Mr starte mitem sehr (unnötig?) detaillierte Bricht. Für die, wo weniger Zyt hänn, folgt am Schluss d Kurzfassig. Zum nit spoilere, isch die abr ebbe no e paar Scrolls ewägg.
Am Samschdig het sich uns d Ufgob gstellt, ussere 4er Gruppe in d Top 2 zko. Well mr gwüsst hänn, doss mindschdens eine vo de Gegner stargg isch, hämmr däm Starttag weniger entspannt entgege bliggt als au scho. Ebefalls vrunsicheret het uns d Tatsach, doss d «Bierfront Santihans» unsere Lieblingsgägner und zueverlässige Punkteliferant mit gfühlt 100 Diräggdduell über die letschte 3 Grimpeli nümm uf dr Teamliste zfinde gsi isch. Si hänn dr Sprung in Plausch gwogt.
Im erste Match simmr uf d Gritte troffe, die hänn im Vorjohr no Forfait gä, dissjohr sinn si tatsächlig am 12i uf dr Matte gstande. Es isch abr schnäll klar worde, doss es sone 3:0 Forfait für si eher sehr schmeichelhaft wär. Am Schluss isch 9:0 gstande, Chance wäre au umme gsi für viil meh Goal. Als Goalschütze hänn sich uszeichnet, dr Sven dreifach, und je zwei Moll dr Simon, Alain und Raphael (Banzhaf, langjährige Gastspiler vodr AGB). Dr Vrfasser vom Bricht wodd do transparänt mache, doss är sich die Liste fyr eimoll nit in Realzyt het mögge mergge, und das nachem Spil erfrogt het.
Als nögschds ischs zur Neuuflag vom 22er Final gege d Vogese Rueche ko. Well mr kadermässig bits ufgstoggt hänn, hämmr uns durchus Chance fyre Revanche usgrächnet. Im erwartet umkämpfte Spil het uns dr Simon miteme Geistesblitz in Fiehrig brocht, während d Rueche mit ihrne Chance an sich selber so wie an paar ASTRAine Parade gschiteret und vrzwiflet sin. So het das tatsächlich klappt mitem 1:0 Sieg.
Trotz gueter Usgangslag simmr vorem letschte Spiil gege «Hart aber fair» noni sichr gsi. Gross isch au d Freud nit gsi, womr gmerggt hänn, doss das e 2. Team vo de Gülleschlüch isch. Imene eher ereignisarme Spil hänn uns dr Luis und dr Sven aber zumene 2:0 Sieg gschosse, so doss mr unseri Gruppe gar gwunne hänn.
Die 3. Halbzyt isch Moll widr die längsti vom Samschdig worde, nur leider kanni mi do an weniger Details bsinne. Jedefalls hämmr s Portemonnaie vodr organisiererende Seibi tatkräftig unterstützt und unsre Gastspiler isch aschliessend au Gastgäber worde – vodr After Party uf sinere Dachterrasse. Die After Party isch aber eigentligg scho viil ender dr Afang vom Uskatere worde. Für die ganzy 3. Halbzyt hänn mir Ungmischte uns mit de Gmischte gmischt. E Mischt isch das definitiv nit.
Danggbar as es widrum erst am 12i losgoht, simmr am Sunntig Morge immrno mit allne 8 Spiler parat gstande. D Schnoggekicker hänn kei richtigi Bedrohig dargstellt. Dr Simon het uns frieh in Fiehrig brocht. Dr Christoph isch nacheme abgfangene Ball selber bis and Mitti gloffe und het vo dört dr (nit all zu starggi) Goalie bezwunge. Nachdäm no e gegnerische Vrteidiger e totale Hirnfurz gha het und e Ball im Strofruum mit dä Händ blockiert, het dr Simon vom Penaltypunkt zum 3:0 Endstand troffe.
D AS Koma vo de Naarebaschi het sich schinbar am Voroobe nit ins Komma gsoffe und au einiges an Gegewehr gleistet. Zum Glügg het dr Pascal ändlich si Goalscham abgleggt. Si lupereine Hattrick so wie dr eimoll meh suberi Kaste gänn in Summe e witere 3:0 Sieg. Au d Zwüscherundi hämmr also als Gruppesieger abgschlosse.
Im Halbfinal het sich de Vogese Rueche d Chance zur Revanche vodr Revanche botte. Obwohl mir das Spiil übr wiiti Strecke gfühlt meh im Griff gha hänn als no indr Gruppe, hänn si uns mit zwei tolle Agriff unsri erste beide Gegegoal bigfiegt. Sälber het uns in däm Spil, me mags kum glaube, jeglichs Ziilwasser gfählt, somit simmr mit 0:2 usgschide. Im Wüsse, doss es im Final gege d Gasse Glopfer (wär isch das und was mache die amene Glygge Grimpeli? Ich weiss es nit) fast unmöglich worde wär, an grosse Pokal zko, hämmr die relativ vrmidbari Halbfinal Nidrlag doch besser könne vrdaue als dr eint odr die andr s Bier vom Vortag.
Im Bronzespiel ischs zumene witere Rückspiel ko, nämmli gege d AS Koma, wommr jo gfühlt im Griff gha hänn. Nacheme friehne 1:0 dure Sven sinn d Bei zuenähmend schwärer worde, und mir hänn uns gar miteme 1:2 Rückstand konfrontiert gseh. Kurz vor knapp het dr Pascal gege si Lieblingsgegner dr wichtig Usglich erzielt. Indr vom Schiedsrichter handgstoppte Nochspilzyt isch gar no e Befreyigsschlag vom Christoph andr Latteunterkante glandet, und denn gönn d Meinige ussenandr. Einigi Spiler und Fans hänn «Goal» gschraue, dr Schiedsrichter het abr miteme 2:2 Endstand zum Penaltyschiesse bätte. Letschtlich hämmr au miesse iseh, doss e Glygge Grimpeli ohni Penaltyschiesse jo kei Glygge Grimpeli wär, und uns dere Challenge gstellt. Ohni doss mr hätte miesse Münze wärfe, het uns dr Schiedsrichter dr Vorteil (gemäss Statistik) vom 1. Schuss gä. Däre Ufgob het sich dr Simon, wo als einzige scho e Penalty gschosse het an däm Wuchenänd, agno – leider ohni Erfolg. Dr ersti Komatösi het s Resultatblatt eröffnet, d ASTRAthiker sinn unter Drugg ko. Dä Drugg het dr Luis schinbar nit gross gspürt und d Familiebilanz widr usgliche. Dr zweiti Komatösi het d Chance gha, erneut vorzlegge, het sim Name abr meh Ehr gmacht und si Flachschuss vom Christoph pariert gseht. Wuchtig het dr Sven uns s erst Moll in Fiehrig brocht. Grosse Drugg uffem 3. Komatöse, är isch abr cool blibe. Somit hämmr ind Vrlängerig vodr Vrlängerig miesse. Nach dr Familie Keller hämmr au dr Familie Zaugg nomoll s Vrtraue gä. E bits hämmr miesse zittere, letschlich isch em Pascal si Flachschuss abr zu präzis gsi, und em Goalie sini Fingerspitze hänn kei entscheidende Schade agrichtet. Erneut Druck uf de Komatöse. Ihre 4. Schütz isch denn, wenni das in aller nit vorhandene Bescheidheit so sage darf, nit am Druck sondern viil meh annere sensationelle Parade gschiteret. I has mr nit könne vrkniffe, dr Ruedi nachhär au um Existänz vom Bildbewis zfroge. Uf Video seht das irgendwie nümm ganz so spektakulär us, hey abr wenn ihr in ächt drbi gsi wäred…
Jedefalls isch das dr würdigi Schlusspunkt unter e witeri erfolgrichi Pokaljagd – zum 4. Moll in Serie – gsi. Au wenns no grösseri Pokal z erträume gäbt, dörfe mer uf das Resultat stolz si. D Konkurränz schloft leider nit, und mir, wo in exakt identischer Bsetzig vor 5 Johr no ganz gross abgruumt hänn, wärde halt au nit jünger.
Wär sinn mir überhaupt? 7 vo 8 Näme händ ihr durch Einzelerwähnige scho im Bricht gläse. Eine hets leider eimoll meh durch aktivi Goalvrvweirig nit gschafft. Well är abr fürs historische Wachstum vo däm Team im Spezielle und unserer Glygge im Allgemeine enorm wichtig isch, präsentier ich (ohni Drummelwirbel, do würer mi grat scho widr vrbessere) unsers 8. Teammitglied: dr Fabian.
Au am Sunntig hämmr uns zu de Siger vo dr 3. Halbzyt kürt. Zum Glügg het das nit ganz so viil Usduur brucht.
Und jetzt die vrsprocheni Kurzfassig: Nach de Räng 1 (2018) 2 (2019) und 2 (2022) hämmr uns dissjohr Rang 3 könne sichere. Das isch insofärn positiv, als dass mir unsere Medaillesatz uf Stuefe «Schutter» kompletiert hänn, und well jetzt e witere Pokal im Käller vom Wettsati-Schuelhuus ka Staub asetze. Au darf me sage, doss dr rangmässigi Rückschritt eher an stärkerer Konkurränz als an schwindender Eigeleistig liggt. Insgesamt hämmr in 7 Mätch 20 Goal gschosse und 4 kassiert. Teamintärn teile sich dr Sven und dr Simon mit je 5 Träffer d Top Scorer Krone. Mit unserer Bilanz vo 5 Spil zu 0 könne nitemoll d Turniersieger, d Gasse Glopfer, mithalte.
Gschribe mit wenig Abstand zur 3. Halbzyt vom Team Captain, Christoph