Es git e guete und e schlächte Virus. Das Joor hett dr Coronavirus dr Fasnachtsvirus, wo uns allewyyl all Joor wiider aasteggt, mit voller Wucht droffe, schoggiert, druurig gmacht und aifach numme fescht wee do. Die ganzi Vorfreud isch uff ai Schlaag aifach wie Drägg ewäg … ewäg gsi. Dangg em schnälle handle vom Vorstand hänn mr denn doch no d Gläägehait ka e weeneli d Frau Fasnacht zgspyyre und is an folgende Eggpünggt feschtghalte:
Dr Samschtig, 29. Hornig 2020, ab 15.30h, Dräffpunggt MUBA Halle 5 zer Waagevernissage vo de Ammedysli. No Absprooch mit de Ammedysli freue sii sich uff unseri Unterstützig an iirem Waageruggbau.
Was do für uff e Waage vo de Amedmedsli alles an Material zem Verdaile barat stoot.
D Ammedysli hänn d Gescht vo dr Vernissage groosszügig verpflägt.
Derno hett dr Pius dr Calvados aagsait.
Dr Ammedysli-Obmaa Roger hett sich by syne Glyggekollege für die groossi Arbet bym Waagebau bedanggt. Es isch e wunderschööns Läggerlihuus woorde. Denn hett är s Sujet und s Goschdyym vorgstellt sowie dr Zeedel vorglääse.
Do no e baar Detail vom Waage und zem Abschluss dr Wettstaimarsch. Wenigschtens hett s e bitzeli fasnaächtlig döönt.
Dr Sunntig, 01. Meerze 2020, ab 17.30h, Dräffpunggt im Hinterhoof vom Waisehuus zer Ladäärnevernissage, um die unmussigkalisch wiider zruggzbaue. D Määlsuppe und Gedrängg stöön parat.
Dr Walk dur e Hoof und d Kuchi zem Apéro bym Pulverduurm. S isch alles anderscht!
D Erschtling vom Stamm hänn dratizioonell de Aawäsende d Määlsuppe serviert und dr Apéro gredänzt. S isch e hervorragend feyni Määlsuppe gsi, wo is dr „Schänni" vom Alterszentrum Birsfälde kocht hett. S hett glaub alle Aawäsende gschmeggt.
Denn sinn vom Pius d Ladäärnemooler vorgstellt woorde.
Für d Knorzi Ladäärne sinn das d Vera Oertli, dr Pascal Zaugg und dr Fabian Schneider.
Vorgstellt hett d Knorzi-Ladäärne dr Fabian. Laider hett dr Wind mänggmool ganz fescht in syni Reed yynebloose.
Dä Dail vo dr Ladäärne sinn vo dr Vera gmoolt woorde.
Dä Dail vo dr Ladäärne sinn vom Pascal gmoolt woorde.
Dä Dail vo dr Ladäärne sinn vom Fabian gmoolt woorde.
Denn isch dr Schlutti dra ko zem d Ladäärne vo dr „Neyi Alti Garde" vorzstelle.
Zem Abschluss hett dr Karli Merz d Ladäärne vom Stamm vorgstellt.
S Schluss Woort hett wiider dr Obmaa Pius
Dr Morgestraich, 02. Meerze 2020, 04.00h, Dr Morgestraich hett uff verschiideni Aarte und an verschiidene Oort stattgfunde. Zerscht dä für die wo im Bett liige blyybe sinn. Allerdings isch das Schyssdräggziigli scho am z Basel.
Geniaal isch dä im Glaibasel am Schoofgässli gsi. Do isch e wunderbari Nische gfunde woorde. Lueget gnau aane und suechet die zwai nit unbekannte Kopfladäärnli.
An dr Yysegass hänn sich e baar Wettstainlemer droffe uns sinn yygstande.
Me isch innerlig still, nochdängglig, druurig mit Keerzli und Ladäärnli in dr Hand, aber au mit ere glunge komische und aagspannte Stimmig do gstande und hett uff e Vierischlaag gwaartet. Kai Liecht isch abgange, kai Dambuurmaijoor hett dr Morgestraich aagsait bivor sich das glaine Hüffeli Wettstainlemer in Richtig Määrtblatz in Bewegig gsetzt hett.
Muusigkalisch hetts nit döönt wie sunscht! In dr Freie hetts mit Summe vom z Basel am Rhy aagfange, um sich denn mit dr Retraite, mit eme perfeggte Drummelsollo vom Pascal, Richtig Strytgass und Wyssi Gass z staigere. An dr Schnabelgass hänn sich die Erschte wiider Richtig Kopfküssi gmacht.
Dr Mäntig, 2. Meere, 18.00 h
Im Stadtkäller bym Apéro hesch by däre Druggede nit gmerggt, dass kai Fasnacht isch. Allerdings hänn d Goschdyym gfäält oder doch nit? Dr Gigio und dr Schlutti sinn mit iire spezielle Antivirusmassge doch e weenli als „Maschgere" uffgfalle. Es isch hoch zuegange und männg Bier hett miesse bym Fruscht aabe-spiele dra glaube.
Denn hetts yystoo ghaisse und die ganzi Glygge isch voor em Stadtkäller yygstande. Dr Adrian hett d Retraite aagsait und so sinn mr gschlosse mit em Mundwäärgg intonierend bis zem Bruune Mutz dur d Gasse zooge.
Im 1.Stogg vom Mutz hänn mr Znacht gässe.
Dr Absagger hänn die Maischte bis zem Liechterlösche in dr Rio Bar gnosse. Döört sinn mr no vo de Knorzi überrascht woorde, wo vom Nachtässe im Mc Donalds, mit em Arabi singend yynekoo sinn.
Dr Zyschtig, 3. Meerze
Isch vom Digge Pfyffer uusgloo woorde.
Dr Mittwuch, 4. Meerze, 18.00h
Dr Mittwuch im Mutz isch e weeneli heggtisch woorde, will mr scho am achti Zoobe hänn miesse für die näggschte Blatz mache.
Mit Umwääge über s Weschtplateau mit Albi und so, isch unseri Gruppe wiider in Daalsoole zer Rio Bar aabe. Im Verlauff vom Oobe sinn allewyyl mee Wettstainlemer yygloffe, so dass d Rio zem Glyggekäller woorde isch.
Dr Sunntig, 22. Meerze, de Haim
Em Obmaa Pius sy Uusaag an dr Laddärnevernissage isch nit woor woorde. Unser „z Basel am mym Rhy", nai s ganze Land und die Kuugele, wo dr Pascal uff d Knorziladäärne gmoolt hett, isch aabegfaare woorde. Mir „Alte Halt" sotte nümme uuse. Wie sich doch in däre kuurze Zyt syt dr Zuugsdailnämmersitzig unser Lääbe gwaltig veränderet hett.
All daas wo jetzt vo uns Allne verlangt wiird, schyynt Vernümpftig z syy! Drum isch au dä Bummelsunntig zer Nääbesach woorde. Liebi Wettstainlemer händ soorg, blyybet gsund und hoffentlig bis bald.
Obmaa kasch wiider übernää. S goot allwääg länger bis zer Gee Vau??? dr Diggi Pfyffer