Ich mergg grad, das isch noch 2021 und 2022 dr dritti Bricht in Folg, wo ich zue däm Aaloss schrib… ich hoff, liebi Läser:inne, ihr haltets nomol uss mit mir!
An dr Dambuuresitzig Ändi April isch d'Froog uffko, wär dr diesjöörigi Dambuureblausch wott organisiere. Do noch dere Froog e unaagnähmi Rueh gherrscht het, het dr früsch gwählti Dambuurechef verroote, dass är «susch e Idee» hätti. Anschyynend hets in dr Zwüschezyt keini bessere Idee gäh; Aafang Juni isch d'Yyladig ko und mir hän uns am Donnschtig, 29. Juni uff die halb 7i an dr Tramhaltstell Niederholzbode z'Rieche troffe. Rund 15 Dambuure hän sich pünggtlig versammlet, bis denn am 20 vor au mol de Chef aaspaziert ko isch, zum uns durs Gstrüpp in sy Schrebergarte z'füehre. Die paar Naase, wo kli spööter yytrudlet sin, het är denn ebefalls högschtpersönlig am Yygang abgholt.
S'isch alles wunderbar vorbereitet gsy, s'Bier kalt (oder eher liicht küehl) gstellt, Feschtbängg sin gstande und de Grill isch parat gsy zum aafüüre. Obwohl ich do doch no kurz wott aamergge, dass är mir, noch mehrfache Noochfroge vo miner Syte und entsprächende «nei ich ha glaub alles» als Antwort), am 10 vor 6i doch no gschriebe ka het, öbi no Brot und Ketchup könnt mitbringe – genau in däm Momänt, woni mit mine Joggeliwürscht (wo die woore Fans halt au in dr Summerpause ässe) uss em Coop usegloffe bi! Mi hän denn gfühlt au alli druf aagsproche, wieso ich so vill Brot debi ha, aber bis uf eins isch sowyt ich weiss tatsächlig alles wäg koo. Die im Mail versprocheni Dartschyybe hani zwar nit könne entdecke, aber trotzdäm isch däm glatte Oobe nüt im Wäg gstande.
Noch ere kurze Aasproch, wie mr uns z'benäh hän, isch dr Grill aagfüürt worde und mr sin gmüetlig zum Ässe zämmeghoggt (obwohl gwüssi ufgrund vo ihrem überdimensionale Grillguet kli länger hän müese warte). Glychzytig sin einigi vo uns au vo de Mugge ufgfrässe worde, und näbebi hän sich anderi an liicht schräge Pingpongtisch mit em z'hooche Netz gwogt. D'Reparaturversüech sin mässig erfolgryych gsy, aber de Spass hets nit gminderet.
Zum uns denn vo dene Viecher z'schütze, hän mr d'Füürschale aagworfe und sin no gmüetlig bis noch Mitternacht dört ghoggt. Abgseh vo eim, wo ständig hii und här gwuslet isch, Holz nochegleggt het, drfyr gsorgt het, dass alli immer gnue z'trinke hän und fascht eigehändig alles wider uffgruumt het – dangge Sven fyr d'Organisation vo eme glungene Oobe!
