Die brezyysi Infos kasch dääre PDF entnää > > Anmeldung_Herbstbummel_2015
Herbstbummel 2015 Wettstai Cli-que Basel vom e Neo Kenner vo dr Basler Bierbrauszene
S Motto: d Basler Glaibrauereie oder die uffsträbend Bierkultur in Basel
Pinggtlig wie yyglaade hänn mer ys by herrligem Herbschtwätter, gspannt uff das wo kunnt, im Reschtorant Brauerei an dr Gränzacherstroos troffe. Dert sinn mer vo de baide Organisatore Luc und Kevin begriesst worde. Ibers Programm hänn sy, usser em Hiiwyys es wurd ys e „ bierigi Noomidaag" erwarte, nit vyyl verroote.
Gschtartet sinn mer mit eme glaine Spaziergang em Rhy entlang mit em Ziel Solitudepark. Dert aakoo het ys beraits dr Braumaischter vo dr Brauerei Luusbueb mit ainige vo syne Bier-Spezialideete erwartet. Är het uns erkläärt worum as är dä isch wo s bescht Bier in Basel, und das erscht no in dratitioneller Handwärggskunscht, wurdi braue. Alles hänn mer nit verstande. Wie me aber d Ergäbnis vo synere Glaibraukunscht deguschtiert, das het är uns nit gross miesse erklääre.
No dr erschte Deguschtationsrunde sinn mer uff e 36er Bus und sinn bis an d Lehemattstroos gfaare. Dert sinn mer beraits vo de baide Braumaischter vo dr Brauerei Schluggspächt erwartet worde. Au die hänn non eme kurze Exkurs in d Braukunscht d Zapfhääne uffgmacht und hänn uns (und das nit z knapp) s Produkt vo ihrer Brauerei deguschtiere loo. No zwai Brauereie hänn mer jo bereits Verglyychsmeegligkaite, und dodermit au e Grund, zem no ain z Deguschtiere, ghaa.
Aber au do het uns dr Kevin kai Rueh gönnt. Är het dr Abmarsch zer Bushaltstell uff e Bus in Richtig Gundeli befoole. Gstoppt hänn mer an dr Dornacherstroos vor dr Bierbrauerei BIRTEL.Emfange worde sinn mer im scheen uusbaute Hinterhöfli, hänn e Bligg in die blitzsuuberi Brauerei gworfe , vo de Brauer Ainiges iber d BIRTEL-ufffassig vom Braue deerfe erfaare und sinn dernoo, sälbverständlig ooni die glainscht Regglamtion, in die dritt Deguschtationsrunde gschtartet. Zem Uffdungge hets feyni Bierbrätzel und Yyglemmti gää. Well im Hinterhöfli au e „Döggelikaschte" gstanden isch, het zem Teschte vo dr Reaggtionsfähigkait e Mätschli statt gfunde. Wär am Schluss gwunne het, das het allerdings niemerts me so gnau kenne saage!
Au dä gmietlig Halt isch vom Kevin gnadelos abbroche worde. Ab uff e Bus und uusstiige vor em Schützematt-park. Grad näbem Pavillion sinn e baar jungi Bursche in griene Liibli mit em Uffdrugg Basiliske Bier hinter em e Tisch gschtande und hänn uff uns gwartet. No dr Begriessig hänn sy uns iber iri Art vo Braukultur uffkläärt und e weeneli glailut gstande, sy wurde im Momänt wääge Blatzmangel und au uus Keschtegrind nit z Basel sondern uff em Land braue. Das isch zwor schlimm. D Qualideet vom Bier wo sy mache, gheert aber wääge däm glaine geografische Uusrutscher nit glitte, im Gegedail die drey Bier won y deguschtiert haa sinn „Wältklass" gsii.
S het kuum glänggt zem dr Hoffnig Uusdrugg gää, s Basliske Bier käm bald wider zrugg uff Basel und däne junge Bursche zue irem Bier z gratuliere. Dr „Oberhetzi" Kevin het scho wider zem Uffbruch dränggt. Dasmool nit uff e Bus sondern uffs Drämmli in Richtig St. Johann. Glandet sinn mer bi Volta Bräu. E Runde dur d Brauerei und e baar Begrindige worum s Volta Bräu s bescht Bier in Basel isch, hänn au do nit deerfe fääle. Dr Deguschtationsdail isch do aber, wär wunderets – mer hänn jo scho vier Brauerzignis uusgibig teschtet – ditlig kirzer uusgfalle. Die Maischte hänn sich uff ai Brauereispezialideet beschränggt. Mit em Dursch het sich au s wunderscheen Herbschtwätter verabschiidet und het em Rääge Platz gmacht.
Dr Kevin het ys trotzdäm uuse ghetz und isch mit ys uff d St. Johann Fääri. Dr Remy Wirz het ys mit sym „Ueli" drogge und unfallfrey iber dr Bach brocht. E kurze Dippel und scho sinn mer an dr Öttlingerstroos in dr näggschte Brauerei, nämmlig dr Braubude Basel aakoo. Do wird in ere ehemoolige Baggstuube braut. Au do isch ys vom Braumaischter nomool s Ghaimnis vom guete Bier neecher broocht worde . Teschtet hänn mer s Ergääbniss nadirlig au.
No säggs Brauerei und eme Bierduurenander im Buuch und Darm hänn sich, die wo no hänn meege,mit em Drämmli an d Rhygass veschoobe und sin vo deerte per Pedes in d Fischerstube go z Nachtässe. Was maine iir hets zem Dringge gää ? Gott sei Lob und Dangg, ändlig en Ueli Bier. Bim Nachtässe, es het Wettstain-lemere und Wettstainlemer gää wo tatsächlig e Bierfondue gässe hänn, hänn mer dä Bierherbschtbummel uusbambele loo.
E Dail het sich bierseelig uff e Haimwääg gmacht und die ibrig Verdächtige snin no via em Schiefe und em Schoofegg wyter durs Glaibasel zooge. Es isch jo verständlig, e sone aasträngende Bummel git halt Durscht !
E grosses Danggscheen an Luc und Kevin fir die glungeni Idee und s Organisiere. No däm Bummel gits jetzt sicher ainigi Wettstainlemere und Wettstainlemer wo in Zuekunft nimme uusschliesslig Heineken oder Fäldschlössli dringge.
Wenn me d Foteli aaluegt, denn isch das mit däne wettstainige Schluggspächte e glungene Herbschtbummel, in Beglaitig vomene Kaare mit guet kieltem Bier, gsi!