Über Basel und alles wo mit unserer Stadt z'due het, isch scho sehr viel gschriebe worde. Durch das gits so einigi Biecher wo in irgend-ere Art mit unserer Glygge z'due hän. Drum möcht ich euch in däre neue Rubrik, Stügg für Stügg, Biecher vorstelle mit Wettstai-Hintergrund.
Afoo dueni mit em Buech „Die Basler Rheinfähren". D Verbindig zu unserer Glygge ligt bi däm Buech bim Autor. S' isch vo unserem Glyggegründer em Niggi Schoellkopf gschriebe worde. Dr Niggi isch öbbe nit nur Vollblued-Wettstainlemer. Unteranderem het är au no dr Fähri-Verein mitgründet und isch dört mittlerwiile Ehrepräsident. So het dr Niggi eines Tages d'Initiative ergriffe und uns das tolle Buech gschänggt.
Drin gits zem Bispiil z'erfahre, wo die erscht Fähri hi und här gschwumme isch, wär de Hütige ihri Nääme gää het, wie si überhaupt ans andere Rhyufer glange oder wäm mer's verdangge as mr hüt no ihri Dienscht könne gniesse und notürlich wär die Schiffli stüüre kaa? Hösch!
So gnueg verzellt! Jetzt hesch no Zyt zem das tolle Biechli z'lääse, solang dr Friehlig no uf sich warte losst. Und wenns denn sowyt isch und sich d'Sunnestraale widr zaige, so bisch baraat zem bi dinere Beglaitig, binere gmietligge Fährifahrt, mit dim grosse Wüsse über die scheene glaine Schiffli aazgää!;)
S' Buech gits im Handel fir 10 Stutz z'kaufe.