Ladäärne ypfyffe
Dr Valentinsdaag isch das Joor bsunders romantisch im Kreis vo dr Clique verbrocht worde. Ab de 17.30 het sich d Wettstaifamilie bym Waisehuus droffe, zem e gmeinsams Apéro z gniesse und für e Momäntli unsri au das Joor wiidr bsunders schöne Ladäärne z bewundere. Gross isch d Vorfreud gsi, vor allem abr by unserne Neue wo ihri erschdi Fasnacht im Stamm hän dörfe miterlääbe. Mir begriesse neu bi uns: d Noemie Aeschlimann, dr Alain Merz, d Vera Oertli, dr Yannick Saladin, dr Fabian Schneider und dr Pascal Zaugg, wo vo unserne Knorzi überdrätte sinn, sowie dr Pascal Schindelholz, wo sich zurzyt im Broobejoor befindet. Härzlige Dangg für die nätti Bewirtig und e bsundere Dangg an Peter Meyer wo uns grosszügigerwyys au in däm Joor wiidr d Mählsuppe gsponseret het.
Unsri Alti Garde isch mit ihrer Ladäärne erscht spötr drzue gstosse, abr pünktlig, so dass mr alli zämme hän könne yystoh. Glyy isches denn au sowyt gsi und alli Pfyffer sinn yygstande zum gmainsame Ladäärne ypfyffe. Mr hänn unsri Ladäärne bi dr alte Boscht versorgt und sinn denn zügig und traditionell mit em Basler Marsch richtig Stadtkäller gässlet. Dört isch dr offizielli Schluss gsi, abr es het doch e Huffe no in Stadtkäller zoge, für e Schlummertrunk (odr au baar mehr). Dr Grossteil het sich denn abr doch au ufe Haiwääg gmacht, um vorem Morgestraich no baar Stunde Schloof zbeko.