E glungeni Idee und guet organisiert hänn unseri Neuvoordrääbler Daniela, Fabienne und Megan dä Wettstai Race uff em Freilaagerblatz z Münchestai. Die glungene Rennmaschiine hänn sii zämmegsammlet und zer Verfiegig gstellt.
D Finaaldailnämmer hänn sich in drei Rennkategorie könne qualifiziere. Zwai Renne sinn ganz speziell gsi und hänn d Lachmusggle vo de Zueschauer stargg beaasprucht. By de Raadloose hett me verschiideni Nutzigsaarte inkl. Hächtrolle z gsee bikoo.
By de gmischte Faarzüüg isch dr Schnitzgge mit sym Döffli kuum vorwärts ko. Entwäder hett s Hinderraad e blatte kaa oder es isch am Übergwicht glääge. Das Raad hett zer allgemeine Beluschtigung aifach nit well draie.
So hänn in de Finääl jewyyle die drei Beschtblazierte vo iirer Kategorie döörfe staarte. By de Raadloose hett d Sara im e Fotifinish dr Kevin und dr Fabian gschlaage.
By de Trottinettler hett sich kuurz voor em Zyyl dr Sven verstüürt. So hett dr Felix an iim verbyy, als erschte Zyyllinie könne überfaare. Dr Oldie Peter isch als Dritte gmächlig zer Boxegass yynegrollt.
By dr sogenannte Köönigsglass isch d Xenia mit iirem Schuufelbagger dr Marta und Isabelle ganz schöön um d Oore gfaare. An alli drei Kategoriesieger/inne hett d Megan d Bryyse unter groossem Applaus übergää.
Im Gnussegge hett me sich könne mit „Flammeküeche, ämel" und Gedrängg yydegge, sodass by däre Summerhitz dr Kalorieuustusch hett könne funggziooniere.
Dr Daniela, Fabienne und Megan e ganz e groosses Danggerscheen für s organisiere.
Dr diggi Pfyffer