E langi Reis het uns erwartet, eimol vom scheene Basel us um die ganzi Wält. Scho vor em Check-In isch klar gsi, es wird nit ohni Turbulänze vrlaufe. Am Check-In Schalter sin mr vo zwei japanische Oertlis empfange worde, wo uns dr Boardingpass in d Händ übergäh hän. Dä isch nit wichtig gsi fürs Boarding sondern fürs Ässe, aber dezue spöter mehr. Dr Flug isch denn pünktlich mitere Sicherheitsinstruktion samt em Pilot gstartet. Unseri ersti Landig isch im heisse Indie gsi, wo mir vo glaine Stärnsinger begriesst worde sind. Sie hän Gäld gsammelt für es Hilfsprojäkt in Indie. Dr Dag isch nonig vrbi gsi und scho sin mr witergfloge uf Arabie. Ganz getreu em Landesname, isch uns vom Zähniclub dr Arabi in Begleitig vomene Keyboard vorgspiilt worde. Druf abe hän uns d Binggis s Hänschen Klein vorpfyffe. Drnoch hän mr nomol dörfe dr Arabi gniesse, dasmol vortreit vo de Knorzi. Wohlvrdient hän mr in Griecheland e Zwüschelandig gmacht, wo uns die klassischi Spezialität, dr Griechischi Salat, serviert worde isch. Im Aschluss isch es ganz amazing worde, wo d Silberfüchs «Amazing Grace» zum Beschde gä hän. Um uns für die witeri Reis nomol e koffeinfreie Energiekick z gäh, isch uns vo de Knorzi d Daagwacht vordrummelt worde. «God Save the Queen» hets als nächsts gheisse. Die glaine Zauberlehrling vo Hogwarts hän uns denn d Titelmelodie vom Harry Potter vorpfyffe. Drufabe hän e paar motivierti Pfyffer dr Colonol Boogey March ufgfiert. Vo Ängland diräggt uf Dütschland wo e Drummelgruppe dr schweri Puperniggel grandios drummlet hän. Mir sin in Europa bliibe und witer uf Italie gflooge, ins Land vo de Daigwaare. Nume die ohni Boardingpass sind leider nit vrköstigt worde. Wells so amazing gsi isch, hän d Silberfüchs mit em La Paloma e Zuegab gäh. Dr nächsti Uftritt vom Bruno Reimann in Begleitig vo Oertlis und Co. mit em Lied Engel vo Rammstein, isch so nooch am Original gsi, dass em Grösse sy Video het miese wäge Copyrightvrletzig vo Youtube glöscht wärde. Nachdäm Uftritt hän mr e Calvados brucht zum verdaue, är isch vo de Pfiffer vom Stamm in sinere ursprüngliche Form vortreit worde. Mir sin grat in dr Normandie bliibe und hän uns e feins Schoggimuus gönt. D Reis isch langsam em Änd zuegange und mir sind zrugg in die scheeny Schwiiz. Dasmol sind d Silberfüchs mit dr Unterstützig vo de Popeye ufträte. Zrugg in Basel het dr Grien Blätzli e Hommage an Fasnachtszystig ghalte. Dr ganz Obe isch vom Stamm mit em Ohremyggeli und em Wettstai Marsch inklusiv de Knorzi abgrundet worde. Dangge an dere Stell ans OK Jessica, Yael und Fabian.
