Schotter, schütterer, die Schüttere?
Scho mol vorwäg: Nei, dä bricht isch nit vo unserne Schutter. Sondern vo däm wunderbare Huffe, wo sich das Joor in dr Kategorie «Gmischti» ins Clique-Grümpeli gstürzt het. Wie mr uff de Name ko sin, sött jo noheliegend syy, aber ehrlich gsait sin mr bi de Durchsage amme sälber verwirrt gsy…
Jedefalls sin am Samschtig Morge, 24. Juni 2023, ab de 11e alli langsam aber sicher uf de Schützematte yytrudlet, hän d'Kickschueh montiert (in mim Fall noch exakt 370 Dääg wider emol) und die knallorange Trikots überzooge.
Mit langsam yytrudlet meini würkli langsam. Bis gfühlt am viertel vor 12i ischs unserer Kapitänin, dr Melina, no Angscht und Bange gsy, öb mr am 12:00 überhaupt 6 Lüt uff e Platz bringe wärde. Dr Kevin Zettel, wo aigentlig bi de Junge mitgmischt het, het sich aber bereit erklärt, unsers Gool z'hüete. So hän mr emmel mit eim Uswäggsel ins Turnier könne starte.
Vor de erschte Gegner hets mir persönlig scho graut ka, woni dr Spielplan gläse ha. Gege d'Schnooggekerzli hän mr nämlig no e Rächnig offe ka (wär nit Bscheid weiss, söll de Bricht vo letscht Joor go läse). Die Rächnig isch aber gar nit uffgange, und mir hän e böse Weckruef müese verkrafte.
Im zweite Spiel hän mr uff Verstärkig vo de («richtige») Schutter könne zelle, und prompt hän mr dr erschti Sieg vom Turnier könne yyfahre. Gege d'Räpplidätscher Waggis, bekannt fyr ihri fairi Spielwyys (*hust*), ha ich persönlig au eins vo mine grosse Ziel an däm Turnier erreicht: Ich ha eine vo ihne zu Fall brocht!
Au s'dritte Spiel gege d'«Friidensdybli» hän mr gwunne und im letschte Gruppespiel gege dr «FC Batzeglemmer» e Unentschiede gholt. Und das obwohl eine vo unsere schuttere Neuzuegäng, de Andrin, d'Tendänz zum Chancetod uffblitze loo het. Dass mr irgendwenn uff e Platz gschraue hän, är müessi nögscht Joor an dr Fasnacht d'Ladärne zieh, het au nit gwürkt. Wo ich em vom Spielfäldrand denn mit em ehrevolle Amt als Ladärnechef droht ha, hets aber zimli glyy e Gool gä… Somit het sich dä Neuzuegang mit em nötige Druck doch no bewährt!
Aber nit nur d'Neuzuegäng, sondern au die Gstandene hän alles gää. Im Gegesatz vom Autor vom Schutter-Bricht ha ich aber keini Lischte gfüehrt und ka somit keini detaillierte Ussage zu individuelle Leischtige mache… Was jedoch unvergässe blybt, isch de Support, wo mr sowohl vo Stamm-Mitglieder, als au vo unserne Knorzi und ihrne Eltere ka hän. Es isch richtig toll gsy, uff em Platz vo lutstargge «Wettstai, Wettstai»-Rüef aagfüürt z'wärde und so öpis wie e Choreo z'gseh!
Kei Garantie fyr irgendwelchi Ussage, aber emmel in miner Erinnerig isch unseri Kapitänin sowohl fuessballerisch, aber vorallem au organisatorisch und mental unverzichtbar gsy, und het zämme mit em Zöggi Amdouni, wo zur Höggschtform ufgloffe isch, das Team zämmeghalte. Erwähne wotti au die räschtligi Zaugg-Fraktion, wo uns tatkräftig unterstützt het, wie au unsere (da ärs scho soooo oft ghört het, sagi jetzt nit nomol, wie guet är isch) Gooli Christoph. Schlussamänd hän mr uns dur e kämpferischi Leischtig vo allne, wo uff em Platz gstande sin, fyr d'Zwüscherundi vom Sunntig qualifiziert, und dä kleini Zwüscheerfolg gebührend im Feschtzält gfyyrt. Dangg an dere Stell au an d'Seibi fyr d'Organisation und d'Verpflägig mit isotonische Geträngg (was noch em Sport jo schynts sehr wichtig sig)!
Am Sunntig hän uns im erschte Spiel nit nur körperlich, sondern au zahlmässig d'Kräft gfehlt. Doch au das het uns nit brämst; d'Aurelia het kurzerhand ihre Kevin rekrutiert und de Sebastian het sich zwüsche d'Pfoschte gstellt. Zuedäm hän mr no uff d'Pascale könne zelle, wo am Samschtig leider nonig het könne drby syy. So sin mr zwar muetig in d'Zwüscherundi gstartet, hän denn aber gege Torpedo Bataflafla wiederum e Weckruef müese verkrafte.
Im zweite Spiel vo dr Zwüscherundi het sich nomol d'Chance für e Revanche gege d'Schnooggekerzli botte, und dismol hän mr se könne nutze. Da sie gege Bataflafla nur Unentschiede gspielt hän, hän mir profitiert und uns fyr e Halbfinal qualifiziert.
Dr besagti Halbfinal hän mr gege die [beliebigs (Fluech)Wort yysetze] Räpplidätscher Waggis verlore. Und au im Spiel um Platz 3 hän mr nüm unseri Leischtige vom Vordaag könne abruefe und gege «Ah nei sorry, dä Match isch annuliert worde» verlore. Somit hän mr de 4. Platz gholt und zum Trost an dr Siegerehrig no Marshmallows und Gummibärli abgsahnt. Nodyrlig hän mr no s'hochspannende Spiel um Platz 3 vo unserne Schutter verfolgt und s'Clique-Grümpeli 2023 gmeinsam ussklinge loo.
Öb s'Adjektiv «schutter» jetzt e Synonym oder e Antonym vo «schitter» isch, oder s'eint vilicht au gar nüt mit em ander z'due het, könnet ihr noch däm Bricht hoffentlig sälber entscheide. Wenn nit, denn kömmets euch doch nögscht Joor eifach ko aaluege!