Nachdäm mir am Mäntig ins Archiv vom Stamm iinegluegt hän, widme mir dä Byytrag jetzt de Knorzi. Ich ha drum vier Sujet uusepickt, wo mir bim dureblättere vo de Chronike bsunders in s Aug gstoche sin.
«Ai Unghyr kunnt sälten ellai» het s Sujet im Joor 1977 ghaisse. Es het uff s Seeunghyr «Urnie» aagspielt, wo im August 1976 im Urnersee entdeckt worden isch. So isch au dr Tambourmajor als «Nessie» högscht persönlig am Cortège ummegloffe.
Wär jetzt aber dänkt, s Sujet het sich elai um das gspässige Wäse drüllt, ligt falsch. S isch me e Kritik an s Schwizer Färnseh gsi im Bsundere an d Sändig Teleboy. Die het nämlig im Januar 1977 ufdeckt, dass syy das Urner Seeunghyr gschaffe het ─ isch also alles nur e Scherz gsi.
So sin d Pfyffer als «telegeni Dummi im Auguschtli» umegloffe und d Dambuure hän «Jubel-, Trubel, Haiterkaits-Knorzi» usgspielt. «Im Vortrab seht me d Stauffachere, dr Teleboy, dr Telewilly und dr Telelandsknächt», haissts in dr Chronik.
Und s het sällmol sogar no Vorrytter gää, die sin nämlig als Telefritze uf dr Gäg-Jagd gsi. Und d Vordräbler hän no e Requisit mitdrait. Dört druf isch dr Niggi Schoelkopf im Klaid vom Wettstai-Drache zgseh gsi und drunter isch gstande: «Mir Bruuche das nit, mir hänn en aiges», also e aiges Unghyr….
Dr Folgendi usschnit us em Zeedel verrotet viel über d Idee hinter em Sujet:
E Dritte luegt e weeni gspässig
Und maint denn gar nit ebbe hässig,
D Hauptsach syg, die Färnseh-Fläsche
Wurden alli äntlig gwäsche
Und vo all däm Mischt befreyt,
Wo me uns in d'Stube gheyt
Mit de Schwyzer Färnseh-Sache
Wo kai Mensch me drab ka lache.
1981
Jä was sölli sage. Über d Hintergründ vom Sujet 1981 kanni nit viel verzelle. Ich bi zu sällere Zyt bekanntlig au nonig uff dr Wält gsi. Aber au nach usgibige Internet-Recherche und Konsultation vo Clique-Kollege, wo sällmol sälber bi de Knorzi gsi sin oder gar im Vorstand, bini nit schläuer worde ─ s isch und blibt vorerscht e Rätsel.
«Dr Dalbe-Lai isch los», het s Sujet übrigens ghaisse. D Pfyffer sin «Loggbuseli vom Dalbe-Lions-Club» gsi und d Tamboure sin uf «Dalbe Safari» gange. Im Zeedel isch gstande:
In dr Dalbe hets albe
E Lai oder zwai
Wo knuure und murre,
Kunschtstiggli mache und anderi Sache.
Isch s Dirli denn offe, dr Wärter halb bsoffe
denn gumpt son e Katz ewägg vo däm Platz
dr Mihlybärg uff, Mainsch das git e Buff!
S dütet also alles druff hi, dass im 1980 bimene Zirkus im Dalbeloch e Leue-Dame usbüggst isch. Aber ebbe, ich will do kai Chabis verzelle.
Trotzdäm hani gfunde, muess me das Sujet eifach gseh ha, well d Umsetzig genial gsi isch: Vor allem dr Tambourmajor wo e rise Larve mit em St. Alban Tor druff ahka het und s Requisit, wo e Leu im Käfig zeigt het, hän super usgseh.
Aber jetzt gniesset d Bilder und wenn sich no öbber ka dra erinnere, was dozumol bassiert isch, no wäri froh um e Uffklärig.
Im 2000 denn sin d Knorzi in Rotblau idaucht worde, an dere Fasnacht het sich nämlig alles um dr FCB draiht. «Glaubed nit an Gaischter dr FCB wird…» het s Sujet damals ghaisse. Ihr merkets, die junge Wettstainlemer hän damals no nüt welle verschreie und vorussage, dass d Basler Fuessballer Schwizer Maischter wärde. Trotz dr Vorsicht ischs in däm Joor bekanntlig denn glich nüt worde mit em erschte Platz. D Knorzi hän no zwei witeri Joor miesse uf dr Titel warte.
E glatte Zug hets trotzdäm härgää. Vortrab, Dambuure und Pfyffer sin à la Halloween im Gschpängschter-, Häggse- und Kürbis-Look drhärko und dr Tambourmajor isch es stolze Maischter-Pokal gsi. Und dezue aane hän d Knorzi e Döggeli-Kaschte als Requisit mitdrbi ka, mit däm sie sich in de Pause hän könne duelliere.
Im 2012 isch es denn sowyt gsi, d Knorzi hän an dr Fasnacht ihr 50-jöörigs Jubiläum zelebriert. Mit em Sujet «50 Joor Knorzi ─ eifach Fasnacht» sin mir alli zämme ─ wie könnts au anderscht sy ─ als Knorzi durch d Basler Stroose zoge. In gäle, blaue, rote und griene Latzhose, mit em traditionell schwarz-wyss gstreifte T-Shirt und nit zvergässe mit em Peret uf em Kopf. Mir hän ─ wies s Sujet sait ─ eifach Fasnacht gmacht und am Mäntigoobe sin mir gar no mit dr Junge Garde vo dr Lälli-Clique, wo sällmol s 100-jöörige Jubiläum gfyyrt het, uf zwei, drei Waggel durch d Gasse zooge.
