In däm Byytrag luege mr zrugg uf vier vergangeni Wettstai-Fasnachte wo alli öbis bsunders an sich gha hän. Sälbschtverständligg het d' Wettstai no viel mee bsunderi Fasnachte erläbt, doch uf all die iizgoh würd dr Raame vo däm Byytrag leider spränge.
„S' Wätter: Syt 3 Wuche herrscht in Europa e Kälti bis ze -25°. So hänn mr nätts Wätter mit ca. -15-17°!"
So foot dr Yytrag zur Fasnacht 1956 in de Glygge-Chronik aa. E glaine Bligg uf dä Joorgang hän mr scho bim Moorgestraich kaa, doch jetzt wänn mr uns die yysig Fasnacht no biz gnauer aaluege.
„Souvenirs Bâlois – zem Dail Kitsch!" het s' Sujet gheisse.
Dä Usschnitt us em Zeedel git uns e guede Yybligg ins Sujet:
„Wyttere Kitsch in grosse Masse,
wo hett d'Basilea fail:
´s Basler Minschter gseh'sch uff Tasse,
dr Mönch im Hintergrund zem Dail!
D'Schoggi pryst me in dr Regel
in Form vo Baslerstäbli a,
Baslerdybli, Drummelschlegel
kasch au bym Konditer ha,
Soggehalter, Hoseträger
sinn scheen verziert mit Baslersprich,
d'Kupferplätz und d'Pfannefäger
mit Baslerstäb im Gryzlistich!"
Bsunders hervor z'hebe sin d Goschdyym vo de Pyffer, wo als «Gruess vo Basel» unterwägs sinn gsii. Und drumm stoot au in de Chronik unter em Bild vo de Pfyffergruppe gschryybe „Die scheenschti Grubbe wytt und Brait syg die, wo Drummle-Corsett drait".
Dr Fasnachtsmittwuch het denn bi unglaublige -19,6 Grad aagfange!! Ob do die fingerloose Händdsche bi de Pfyffer no öbis gnutzt hän odr d'Dambuure ihri Schleegel no us de Händ bikoo hän? …i hoff mir mien das nie an uns sälber usefinde.
Wyter goots mit de Fasnacht 1991 mit em vellicht speziellschte Sujet in de Wettstaigschicht?
Sujet: kains, aber Mir fyre 60 Joor Niggi – 40 Joor Tambourmajor
Dr Niggi het an däre Fasnacht nach 40 Joor als Tambourmajor s'letscht mol dr Stägge für dr Stamm gschwunge und das het mit däm Sujet sotte gfyyrt wärde. Nur s Comité het nit sone Freud an däm Sujet kaa und het drum de Wettstai d'Subventione kürzt!
D'Ladäärne isch in däm Joor in Form vom Kaffi Spitz drhär koo und zum erschte mol vom Thomas Schürch gmoolt worde.
Leider ka me in de Chronik nit mee über s'Sujet erfaare, drumm gniessed no d Bilder dezue und denn goots wyter mit de Fasnacht 1996.
„Uns längts – nid!", so het s'Wettstai-Sujet für d'Fasnacht 1996 g'heisse.
Wättertechnisch s komplette Gegeteil vo 1956, isch die Fasnacht, sit de Comité-Gründig im Joor 1910, die wärmscht Februar-Fasnacht gsi. Drey Daag Sunneschyyn!!
„Mir hänn kai Gäld und au kai Zyt drum isch au s Sujet nit so wyt"
Am Määntignomidaag het me sich denn komplett in Wyss am eins zum erschte Atelier troffe, no bevor s uf d' Cortège-Route gange isch. Näb de Wysse Ladäärne het me e Atelier-Waage drbii kah, uf däm bi de Hält d' Larve und Goschdyym gstaltet worde sin. Glychzytig isch d'Ladäärne gmoolt worde und e Feschtwirtschaft het notürligg au nit dörfe fähle.
Uf de nochfolgende Bilder kasch gseh wie d'Wettstainlemer flissig an Goschdyym, Larve und Ladäärne gschafft hän und so dr Zug als wie farbiger worde isch.
Zu gueder Ledscht wärfe mr e Bligg uf's Joor 2011, die letscht Fasnacht vor em beschwoorene „Wältuntergang".
Genau dä „Wältuntergang" wo dr Mayakaländer aagäblich sott vorhär gsait ha (stimmt nodürligg nit, s isch eifach e Kaländerzyklus gsi wo im 2012 gändet het), het d Wettstai zum Sujet kaa.
„Gly ischs so wyt 2012 s Aend vo dr Zyt – Zrugg uff d Arche!" het s Sujet ghaisse.
S'Bsundere an däre Fasnacht isch nit s Sujet sälber gsi, sondern d'Umsetzig drvoo. Me het notürligg e Arche brucht, wo all die Dierli hän kenne druff goo und drumm het me sich an d Wage-IG gwändet mit de hoffnig s findet sich e Wageglygge wo die Arche baut und mit uns Fasnacht macht. Dr Roger Borgeaud als Wage-IG Obmaa het sich däre Sach grad sälber aagno und het sich mit synere Wageglygge, de Ammedysli, bi uns gmäldet. Sit däm isch e grossi Fründschaft zwüsche dr Wettstai und de Ammedysli entstande wo uns bis hüt vieli tolli Züg gschänggt het. Gnauer uf die Fründschaft und die druss entstandene Sujets luege mr denn am Mittwuch.
Im Zeedel hesch könne lääse:
„Dä Kahn wird riisig, s muess sich lohne, mit dausige vo Kajütte
parkiert wird denn uff dr Chrischone – wär yynewill, muess aifach lütte.
Y nimm nid jeede, s derfe numme zwai vo dr glyyche Dierart yyne.
Mensch, du blybsch lieber grad dehai; ab dir muess y sunscht no gryyne."
Wie riisig dä Kahn worde isch und was für Dierarte s druff gschafft hän, das luege mr doch am beschte uff de Foti aa.
