Als Abschluss vo dr Wettstai Online-Fasnacht wänn mr jetzt s Ghaimniss um die aakündigti Überraschig lüfte.
Mit grosser Freud präsentiere mir euch dr Wettstai Fasnachtshelge 2021!
Als erschts goot e riiise Dangg an Pascal Zaugg wo uns dä wunderbar Helge nit nur gmoolt, sondern au gschänggt het! Somit goot dr ganz Ertrag vom Verkauf in unsere Wettstai Solidaritätsfond. Mee zum Verkauf gits witer unde!
Zwei graui Fasnachte hän mr hinter uns gloo,
s isch Zyt as widr Farb ins Wettstai-Härz ka koo.
Drumm hän mr ys dängt, moole mr e knallige Helge,
wo iiladet in scheene Erinnerige z'schwelge.
E huffe Glygge-Sujets kasch druff entdecke,
wo au ohni Fasnacht dr Wettstai-Gaischt in dir dien wegge.
Doch z'viel Nostalgie fiiert au zue-n-ere Seel loose Kriise,
drum isch vorwärts luege und zämmestoo d'Devise.
Jetzt wänn mr als Glygge in e neys Kapitel staarte,
mit viel Härzbluet witer goo,
drmit s nach 376 Dääg waarte, wiidr ka haisse "Wettstai Yystoo!"
Mir hoffe euch gfallt dr Helge und freue is wenn är bi euch Deheim glii e schööns Plätzli findet!
Alli Infos zum Verkauf:
Dr Helge ka me als Poster in zwai verschiidene Grösse bezieh:
- Format 30x40cm für 20 Frangge
- Format 40x60cm für 40 Frangge
Für d'Bstellig schiggsch e Mail an wettstai.fasnachtshelge@bluewin.ch mit dr gwünschte Ahzahl Helge und dinere Adrässe. D' Infos zur Zahlig und em Versand bikunsch denn nach iigang vo dinere Bstellig. Bi Frooge dörfed ihr euch an die glych Mailadrässe wände. Wie au bi dr Blaggedde, dörf me au dr Helge bi Familie, Fründe und Bekannte witer empfääle!
Mir bitte euch euri Bstellige bis spötischtens am 14.03.2021 ahzgää!
Druggt wärde d Helge bi dr Druckerei Dietrich.
Mir Dangge im Vorus für euri viele Bstellige und wünsche euch ganz viel Spass mit em Helge!
Euri Wettstai