D'Gschicht vo dr Ladärneuffbau-Wirtin
Sit mäng Joor bewirt ich am Samschtig vor dr Fasnacht d Crew vom Uffbau vo unserne Ladärne und em Requisit. Vieli vo euch wüsse gar nit wurum das so isch, drum mecht ich euch das gärn verzelle.
Vor mäng Joor ha ich dr Pius am Samschtigmorge vor dr Fasnacht in's Waisehuus begleitet. Är het dört bim Uffbau vo dr Ladärne gholfe und ich ha di Zyt gnutzt um no die letschte Ykäuf vor dr Fasnacht z mache. An aim vo däne Samschtigmorge het mi den dr Bappe Schürch selig gfrogt, ob ich ihm nit kennt Hälfe bim parat mache vom z'Nüni fir die fliessige Hälfer. Und so bi ich in die harti Schuel bim Pape Schürch ko und ha bi ihm glehrt uf was me muess luege und wie wichtig e guets z'Nüni isch. Näbem Zopf vo dr Bäckerei Brühlhart het's Wurscht, Käs, Confi, Angge und Kaffi oder Tee mit Schuss gäh. Es het mir so viel Spass gmacht und so ha ich vo den ewäg em Pape Schürch gholfe. Lang ischs här! Znüni gits immerno, mir sin in der Zwischezyt vom Waisehuus ins Wettstai-Schuelhuus und wieder zrugg züglet. Uf emene fasnächtlich dekorierte Tisch isch hyt s'Aagebot Sandwich vom Migros, sälbergmacht's Birchermüesli und Kaffi oder Orangensaft.
Dr gröschti Dangg fir mi isch, wenn alles usgässe und usdrunge isch und ich denn die fertige Ladärne und Requisit ka go bestunne.
