Knorzi Summerstamm

Mir hän so richtig Glück kah mit em Wätter. Nachdäm s wuchelang rägnerisch, gwitterig und kalt gsi isch, hets genau uf die letschti Summerferie Wuche so richtig heissi Temprature aagseit. Und bi summerliche 30 Grad hän mir dr Knorzi Summerstamm könne duurefiere. Wie in de letschte Joor au, hän mir widr in dr Sandgruebe aagfroogt; das kenne mr guet, dört hets Platz, dört hets e groossi Wiise zum spiile und s Atelier mit dr Spiiltäsche isch au dört.

Am Aafang hän mr dr Platz no mit unaagmäldete Unihockey-Mannschafte, wo no schnäll ihres Z'nacht becho hän, miesse teile. Aber do sin mr guet anenander verbiicho, si sin zum Glück nid lang bliibe und d Knorzi sin au nid alli grad scho am 6i do gstande. Wo denn aber die erschte Knorzi iitroffe sin, hän mir scho e paar Spiili gmacht zum d Ziit bis zum Ässe überbrügge. Mir hän chli Dobble gspiilt (do muess me Bildli uf Karte finde und dä wo schnäller isch, griegt d Karte) und denn mit allne zämme Kubb (das Spiil mit de Holzklötzli wo me muess abschiesse). Während d Kinder am spiile gsi sin, hän d Eltere s Ässe parat gmacht. Bim wältbeste Grilleur und Papi het me s Fleisch oder d Würschtli könne ufe Grill due und im Beizli inne go Getränk hole. Dr Grill isch voll gsi, will so viil Lüt am Summerstamm gsi sin, was uns sehr gfreut het. Ganz viil Familie, viili usem Stamm und scho viili kleini Nochwuchsknorzi.

Nachdäm alli öbbis gässe hän, het s nomol e Spiili-Rundi gäh. Dissmol sin d Knorzi in zwei Gruppe in verschiidene Diszipline gegenander aaträtte. Als erschts gohts drum, usere gwüsse Distanz so viil Kubb-Klötzli wie möglich umzschiesse. D Gruppe Biinli het aagfange und het grad scho 3 Pünkt gholt. Denn isch d Gruppe Schmätterling dra gsi und het au grad ussgliche. Nach em erschte Spiil stoht also unentschiide. Im zweite Spiil isch je eine us dr Biinli-Gruppe gege eine us dr Schmätterling-Gruppe im Dobble aaträtte. Es het ei Karte mit verschiidene Bildli in d Mitti gäh und jede us dr Gruppe het au e Karte becho. Wär schnäller s überiistimmende Bildli gfunde het und luut gseit het, het d Karte gwunne. D Schmätterling hän in däm Spiil meh Pünkt gholt und sin somit in Fiehrig gange. Denn isch s widr um d Träffsicherheit gange. Miteme Pingpongbälleli muess me in Bächer träffe wo unterschiidlich hochi Pünkt gän. E Biinli het gfroogt ob s doppleti Punktzahl git, wenn er mit em Fuess trifft. Ich ha dänkt als Handballer isch er sicher nid besser mit de Fiess und trifft woorschiinlich nüt, also hani zuegseit. Und denn trifft er wirklich und au no grad in s Bächerli mit dr höchste Punktzahl. Trotz dere Glanzleischtig vo de Biinli, hän d Schmätterling gliich viil Pünkt könne erschiesse. Im letschte Spiil hän d Gruppe miesse schätze. Wie viil Sugus hets im Glas und wie viil M&M's im andere Glas. D Knorzi hän au bi de Eltere oder andere Cliquemitgliider dörfe go Hilf hole und ihri Zahl denn ufe Zeddel miesse schriibe. Im grosse Glas hets 79 Sugus drin kah (eventuell au nur no 78, will ich glaub dr Michel het eins klaut) und im M&M's Glas sin 128 drin gsi. D Schmätterling sin mit ihrer schätzig nöcher dra gsi und hän somit dr Wettkampf gwunne. Si hän könne ussueche ob sie lieber d Sugus oder lieber M&M's als Priis wän ha und d Biinli hän als Trostpriis s andere becho

Es isch e wunderbare Grill-Obe gsi und ich ha mi sehr gfreut, dass so viil drbii gsi sin.