Am Samschtig dr 16. Novämber 2019 hett dr Proobe-Noomidaag im Top Secret Iebigslokaal stattgfunde. Do d Yvonne und ych hänn s erschtmool in däne hailige Halle döörfe derbyy sy. Drum ha ych weeneli gnauer ummegluegt. Uffgfalle sinn mr die baide Erinnerigsblaggette uus em Joor 2006 vom Edinburgh Military Tattoo und em Joor 2012 vom Royal Edinburgh Military Tattoo, will mr baidi Aaläss an Ort uff dr Castle-Esplanades hänn döörfe miterlääbe.
Bis zem Joor 2009 hett dä Aaloss dr weniger prestischträchtigi Namme Edinburgh Military Tattoo gha. Erscht im Joor 2010 isch vo dr Keenigyyn Elisbeth II. dr Zuesatz Royal verleit woorde. Für d Schotte hett sich die neui Bezaichnig nit duregsetzt, will sii schlicht nur vom The Tattoo reede! Im Joor 2012 isch denn au dr Voordraag vom Top Secret Drum Corps Royal gsi, wie me däm Video mit aafänglige Bildstöörige ka entnää. S Bublikum isch fascht uusgflibbt!
Dä Proobe-Noomidaaag isch guet organisert gsi. D Verpflägig hett dr Voordraab übernoo. Es hett e feyni Kürbissuppe, Apérogebägg, Nüssli, Manderine und Kueche gää. Au Gedrängg sinn gniegend vorhande gsi, sodass in de Pause kai Dambuur hett miesse verdurschte und de Pfyffer iire Aasatz gwäärlaischdet gsi isch! Vyyle Dangg de Voordrääbler.
Die baide Instruggtore hänn is zwüsche de Pause am Proobesamschtig,
wie au an dr Dezämber-Broob mit de Knorzi zimmlig hefftig dra gno!
Es isch toll, dass mr das Indoor-Lokaal vom Top Secret Drum Corps döörfe nutze und is e so könne muusigkalisch wyter bringe. E gueti Sach!
Digge Pfyffer