Nach me aasträngende Velo-Stamm über Stock und Stei und me lehrriche zweite Summerstamm z Fuess durch d Stadt, isch für d Wettstai bim dritte Stamm die verdienti Erhoolig aagstande und zwar nit uf em Feschtland, sondern uf em Babbe Rhy, gnauer uf em Rhystärn. Bi Bier, Wysswyy, Fischknusperli und feine Burger hän mir s Läbe gnosse und sin bi beschtem Wätter Rhy uff und ab gfaare und das öbbe je drei Mol. Dank dr Sara und dr Pascale hän mir zudäm e super Plätzli uf em Heckboard ka, wo mir praktisch ungstört gsi und beschtens serviert worde sin. Obe uf em Dach isch zu glicher Zyt d Poscht abgange. S het nämlich e DJ ufgleggt und s isch als wie me tanzt worde. Dr eini oder die anderi Wettstainlemer/e het sich zwüschedure ufegwogt, e Cocktail bstellt, e schüche Blick uf s Partyvolk gworfe und isch denn wider d Stääge abe zottlet zum d Rueh go gniesse. Die het aber immer nur so lang aghebt, bis mir unter ere Brugg duregfahre sin, do het denn s Partyvolk amigs bsunders wild do und sogar gschraue, e so öbbis aber au….! Am 10i isch denn für alli wider Schluss gsi. S Partyvolk wie au d Wettstai hän bi dr Schiffländi wider miesse usstiege. Und während die Tanzluschtige richtig Heime zoge sin, isch e Hampfle Wettstainlemer/e no Schlummi im Stadtkäller go trinke. Getreu em Motto: Mir könnes nit besser, aber länger. An dere Stell nomol e grosses Danggschön an d Pascale und vor allem an d Sara für d Organisation. Schön isch es gsi!
