Kür für d Pfeffern vom Joor
D Pascale als Pfyffere vom Joor 2022-2023 het uff d Insle zwüschem Stausee und dr Schleuse Birsfälde zem e Boodegelaage yyglaade. Under dr Mithilff vo dr Sara isch, wo me yydroffe isch, uff ere groosse Wulledeggi s Buffet und uffeme Rolli d Gedrängg in ere Kielkischte barat gstande. Die feschtere und ältere Joorgäng sinn uff de mitbroochte Stiel und die jüngere, wo no d Bai könne verschrängge, am Boode uff Wulledeggine gsässe. Bis alli yydroffe sinn het me gapérölet No em Apéro het d Pascale s ryychhaltige Buffet eröffnet. S Ässe hänn d Dailnämmer und d Gedrängg het d Pascale offeriert.
Drmit me dr näggscht Joorgang vo dr PfyfferIn vom Joor het könne uusspiile, sinn drei Fäälder mit em Holzglötzlispiil KUBB vo dr Pascale uffgstellt woorde. Alli PfyfferIne hänn gebuurtsdaagsmässig miesse aanestoo und uff säggs nummeriere. So sinn säggs 3-er Team entstande. Derno het s Klötzli ewääg schiesse aagfange. Me het do verschiideni möögligi und unmöögligi Wuurfstiil könne gsee. Schlussändlig hänn alli an s Ziil gfiert. Em Schlussgang bi ych als letschtjeerigi Finalischtin gege d Vera unterläääge und drum unter Byyfall zer Pfyfferin vom Joor 2023-2024 uffgstiige. D Vera isch seer erlyychderet gsi! Als Bryys het d Pascale mir Fründschafftketteli mit de Pfyffernämme druff übergää. Die het d Jessica zämme baschdlet. Uusglunge isch dä Oobe mit em plündere vom Dessertbuffet. Laider het dr Däni uff sy Kaffi miesse verzichte!
Zem Schluss mööcht ych myner Voorgängere Pascale für dä schööni und ooriginelli Pfyfferblausch im Namme vo alle Bedailigte rächt häärzlig dangge.
Basel, 30. Juni 2023
Yvonne Hintermann
