Zem 5. Summerstamm het sich d Glygge bym Spaledoorkaffi, nääbe em Woonort vom Thomas Schürch, droffe. Es isch wiider e typische Wettstaifamilieaaloss woorde. Vom jüngschte Buscheli bis zer hundertjeerige Seniorin sin, usser de Knorzi, alli Generazioone aawäsend gsi.
Organisiert het die Ständeli dr Schnitzge. Dr Apéro het dr Thomas zem Abschiid als Dambuur-maijoor gspändet. E groosse Dangg Thomas für dä groosszügig Apéro. No däm d Pfyffer gnueg für e Aasatz und d Drummler für e Schlaag drungge hänn, het dr Schnitzge dä Summerstamm unter em Motto «Mir dangge und gratuliere» eröffnet. Är danggt em Thomas Schürch für syni 28 Joor Dambuurmaijoor und begriesst dr Eereobmaa und Dambuurmaijoor Niggi Schoellkopf, wo 40-zig Joor dr Stägge gschwunge het. Es isch soowisoo e Novum, dass d Wettstai Glygge in fascht 70-zig Joor nur zwai Dambuurmaijoore verbruucht het. Denn duet dr Schnitzge dr Elsa Meier gratuliere, wo am 29. Juli 2021 iire hunderschte (100) Gebuurtsdaag het könne fyyre. Der-no bittet är, dass d Glygge sich zem Ständeli uffstellt.
S erschte Ständeli gilt em Thomas Schürch für syni 28-zig Joor Dambuurmaijoor und 21-zig Joor Ladäärnemooler. Sy Wuntsch isch, dass är dr Dudelsagg dörf e letschts Mool aasaage, will är e spezielli Sympathie und Bezieig zer schottische Muusig und zem Single Malt Scotch Whisky het.
No em letschte Abwinger het dr Obmaa Matthias d Eer die offiziell Stäggeübergoob duurezfiere. Do nüt in de Statute stoot, wie me das macht, soll dr Thomas die Amtsübergoob mit em Adrian denn diräggt voornää. Är danggt em Thomas für all syni groossi Arbet, wo är für d Glygge do het. Dr Thomas isch nit nur Dambuurmaijoor gsii, sondern het e Huffe anders no glaischdet, wie dr Matthias uffzellt:
- du hesch d Redaggzioon vom Wettstaiblatt zämme mit em Fredi Leuenberger bis zer letschte Uusgoob im Joor 2009 übernoo,
- d Gebuurtsdaagskaarte für d Juubilaare und 1981 die erschti Ladäärne für d Knorzi gmoolt. Das hesch wyteri zää Joor gmacht.
- dr Pinsel hesch denn nit uff d Zyte gleggt! Ab 1991 isch s Sujet uff dr Stammladäärne wäärend 21 Joor dur dyni Fantasie und Pinselstrich zem erlüüchte koo. 2002 hesch denn dyni nit ganz letschti Stammladäärne gmoolt und das Amt im Karli Merz abdrätte. Aigentlig sinns aaber 22 Joor, will de fir dr Karli wäärend syynere Wyterbildig yygsprunge bisch und s Sujet «s Glaibasel im 3D» umgsetzt hesch.
- in däre Zyt hesch du au dr Hälfferapéro injeziert, wo als Dratizioon bis hitte erhalte blyybe isch.
- d Ladäärne und s Waisehuus ghööre seer nooch zämme, will du dii, nääbem Ladäärne moole, voor allem bym junge Vogel Gryff Spiil yygsetzt hesch und vyyl Föteli gmacht hesch. Dur das het sich Bezieig zem Waisehuus verdieft. Das het au derzue gfiert, dass de am Vogel Gryff vom 20. Jänner 2018 e Eeredanz vom groosse Spiil im erschte Stogg vom Rääbhuus hesch dörfe abnää.
- 1992 hesch du als zwaite Dambuurmaijoor in dr doomools vierzigjeerige Gschicht vom Niggi dr Stägge übernoo. Speziell isch, dass du im Joor 1991 vo dr GV gwäält woorde bisch, will du das so hesch welle. In däre Zyt hesch kai Aaloss uusgloo. Isch wäärend em Ladäärne moole e Glyggeaaloss gsi, hesch du dy Pflicht als Dambuurmijoor erfüllt. Bisch sofort zrugg zer Ladäärne koo, hesch luut Karli sogar vom Clarablatz e Znacht mitbrocht und an dr Lambbe wytergmoolt.
- seer anngaschiert hesch du dii au für die jewyylige Knorzidambuure, drmit sy dr Richtig Zytpunggt zem abwingge finde.
- du bisch an jedem Knorzibummel als Beglaiter derbyy gsi und hesch drfür gsorgt, dass dr Knorzidambuurmaijoor nit ooni Bluemestruus im Arm d Freie aabe gloffe isch.
- am letschte Drummeliuffdritt vo dr Wettstai 2018, hesch du als Maijoor dr Nammensgääber vo unsere Glygge höggschpersöönlig dargstellt, was wool mee als e glungene Zuefall gsi isch.
- 2019 hesch du di entschiide das Amt abzgää. De möchtsch aaber no erwäänt ha, das dr Gröösse dii sälbmool an dr Fasnacht seer guet verdrätte het.
- zem Schluss isch hervoorzheebe, dass d Wettstai, no bald 70 Joor, erscht zem Dritte vo dynere Gilde kunnt.
Liebe Thomas für all das dangge mir diir rächt häärzlig. Mr hoffe mit diir und dr ganze Wettstai bald wiider Fasnacht mache z könne.
Aaschliessend isch dr Stägge vom Thomas an Adrian Krähenbühl, als erscht dritte Dambuur-maijoor, übere gange. Mit dr Aasaag vom z Basel am mym Rhy, het em Adrian syni Dambuurmaijoorkarriere offiziell aagfange.
Im dritte Aggt het zerscht dr Schnitztge d Elsa Meier, em Megge Buser – bikannt gsi als Schnitzelbangg «Stachelbeeri» oder under em Psuedonym «Frau Änishänsli»– sy Schweschter voorgstellt. Es isch kai Zuefall, dass mr das Ständeli do hänn. Dr Thomas woont grad nääbe dra und s Spaaldoorkaffi isch für baidi s Stammlokaal, will me do so feyni Kääskiechli griegt. Denn het sii dr Schnitzge scho s erscht Mool mit däm Väärsli vo iirem Bruder Megge abglemmt:
Im Spinaat hets Nitraat s het Faarbstoff im Wyy in dr Milch haissts Bazille im Flaisch haiggs Kemyy in dr Schoggi haiggs Fett im Waichkääs hetts Schimmel uff Wiidersee zämme, mr gseen is im Himmel
Dr Schnitzge het sii no welle uff e Zaanarztväärs hiiwyyse, wo sii sälber brünslet het. Do het sii dr Aafang nit gfunde, aber zem groosse Glächter gfroogt, eb dr Zaanarzt Doggter Villiger do isch! Dr Schnitzge het welle wyterfaare, aaber sii het en schnäll mit eme andere Väärsli über d Abstimmig zer Wiiderverainigung Basel Stadt – Basel Land nit z Woort ko losse. Am Abstimmigssunntig haiggs ghaisse:
E Buur vo Buus hett über Nacht Salami uus sym Eesel gmacht dä Süürmel haigg drotz allem haue am Abstimmigssunntig Yyaa gschraue
Denn küürzt dr Schnitzge die Reed ab, bivoor no alli zämmebräche. Är verzellt d Elsa haigg die letschte zwai Joor au kai aifachi Zyt kaa. Sii isch gwoont jeede Daag unterwäggs z sy und macht drum no iiri Spaziergäng do aane oder in Spalemäärt zem yykauffe. Im erschte Lockdown sinn sii im Altershaim yygsperrt woorde, will me nümme uuse het dörfe. Für sii wo allewyyl unterwägs isch und sich bewegt het, sinn das harti langi Zyte gsi. S Schlimmschte für sii, isch die zwungener-masse kuurzfrischtigi Aabsaag (uus Sicherhaitsgründ) im Joor 2020 vo unserem alljeerig Fasnachtsständeli dur s Vincentianum gsi. Dass mr nit koo sinn, het d Elsa bis hütte nit verstande und begriffe. Sii isch so entdüscht vo uns gsii, dass sii am Samschtig Zoobe im Saal unde, wo mr dr Uffdritt ka hätte, e Schildli aabrocht het. Dört isch druff gastande: «d Wettstai sinn alles Feigling». Iire Groosssoon het denn gsait, Groossmami nimms wiider ewäg, das isch nit in dr Oornig. Im 2021 ischs uus de glyche Gründ, no langem hi und här mit em Kanton und Haim, au nit gange. Zwai Mool in däne baide Joor het sii vo uns kai Wettstaimarsch könne loose. Drum isch es an dr Zyt, dass mr dä jetzt ze iirem hundertsche Gebuurtsdaag mit e huffe guete Wüntsch dien mache. Sii het sich bedanggt dass Drummler und Pfyffer wiider koo sinn, daas haigg iire aifach gfäält. Denn sinn iiri Kokos-Raffaello-Kopfladäärnli mit Corona-Masggehalterig verdailt woorde. Die het sii kreiert und bemoolt under dr Mitarbet vom Wärggstattscheff, wie sii em Schnitzge sait. Druffaabe het sich d Elsa zwüsche de Dambuure und Pfyffer yygrait und dr Wettstaimarsch in unsere Raaie so richtig yynezooge und gnosse!
Zem Abschluss sinn mr in Marschformazioon under em Spaledoor yygstande. Dr Voordraab mit Standarte und Stäggeladäärne vooruus, het dr Adrian dr Saggodo aagsait. So sinn mr dur d Spalevoorstadt bis zem Brunne gloffe und denn in d Schützmattstrooss abbooge. Bym Almi synere Fasnachtsbaiz het dr Adrian abgwungge. Döört sinn mr yykeert. D Frikadelle und und s Gedrängg het d Glygge offeriert. Für die «Diggi Boscht» e groosses Danggerscheen em Voor-stand und em Seggelmaischter. Z erwääne und z dangge isch au no em Rootgardischt und Alt-Haiwee-Wettstainlemer Peter Meyer, für d Bedreuig und dr Faardienscht für e Niggi.
S isch e richtig guete Aaloss gsi, wo do uffglaist woorde isch. Allne wo doderzue byydrait hänn vyyle Dangg. Es isch bis zer letschte Ruundi no luschtig und spoot woorde, das wiird dr Karli sicher by dr Rächnig mergge.
dr Diggi Pfyffer