4. Summerstamm – Jubilarestamm

oder mir fiere unseri Jubilare mit sagehafte 480 Joor uff em Buggel 😀

Mir laade Euch y – so het Ylaadig zum Jubilarestamm aagfange und scho sin mir do. Ab de siebene Zoobe, bi strahlender Oobesunne het sich e grosse Dail vo dr Wettstai-Clique uff dr glaine Pfalz bim d’Albe-Wehrgang oder uf dr D’Albefähri droffe. Ganz nach em Motto zämme si und freundschafte pfläge, hän mir dä tolli Oobe mitenander, sig’s uf dr Fähri uf em Rhy oder uff dr glaine Pfalz, verbrocht

Kulinarisch verwöhnt sin mir mit sälbergmachte Würscht uf em Grill vom Christoph O. und Brot worde. Natürlig het’s au gnueg Bier, Wyy und Softgeträngg ka. Zum Abschluss het’s e tolls Dessertbuffet gäh und sälbstverständlig mit dr obligate Rieblitorte vo dr Lisbeth. 

Unsere Oobmaa het sich im Name vo dr Wettstai-Clique für dä tolli Oobe bi de Jubilare und Jubilarinne mit emene glaine Presänt (Basler Leckerly und emene Zooliydritt) ganz härzlig bedangt.

Au ich mecht mi im Name vo allne Awäsende für dä gmietlig Oobe bi de Jubilare, Lisbeth, Christoph, Felix, Luc, Nicole W., Nicole S., Tobias, Kevin, Roman und Simon bedangge – es isch mega toll gsi.