der Fasnachtszyschtig ins Wasser gheit. Denn wirggt er sich uf d’Moral vo de Maischte wo im Zääni-Club sin us. Me vermisst ebbis vom Scheenschte, wo aim d Fasnacht z biete het. Und „ainewäg“ kiemts niemerem vom Zääni-Club in Sinn sich gege dä Virus z`impfe losse.

Virus-Mutatione gits bim Zääni-Club-Virus kaini, will er ebe ainzigartig isch, e so wie der Gaischt im Zääni-Club. Es isch im Joor 1975 gsi wo zu der erschte Jooresversammlig vom Zääni-Club uufgruefe worde isch. S genaue Grindigsdatum isch nime genau bekannt. Die Bapyyr-Serviette wo als Grindigs-Urkunde umfunktioniert worde isch ka me nime finde. Und wägedäm isch s genaue Grindigsdatum unbekannt. Das isch allerdings wurscht. Hauptsach es git en, der Zääni-Club!

D Yylaadig fir die erschti Jooresversammlig isch no ume. Am e 10.10. hän sich 10 Mitgliider zum „Yydringge“ in der Kunschthalle troffe und sin denn am zää-ab-zääni ins Käffeli Kaschtell gwächslet. Derte isch die erschti Jooresversammlig abghalte gworde. Zwai vo de Sitzigsdailnämmer sin no aggtyv im Stamm vo der Wettstai Clique, anderi sin passiv und ainigi sin scho länger im Fasnachtshimmel.

D Aggtyvitäte im Zääni-Club starte scho im Jänner vor der Fasnacht. Mit eme traditionelle Raclette-Oobe im Fasnachtskäller vo eme Zääni-Club-Mitgliid, wo denn au e ebeso dradizioonells Dart-Turnier usdrait wird. Und! Es isch au immer e Iberraschigsgascht derbyy. Dä kunnt au scho bald 10 Joor, es isch immer der Glyych, aber er gheert derzue wie d Ziibele und Pilzli uf em Raclette-Oofe und der Orange-Salat mit Schoggi-Cake zum Dessert.

Der Höhephunggt isch nadyyrlig der Fasnachts-Zyschtig. Me trifft sich am zää ab zääni imene Kaffi zu Zwätschgewaie mit Nyydel trifft, um denn noochhäär im Zyschtigsziigli dur d`Altstadt z gässle. Im Spärber byym dradizioonelle Schnuurebegge-Dambuure Uffdritt isch der erscht Halt. Vor Joore sin im Vortrab ame d Kinder mit de Mamene mitgloffe. Vyili Zaichnige wo sy ame wääred em Nachtässe im Käller zwische de alte Stadtmuure gmacht hän erinnere dra.

Ebbe emool isch au e Haimwee-Basler mitgloffe. Under der Larve het me syyni Drääne nit gsee wo-n-em aabegloffe sin wenn d Pfyffer „Z Basel“ intoniert hän. S Därtli schmaisse bim Schiesser isch au „e gueti alti Dradizioon“ wie`s aine vom Zääni-Club beschriibe wurd, wo uns am Zyschtig vo der Wolgge beglaite duet. D Stubete inere Dachwoonig hoch iber em Ryy, wo mir joorelang Schungge-Gipfeli und Wysswyi gnosse hän, isch allne im Zääni-Club in gueter Erinnerig. E sone Halt im private Raame het ebbis bsunders. Bsunders isch denn au immer d stimmig und das fiert derzue as me der Zyschtig im Zääni-Club so gniesst. S Zämmesyy unter uns hän mir nadyyrlig au wärend em Nachtässe im Zääni-Clubkäller immer bsunders gschätzt und gnosse. Heernli mit Ghaggts, wo e liebe Zääni-Club-Frind mit syynere Frau iiber Joore kocht het. Und mit de feine Kieche vo de Zääni-Club-Fraue zum Dessert isches e Gourmet-Diner worde.

Au „unter em Joor“ seen sich die Ainte oder Andere und pfläge so d Frindschaft iber der Zyschtig use. Der Zääni-Club isch prägt vo gueter Frindschaft und em guete Gaischt. Das sin d Zälle vom Virus wo me im Zääni-Club yyfangt. Der Zääni-Club ka me nit beschryybe – der Zääni-Club muess me erläbe. S «isch allewyyl nätt!»

Der Grieni Blätzli