G80 Marschyebig

Jewiils am Sunntig 3 Wuche vor dr Fasnacht, püngtligg am Viertel ab 10i schreits „achtyg – die Alte – vorwärts – Marsch!!“. E witers Highlight im Wettstai-Kaländer het somit aagfange, s isch die gmeinsam Marschyebig durch d Grien 80.

Speziell für d‘ Knorzi ischs e ganz e bsundere Daag, denn hüt isch es sowyt, sy lerne ändligg ihr Fasnachts Gotti odr Götti kenne. Bim gmainsame Halt im Parkrestaurant gits denn vom Gotti e Zmoorge spendiert und die erschte sin au scho draa, dr Träffpunkt für dr erscht Halt am Moorgestraich z’bestimme. Doch lerne mr hüt nit nur unser Gotti oder Götti kenne, für einigi ischs au s erscht mol wo sy in däre grosse Formation dörfe mit drummle oder pfyffe, was für alli e bsunders ufregends Erläbniss isch.

Nach em Halt im Restaurant gohts denn getrennt wieder richtig Parkhuus wo die Marschyebig z’änd goht. Egal ob bi Sunneschyyn, Schnee odr Rääge, nach däre Marschyebig isch d Vorfreud uf d‘ Fasnacht uf ihrem Höhepunkt aaglangt und me kas kuum erwarte bis die „drey scheenschte Dääg“ vor dr Düüre stöön.

Fabian