Dr Zögge als ewige Pfyffer vom Joor het ändlig no über 3 Joor (bedingt wäge dr Pandemie) Zyt gfunde is yyzlaade, zem e Noofolger*in als Pfyffer*in vom Joor zwääle.
Mr hänn is in sym Familiegaarte «Eigene Scholle» im Spitz 5 am Donnschtig dr 1. Sebdämber 2022 ab de halber siibeni Zoobe droffe. An zwai groosse Dischraie hänn mr döörfe Blatz nää, wo scho wunderbar dr Zögge und d Claudia K.-Ae deggt und au dr Apéro voorberaidet hänn. Im e Zuuber mit Yys het me sich mit kielem Flüssige döörfe yydegge.
Noodäm alli so langsam yydroffe sinn, het uns dr Zögge dur sy Familiegaarterych gfiert. Sy Gaarte ändet südlig oberhalb vom Huus effeggtiv im e Spitz. In däm Dail befindet sich e Weierli mit Seeroose und e kiisigi Uffenthaltsflächi. Die het är neu aaglegt. Voorhär isch e Blattebelaag und Raase döört gsi. D Hegge entlang dr Strooss het är aabegschnitte und dr Drootzuun mit ere Sichtschutzwand, wo au dr Lärm e weeneli zrugghebt, ersetzt.
Unterhalb vom Huus isch dr Gaarte in drei Dail abgstuefft. Dr gröösser Dail sinn Raaseflächene, wo dur Kiiswäägli drennt sinn. Uff dr underschte Flächi isch e groosse Öpfelbaum. Obedra öschtlig vom Kiiswäägli isch e halbstamm Kirsibaum. Uff dr weschtlige Syte het dr Zögge e rundi Kiisflächi aaglegt, yygraamt vo-nere Stuuderabatte. Döört druff het e glainere runde Disch mit vier Stiel blatz gfunde. Drüber het är e Gstell montiert, wo är Roose dra uffeziet. Wyter weschtlig isch no e liigiflächi mit zwai Liigstiel. Dr Unterhalt vo däm Gaarte git vyyl zdue. Ellai für e Raase zmaie bruucht är e Stund.
Im Huus het är em Käller zwai groossi Thängg miesse yybaue. D Zue-, Ab- und Entlüfftiglaitige het em d Vetter Spänglerei yybaut. Em Parterre isch d Kuchi, d Duschi und dr Woonruum.
Denn het d Pascale dr Salat aafoo schnyyde und scho sinn alli Voorspyyse uffdischt woorde. In dr Zwüschezyt isch no Ain haim, zem dr vergässeni Raclettekääs uus em Yyskaschte go befraie. Wär kai Kopf het, het dr ÖV und retour e Auti. Woni wiider zrugg gsi bi, sinn scho alli am Kääs schmelze gsi. Daas isch gar nit so aifach woorde, will dr Wind d Flämmli allewyyl wiider uusbloose het. Drotzdäm hänn schlussändlig alli iire gschmolzene Kääs gässe kaa. Dr Zögge het no gmerggt, dass d Sara in dä gschmolzeni Kääs d Späggwürfeli seer fachmännisch mische duet. Vo döört aa isch sii für e Zögge sy Raclettekääsblächli zueständig woorde.
Noo em Abdische het d Claudia K.-Ae und dr Zögge s Dessertbuffet und dr Kaffi uffgfaare. Die verschiidene Buffet sinn uff eme Disch und eme Kochhäärd präsentiert woorde. Dr Kochhäärd het dr Zögge uusrangschiert. Dä hät me wie ze alte Zyte mit Holz aafüüre könne. Es isch scho gege die elfi Znacht gange, wo me drotz meermooligem Noofrooge nooni gwüsst het, wie dr/die neu Pfyffer*in erkoore wiird. Dr Zögge het no under groossem Byyfall sich häärzlig by dr Claudia K.-Ae für iiri Mithilff mit zwai Fläsche bedanggt.
Denn isch dr Zögge doch no mit eme Brätt und ere druff montierte Krokodilsschnuure mit vyyle glaine Schnapsflässchli hindefüüre koo. Kenne mr doch vo spoot Znacht em Glaibasler Adler! S Spiil goot e soo:
Wenn dii s Krokodil bym Finger uff d Zeen drugge bisse duet, bisch duss gsi und hesch zem Droscht e Schnapsfläschli zem kyppe griegt. Denn het me in Vierergruppe dr jewyyligi Gwünner uusgspiilt. Dr Gruppegwünner het sich denn de Finaaldurchgängg miesse stelle. Dr Schlussgang hänn denn d Pascale und Yvonne uusdrait. Wenn d Pascale scho bym Salat rüschte gwüsst hätt, dass e Krokodil em Huus isch, wär denn scho s Gekraische loosgangee, wie bym Finger yyneheebe. D Pascale het am Schluss nümme miesse lyyde. Isch so d Gwünnere vom Oobe und schlussändlig die näggschti Pfyffere vom Joor under groossem Byyfall woorde. Geert isch sii vom Zögge mit eme Schnapsfläschligürtel woorde.
Liebe Zögge, dass isch e glatte Pfyfferblausch gsi. Em Namme vo alle Aawääsende möchte ych allne Frässaliespänder und diir Zögge em bsundere rächt häärzlig für dy groosszügig Byydraag an das Racletteässe bedangge. S isch schöön, dass mr hänn in eurem Familiegaarte dä Oobe döörfe gniesse.
Dr Diggi Pfyffer