Wienachtsstamm

S letschte Dannebäimli

e bitz e anderi Wienachtsgschicht

Es isch sälmool – kurz vor em erschte Advänt gsi wo der alti Maa noonere unrueiige Nacht verwacht isch und schloofdrungge in d Kuchi gwagglet isch go der erschti Espresso dringge. D'Wienachtsbelyichtig in der Stube und uf  der Therasse het scho wunderbar glychtet und e scheene Wintermorge het sich aakindiget. Trotz de warme Kerzelämpli ischs em alte Maa nit so rächt warm worde ums Härz – im Gegedail – är het e grosse Drugg verspyirt will er gwisst het, das er hit ebbis z erledige het wo iim scho iber drissig joor immer vyil Fraid gmacht het – nämlig s Dannebaimli im Vorgärtli vo sym Stadthuus mit elekrische Liechtli zschmigge.

Das Joor isch alles anderscht gsi! – Aber feen mir vorne aa.

Der alti Maa het in syne beschte Joor fir e amerikanischi Firma gschafft und dert 3 Länder dirigiert wo-n-er ganz vyil Mitarbeitendi um sich gha het wo iim derby gholfe hän. Mit iine het er au jedes Joor e Wienachtsfyir in jedem vo de 3 Länder gnosse wo allne ame e grossi Fraid gmacht het.

Wie jedes Joor isch är vo der Zentrale in Amerika zu eme Jooresänd-Träffe yiglaade worde wo immer amene bsunders scheene Ort stattgfunde het – das mool mitti Novämber in Costarica. Wo der alt Maa – syinerzyt halt no jünger und voller Begaischterig – im Flieger ghoggt isch het er sich iberlegt was es vor der Wienacht no so allerhand z due git dehai. Will er vyil unterwägs gsi isch und d Fyirtig wiider emool uf e Wuchenänd gfalle sin het alles miesse guet organisiert syi – d Wienacht isch fir iin immer ebbis bsunders gsi – fascht so bsunders wie d Fasnacht. Wo-n-er so am grible gsi isch und zu sich gsait het  – die Stewardesse wär au no e nätts Wienachtsängeli – isch em der Gedangge koo,  er kennt doch in sym Vorgärtli – eebe vor sym Altstadthuus e Wienachtsbaimli lo pflanze und das ame dure Advänt bis zum Drei-Keenigsdaag mit Lämpli schmigge wo am morge friee aageen und – noonere Pause – duure Daag – zoobe noomool lyichte.

Er het sich in synere Vorfraid uusdänggt wie d Mieter in sym Huus und die Lyt wo duurelaufe  e Fraid häte dra. In Gedangge het er scho gsee wie em Ainte oder der Andere sy Gsicht sich uufghellt het und vo-n-ere triebe Stimmig bletzlig e Lächle fiire koo isch.

Wo-n-er z Costarica glandet isch het er sich zerscht emool kurz an d Hitz miesse gweene wo dert gsi isch – he joo – dert isch voll Summer gsi. In der Limousine wo-n-en ins Hotrel gfaare het, het er em Gärtner dehai aaglite und em gsait er sell bis zum erschte Advänt zmitts im Gärtli e Dännli pflanze. Will der alt Maa vo Zaale mee verstande het as vo Technik het er fascht vergässe as jo au no e Steggdose aane muess wo me denn d Lämpligirlande ka yistegge. Jetzt isch em sy Spezi in der Clique in Sinn ko wo e Stromer gsi isch und er het em e SMS gschiggt – "Bitte in meinem Vorgarten in der Stadt eine Steckdose montieren – muss bis am 1. Advent fertig sein! Mit Cliquengruss aus Costarica!". Der Gärtner und der Cliquefrind hän sicher baidi dänggt – der Kamerad het wiider emool e Furz oder dert ääne scho zvyil Sunne an der Biire as er uf so Gedangge kunnt – aber sy hän der Uufdraag prompt uusgfiert.

An däm wunderbare Ort wo sich d Konzärnlaitig mit de Länderveranteworlige uus der ganze Wält troffe het isch em –  dert no jingere Maa – in de Sitzige nur no der Gedangge um sy Wienachtsbäimli duure Kopf. Trotz Sandstrand und Swimmingpool – wo-n-er in der Freizyt sini Wienaschtsrede fir d Fyir vo de 3 Länder gschriibe het – isch by iim e grossartigi Adväntsstimmig uufkoo. Adventum – uf dytsch Erwartung isch bi iim allgegewärtig gsi – d Erwartig uf sy Wienachtsbaimli –  am-e-ne Ort wo er iiber alles gliebt het und jetzt am erschte Advänt s erschte mool wird lychte!

Dehai aakoo isch er gly emool a-m-ene Samschtig in d Migros gsegglet go e Liechterketti kaufe. Mit däre isch er denn zu sym Huus zum se "installiere". E wunderscheens Dännli het en erwartet – aber d Steggdose het er nit gfunde. Entdyscht het er em Stromer aaglite und en gfrogt worum er se nit montiert het. Dä het der alt Maa guet kennt und em gsait – "loos – muesch halt richtig luege – sy isch under de Briefkäschte und zuedäm hän mer im Käller e Zytschaltuur montiert wo de kasch yistelle wenn as d Lämpli mien brenne". Jetzt isch technischs Verständnis gfrogt gsi – ebbis wo em alte Maa vo jehär total abgange isch. Er het scho e Schwaisuusbruch bykoo wenn er e Wärkzyigkischte nur aagluegt het. Iber anderthalbstund het er an däre Zytschaltuur umegnyblet aber nie die richtigi Zyt kenne yistelle. Am Delifon het em der Stromer gsait "y has befirchtet – y sag der jetzt wies goot und denn machsch alles scheen rueig". Me seet – scho vor iber dryssig Joor hets e "Delifoon-Help-line" gää wo hit e Gschyiss drum macht as hät me sy erscht grad erfunde. Es het klapt – der alt Maa het der Stegger yigsteggt – aber brennt het nyt. Lycht verzwyflet het er wiider e Delifoon zum Stromer gmacht – wo-n-em – au scho lyht verzwyiflet – erklärt het as er oobe an der Uur der Schalter no miess uf " Hand " stelle – und siehe da – s het glychtet und d Fraid bim alte Maa isch riisig gsi. Er het denn d Schachtle versorgt wo d Liechterketti drin gsi isch wo-n-er druf glääse het "Nur für den Innenbereich geignet". Noo zwai-drei Werter wo –  nit in d Adväntszyt passt hän – isch er wiider in d Migros gsegglet go d Lämpli umdusche und der technisch Prozäss het fascht wiider vo vorne aagfange.

Immerhin – s Baimli het no scheener glyhtet as vorhär – he joo – s isch jo au scho langsam dunggel worde. Uf em Flughafe het me sich scho aafoo frooge eb d Pilote der Vorgarte in der Altstadt mit der Pischteblychtig kennte verwäggsle, aber s isch nyt eso passiert.

Iber vyili Joor het s Schmigge vom Baimli im Vorgarte immer zum fraidige Advänts-und Wienachtsritual vom alte Maa gheert.

Au das Joor – aber dasmool isch d Fraid uusbliibe. Im Gegedail – Weemuet und Härzklopfe isch uufkoo. Wie immer isch der alt Ma zerscht in sy Fasnachtskäller, wo zwische zwai alte Stadtmuure gsi isch und het de Fasnachtsfigure "Geuete Daag!" gsait. Doo het der Dummpeter zue-n-em gsait "Was isch alte Maa" Du bisch jo kääsblaich und Dyni Auge sin komisch rot – hesch ebbis – isch ebbis passiert?" Der alt Maa het sich welle zämmerysse aber es isch em nit glunge und er het schregglig afoo hyile". "Waisch Dummpeter " het er gsait " wenn aine ka verstoo was in miir vorgoot denn Du – Du hesch in Dym Läbe au hii und doo Schwers erläbt und niemer het welle verstoo worum Du wäge sälem oder em andere so druurig hesch kenne syi.Jetzt goots mir wie Dir – es druggt mer fscht der Muti ab will y hit my Dannebaimli zum letschte Mool due schmigge. Y ha noo langem Zeegere und Ringe mit  mir sälber beschlosse im neije Joor my scheens Huus zverkaufe und doo gheert s Dannebaimli im Gärtli halt denn au derzue." Du derfschs aber no niemerem sage – Dummpeter- y has noonig fertig brocht die Nochricht de Mieter z iberbringe – so kurz vor der Wienacht mecht y das nit mache – y wart no bis Aafangs Jänner." "Jä was passiert denn mit mir – denn wird ych jo obdachlos – mues y denn zu der Hailsarmee" het der Dummpeter gsait. "Nai – kasch dängge Dummpeter – Du kunnsch zämme mit em Griene Blätzli, em Waggis, em Pierrot und allne Dyne andere Frinde zu mir hai und verbringsch dert mit mir Dy Läbesoobe – y kennt mi doch vo Eych niemools trenne" het der alt Maa – immer no mit zitriger Stimm – gsait.

Denn isch er mit der Liechterketti ins Vorgärtli und het d Lämpli ibers Baimli ghänggt.

"Oo wie scheen – mache sy wiider s Baimli – y ha allewyil Fraid dra wenn y am morge friee gang go schaffe und zoobe kaput wiider haim kum – blyibe syi gsund – as sy das Baimli no mängs Joor kenne schmigge" het e Mietere gsait wo grad uusekoo isch.

"Aha – s wienächtelet – gälle sy e scheeni Zyt" het d Pöschtlere gmaint wo d Wienachtsposcht in d Briefkäschte doo het.

Baidi hän kai Aanig gha worum s em alte Maa nit no Wienacht z Muet gsi isch und er uf der Laitere zitteret het wie Espelaub. Wo denn d Kerzli brennt hän ischs im Härz vom alte Maa dunkel bliibe und er het immer noonig kenne begryffe wieso me muess e Entschaidig mit em Verstand und gege s Härz träffe. Er isch mit eme bugglige Gang gege d Diire gloffe wo das Amsle-Päärli, wo immer im Frieelig im Dannebaimli mischtet, koo isch ko z fliege und sich freelig pfyffend z oberscht ufs Baimli gsetzt het. Baidi Amsle hän luschtig wyters pfiffe as wete sy em alte Maa sage " s Läbe goot wyters – gsägneti Wienacht und e guets Neijs!".

Hanspi Bucher, Advänt 2016