Am erschte Hornig hett s OK um e Matthias zem Wettstai Glyggeoobe in s Allmändhuus mit däre Uusgangslaag yyglaade:
S rumpuust in dr Wettstai. Die Alte strytte, die Junge fääle und dr Räscht waiss aigentlig gar nit was loos isch. Drbyy gäbt s soovyyl bosityyvi Syte in und an däre Glygge.
Drum nämme mir is e Voorbild an däne vo ääne am Daich. Obwool kuum zwai glyycher Mainig sinn, isch e jeede Stolz Amerikaaner z sy.
Loss uns e Oobe dä Stolz aaleege – mr (Passivi und Yyglaadeni freiwillig) verglaide is als Amerikaaner, egaal uus wellere Epoche.
Bis au Du e stolze Dail vo dr Wettstai und „Make d Wettstai Great Again!"
Moderiert hänn an däm Oobe d Melina und dr Sven. Sii sinn e weeneli in s kalte Wasser gwoorfe woorde, will s Brogramm erscht am Frytig vor em Glyggeoobe ändgiltig uusekoo isch. Drotzdäm hänn sii hervorragend dur dä toll Oobe gfiert.
Dr Aafang isch vo de Knorzi mit dr Pfyffer- und Drummelschuel, sowie em Spiil mit em Yankke und Läggerli bestritte woorde. E Komplimänt und e groosse Dangg an d Instruggter/ine wo Donnschtig fir Donnschtig mit vyyl Häärzbluet de Knorzi versueche unseri Fasnachtsmuusig byyzbringe. Do druss isch e glungene und luschtige Uffdritt vo de Knorzi woorde.
No unserem Glyggenochwuggs isch dr Stamm hinter emene Art Waalfisch versteggt mit em Festival uffdrätte. Derno hänn dr Kevin, Fabian und Sven mit em Uffdritt vom Offizielle uff d Kälbfääl glopft.
Derno hett d NAG (Neui Alti Garde) zämme mit Stamm dr Unggle Sam uffgfiert.
Zem Abschluss vom erschte Dail hett dr Niggi sy vo de Vetterbrieder reschtaurierte Stägge mitbroocht. Dr Niggi isch 50 Joor Wettstaidambuurmaijoor gsi. Sy Noochfolger isch dr Thomas S. woorde. Laider kaa dr Thomas uus gsundhaitlige nimme Fasnacht mache. So hett är am Wie-nachtsässe bikannt gää, dass dr Adrian K. als erscht dr dritti Wettstai Dambuurmaijoor sy Noochfolg soll aadrätte. Drum hett jetzt dr Adi dä Stägge vom Niggi mit em Wuntsch, dass är d Wetstai wyter erfolgrych an dr Fasnmacht dur d Gasse fiert.
In dr Pause hett s Himalya Burger Zässe gää. D Waartezyt hänn die Jungge mit Daartpfyyl wäärfe und Neegel yyschloo ummebrocht.
Dr zwaiti Dail vom Glyggeoobe hett mit eme Gaschtuffdritt vo de Jukebox Dancers aagfange. No de baide Dänz hett s no e Workshop fir interessierti Line Dancer gää!
Ladies and Gentlemen vo Little Basel yygflooge dr Bruno mit syne Ängel!
Am e Glyggeoobe deerf noodiirlig dr Schnitzelbangg mit em Däni und Schlutti nit fääle.
No däm Bangg ooni Helge hett die Neui Alti Garde dr San Carlo aagfange. Iberraschend sinn uff aimool dr Schlaag und s Pfyfferspiil vo dr „Negro Rhygass" dryblatzt. Zämme hett me denn dr Texas zelebriert und no e baar wyteri Koschtbroobe uus iirem Repertoir z hööre bikoo.
S jüngschte Zyschtigsziigli d „Saitespränger" in schööne neue Ueligoschdyym hänn derno mit em Drummelmarsch Aramis loosglegt.
No em jüngschte Zischtigsziigli isch allewyyl e Älters, nämmlig die „Blaui Garde" verstärggt dure e Sven mit dr Phaugge, yygloffe.
Dr Zääni Club hett s mit de Alte versuecht, isch aaber e weeneli am Alter gschyyderet.
No Älter hänn d Popeye uusgsee, bis die numme uffgstande sinn und ändlig gruesst hänn.
Dä guet organisiert und moderiert Oobe hett dr Abschluss mit em Wettstaimarsch gfunde.Derno isch no s Dessert offeriert woorde und em Foyer hett zem Barbetrieb e DJ uffglegt.
Alli däne wo zem Glinge vo däm Wettstai Glyggeoobe bydrait hänn e groosses Dangerscheen.
dr Diggi Pfyffer