Fasnachtszyschtig Dail 2

Katzeneetli / schitterschde Zyschdigszyygli / Saitespränger

Katzeneetli

Was isch s scheenschde an dr Fasnacht? Klar, d Fasnacht het vyyli Höhepinggt! Abr sin mer doch ehrlig. Es git nyd scheeners, als s Gässle zoobe spoot – wenn me durch d Grossbasler Altstadt waggled, fäärn vo de grosse Druggede und nur no hii und doo e Schyssdräggziigli gryzt. Die bsundri Atmosphääre isch vor allem am Fasnachtszyschdig spyyrbar, wenn e jede so unterwägs isch wienr luschdig isch und s Duurenand perfäggt isch. In das wunderbare Duurenand stiirze sich sytt em 2018 au d Katzeneetli.

Die erschde Joore im Stamm hän mer dr Fasnachtszyschdig allewyyl bi de Schluggstiibler verbrocht (wie die Schyttere zu sällere Zyt no gheisse hän). Mr häns immer scheen gha abr mit dr Zyt isch dr Wunsch ufkoo, im glainere Grippli unterwägs z’syy und so hän mer ys denn entschiide uns abzspalte. E so sin im 2018 d Oertlis und s Noemie, quasi als Familieziigli, s erschd mol ellai zfimft uff d Gass. Wobyy so ganz ellai simr denn glyych nid gsi. Am frieh Zyschdigmoorge, wo die halbi Stadt meischdens no im Bett liggt, hän mer ys mit dr Blaue Garde fir die erschde Rundene droffe. Aaschliessend hämr dr erschd Waggis im Spärber gnosse, wie mer das scho immr gärn mit de Schluggstiibler gmacht hän. Au mit iine hän mer denn noon e Waggel gmacht, bevor mer denn tatsächlig unsri erschde Neetli ellai gspiilt hän.

Fir s Joor druf hän mer ys denn bassend zum Namme e Gosdym gnäit. Es isch nid grad e Mäischderlaischdig worde und doch simr sehr stolz druf gsi und hän ys gfreut, das an dr Fasnacht z’derfe präsentiere. In sällem Joor het sich au scho dr erschd Noochwuggs zuen ys gsellt und mr hän usserdäm noon e Vorträäblere mitgnoo, wo dä glai Gnopf im Wäägeli zooge het. Ufm Minschterblatz hets denn e Apero gää, wo mer in däm braggtische Wäägeli drby gha hän. Vor em Nachtässe hän mer ys denn noon e Fährifahrt gönnt – das isch immer heerlig während dr Fasnacht (und jedem z’empfääle, wo das nonie gmacht het). Iberhaupt straalt dr Rhyy e bsunderi Rueh us in däm Getümmel, so dass s Gässle näbehäär wunderscheen isch. 

Do mer erschd zwei Mool in däm Rahme hän kenne Fasnacht mache (wobi das au scho mee sin, wie andri Ziigli kenne vrzeichne), freue mer ys bsunders, wenn mer ändlig widr mitenand derfe Gässle.

Yael Rodemerk


S schitterschde Zyschdigszyygli vo dr Wettstai

Das mit dene Zyschdigszyygli in dr Wettstai Clique isch e Wüsseschaft für sich. Faschd jedi und jede isch in einem derby, bi einige isch es aber ame nid so klar, bi wem sie wenn ystöhn. Alli hän ihri eigene Traditione, e paar gits sit gfühlt immer und anderi hän sich erschd grad neu sortiert. Eins hän sie aber alli gmeinsam: Sie mache dr Fasnachtszyschdig zum schönschde vo allne Fasnachtsdääg.

Vor allem die jüngere Stammmitglieder bruche ame e Momänt, bis sie dr Durchblick durch dr Zyschdigszyygli- Jungle vo dr Wettstai hän. D 80er und 90er Kinder vo dr Wettstai sind den in den meischte Fäll bim buntischde Huffe, dä Schluggstübler glandet. Obwohl die wenigschte vo uns d Schluggstube schomole vo inne gseh hän, hämer halt eifach mol so gheisse. Im 2017 hämer den, bimene Gin Tonic, em inoffizielle Lieblingsgetränk vo däm Zyygli, beschlosse, dass es Zyt für e neue Name isch. Basisdemokratisch hämer unsere neue Name welle ussueche, schliesslich sölle sich alli mit em neue Name wohl fühle und en mit Stolz trage. Aber wie das halt so isch mit dr Demokratie… sie brucht ihri Zyt. E Joor spöter, am Fasnachtszyschdig 2018 hämer den jedi Pause (und vo dene mache mir bekanntlich einigi) dermit verbrocht, über e guede Name z diskutiere. Topvorschläg wie ‘d Fatzschnasehaggis’ oder ‘d Gin Tonic Syrpfler’ hämer den aber wieder verworfe. Zum Schluss isch no ei Name übrig blibe, e Name, wo dr Kärn vo unserem Grüppli so gued beschribt wie kei andere: die SCHITTERE.

Schitter sind nämlich nid nur unseri Musikalische Künschd nach 3 Gin Tonics, sondern au ganz viel luschdigi Erläbniss, wo mir scho hän zämme dörfe erläbe. Unseri erschdi Latäärne isch so schitter gsi (e leeri Petfläsche mit LED Lämpli drin), dass mer sie nach em erschde Isatz verlore hän. Mittlerwiele het unser Zyygli- Mami d Edith uns sogar e richtig Latäärne gmacht, mir chönes kumm erwarte sie an dr Fasnacht 2022 z präsentiere. Unseri Vorträbler, 4 wunderbari Persönlichkeite us em Fründeskreis vom Tobi, hän so schitteri Kostüm, sie mache sogar em Schlutti Konkuränz. 

Am Bummel 2018 hämer den alli ufeme schittere Zeddel unterschribe und unser Zyygli offiziell neugründet (mittlerwiele hämer au dä, schitter wie mer halt sind,verlore). Und jetzt chönemers chum erwarte, bis wieder e Fasnachtszyschdig chunt, wo mir, s schitterschde Zyschdigszyygi vo dr Wettstai, chöne zämme istoh. Bis dört hane nämemer no e Gin Tonic und freue uns uf d Fasnacht 2022!

Jessica Brandenburger


Syttespringer… Sytteschnyyder… Saifispänder…

alles hän mer scho gheert. Aber ains isch sicher: Mehr sin meh wien e Gugge!

D Saitespränger, s jingst Zyschdigsziigli vo dr Wettstai-Clique, vellicht au vo Basel, sin im 2019 vo vyyr junge und ambitionierte Wettstai Dambuure grindet worde.

Aagfange hets, ass vo däne vyyr Dambuure biz mehr und anders hän welle Drummle, wo sie bi de Dambuuregrubbe Popeye’s und de Schyttere gsi sind.

So ischs denn au ko, ass sie am Moorgestraich 2019, bim Harmonie-Halt aifach wytterzooge sind und das diräggt bis ins Glaibasel. Stadt-Kundigi wisse, dasch e rächte Rieme! Obwohl gege Ändi Kondition noochegloo het, hets numme so grötzt! Bim letschte Bierli isch denn dr Vorschlaag ko, doch sälber e jingeri Grubbe z grinde.

Das isch denn noon em Bummel au passiert. Binre Sitzig mit Bier und Pizza hän mer alles rund um die zuekimftige Fasnachtszyschdig besproche und au no e paar Mitgliider meh aagworbe. Somit sin mer syt 2019 also d Saitespränger und hän laider no kai Fasnacht gmacht.

Ainzig e Uffdritt bi dr Riechemer Fasnachtsmuusig und dr Wettstai-Oobe 2020 isch ys bis jetz bliibe um unser Könne und die rassige Gosdym z präsentiere. Falls das aber so wytter goot, wärde mer unser 5 Joores-Jubiläum ha, ohni e Fasnacht gmacht zha.. hajjj.

Hoffe mer, ass es bald besser wird und mer wieder loosleege kenne!

Zer Nostalgie und Zelebrierig do noon e paar Fotteli…

Kevin Rodemerk