Dambuure-Ässe

E Highlight in dr Vorfasnachtszyt vo jedem Wettstai-Dambuur isch s alljöhrige Dambuure-Ässe.

Das findet traditionell statt amene Fritigoobe im Januar. Organisiert wirds vom amtierende «Dambuur des Jahres». Wär das isch und wiener (oder au sie) das worde isch, do drzue kömme mer no.

E gwüsse Rahme isch däm Oobe vorgä, aber hauptsächlich isch dr Kreativität vom Organisator kei Gränze gsetzt. Klassischerwiis bestoht dr Aaloss us drei offizielle, organisierte Dail, während hindeuuse au no meh möglich isch.

Me trifft sich am friehe Oobe zumene glaine Apéro zum e bits in Fahrt ko. Im Vrlauf vom Oobe wird irgendwenn zum Znacht übergange. Das ka am gliche Ort si wie dr Apéro, e Lokalitätswächsel isch aber au immr gärn gseh. Kulinarisch könne do ganz vrschideni Richtige igschlage wärde, so hämmer in de letschte Joore zum Bispil, Fondue, Asiatisch oder au Fleisch vom heisse Stei dörfe gniesse.

 E bsunders wichtige Dail vom Oobe – dä, wo d Kreativität vom Organisator am meiste gforderet isch – isch dr Wettbewärb, zum dr neui Dambuur des Jahres z küre. Do isch jetzt wirgglig alles möglich, so het dä Wettbewärb au kei feste Platz im Ablauf, är ka sowohl vor als au nonem Znacht stattfinde. Vrschideni Wettbewärb fordere vrschideni Aforderigsprofil zum Dambuur des Jahres wärde, so isch in jüngerer Vrgangeheit zum Bispil dä mitem breitiste Wüsse, die besti Zockerin, dr stärksti odr au dr besti Frauekenner kürt worde.

D‘ Ernennig vom neue Dambuur des Jahres isch nadyrli dr Höhepunkt vo däm Oobe. Mit däm Titel kunnt e grossi Ehr abr nadyrli au e Bürd. Einersits muess me sich andr Fasnacht vo jedem Dambuur e Bier loh zahle und glich no d Contenance bewahre, wo däm Amt aagmässe isch. Anderersits wird me zum Organisator vom nägschde Ässe e Joor spöter, und muess drfür sorge, dass s Dambuure-Ässe au im Joor druff als Highlight ka bezeichnet wärde.

Wenn alli verpflägt sin, und e Nochfolger kürt isch, het dr Dambuur des Jahres sini Bürd abglegt und är isch au nümm füre Räscht vom Oobe vrantwortlich. Abr nur well nüt meh organisiert isch, heisst das nadyrli nit, dass dr Oobe muess vrbi si. Getreu nachem Motto nüt muess, alles ka stürzt sich no fast jedes Joor e glains (oder grosses) Grüppli an Wettstainlemer, oft e bunti Mischig us allne Generatione, ins Basler Nachtläbe. Somit wäremer bim inoffizielle Dail vom Oobe, wo in sine Möglichkeite so divärs isch, dass do gar nit erst Bispil sölle gnennt wärde. Dr eint odr andr wür villicht sogar bhaupte, dass das dr wohri Höhepunkt vom Oobe (odr scho fast Morge?) darstellt…

Christoph (amtierendi Dambuur des Jahres)