Am 15. Oggdoober, e Daag vor em Niggi sym Nyynzigschte, isch e stattligi Aazaal Wettstainlemer mit Stäggeladäärne, Standarte und em Dambuurmajoor mit eme Schirm anstatt eme Stägge (me het sich drab gwunderet) mit em «Ryslaifer» vor em Räbhuus ygloffe.
Nodäm Marsch het dr Pius s Wort ergriffe und e baar, us dr Sicht vo dr Wettstai-Clique wichtige Stazione uus em Lääbe vom Niggi uffzellt. Allne isch klar, dass es ooni Niggi d Wettstai Clique nit wurd gä. Dr Matthias het den em Niggi fir d Yylaadig danggt, ihm syyni beschte Winsch vo allne Aawäsende wytergää und als Aadängge an dä Jubeldaag e scheene Helge, e Wettstai-Signet als Dambuurmajoor, gschänggt.
Denn isch der Niggi dra gsi, är het Danggscheen gsait fir dr Helge und as so vyyl Lyt koo sin. Mit de Wort „Dängg draa, die wysse Händsche drugge us, as es e Eer isch, dä Stägge z trage und e Dambuurmajoor zsyy" het är em Adrian syy „Stägge" und die wysse Händsche iibergää.
Mit ere kräftige, uns allne verdraute Stimm, het dr Niggi noonemool als Dambuurmajoor zum Schluss vom Jubiläumsständeli dr Wettstaimarsch aagsait, so dass es uns aifach numme no kalt dr Rugge abegloffe isch.
Liebe Niggi, mir hän mit Dir e wunderbare Oobe derfe erläbe und dangge Dir härzlig fir d Yylaadig und Bewirtig. Mir winsche Dir gueti Gsundhait und uns as der Kontaggt no lang wyterbestoht.