Tiriff tiff tiff! Tiriff tiff tiff! Dr Vogel Gryff het s Hemmli styff!

Hitt am 20. Jänner wär aigentlig dr heggscht Glaibasler Fyyrtig gsi, us aggtuelle Grind isch är jedoch  uff dr 24. Abrille verschoobe (hoffe mers zumindest…..).

Hitt wäre tuusigi Glai- (und me mungglet au Grossbasler), sowie e Huffe Wettstainlemer uff de Gasse unterwäggs gsi.

Hitt wäre d Ueli unterwäggs und wurde jede Batze sammle fir e guete Zwägg zum Wohl vom Glaibasel.

Hitt wäre die drei Ehrezeiche, dr Vogel Gryff, dr Leu und dr Willd Maa mit ihrne Beglaiter, Dambuure und Bannerherre durch d Gasse gsegglet um verdanggenswärte Lytt d Ehr z erwyyse.

Hitt wäre die rund 450 Gsellschaftsbrieder vo de Ehregsellschafte vom Glaibasel mit Gäscht bim traditionelle Gryffemähli yykehrt und hätte d Reede derfe loose. 

Aber ebe – es blybt vorerst bim wäre, wurde und hätte.

Aber worum aigentlig het dr Vogel Gryff s Hemmli styff und wieso liisisch du das jetzt uf dr Wettstaisyte?!

Es isch ganz aifach: D‘ Wettstai het ainiges mit däm Bruuchtuum zdue!

D Wettstai-Clique sälber isch insofärn mit em Vogel Gryff verbunde, ass unsere ehrewärte Glyggegrinder Niggi Schoellkopf scho syt Joorzäänte Gsellschaftsbrueder und vo 1985 bis 2000 sogar Maischter vo dr Ehregsellschaft zem Räbhuus gsi isch. Au sin ainigi anderi Aggtyyvmitgliider vo dr Glygge au no in de E. Gsellschafte verdailt.

Das isch aber nit alles, was ys verbindet!

Us dr Gschicht uuse wisse mir, ass dr Vogel Gryff Bruuch mitti 18. Joorhundert fascht wäge Heidnerei vellig verbotte worde wär, will dr Dänzer vom Leu im Goschdym verstorben isch. Nur dangg em Johann Jacob Spreng, dr sällmooligi Waisehuuspfaff, het dr Vogel Gryff nooch fimf Joor Unterbruch wieder uff d Gass derfe. Us däm Grund sin die 3E uff ewigs danggbar und halten allewyyl e Halt im Waisehuus, wo sie em Waisehuusvater und de Kinder e Danz widme und au ain vom Waisehuusspiil entgegenää derfe.

D Wettstai-Clique isch in genau sällem Waisehuus syt langer Zytt dihaim. Näbe joorelangem Asyyl im sogenannte Kischtli zem Ladäärnemoole, sin nämmli dert e paar Grinderbuebe uffgwaggse und anderi hän im glyyche (Wettstai-)Gwartier gwohnt. Das isch au dr Grund gsi fir dr Glyggenamme Wettstai-Clique.

Wenn me in de diefe Wettstai-Archiv goot go graabe, findet me aber no wytteri Schätz wo d Verbindig bestätige (dangge Fabian!).

Anno 1964 het dr Stamm s Sujet usgspiilt “dr unehrehaft Kaffi-Spitz-Usverkauf, wo s Spiil und alles rund um s sällmoolig Kaffi-Spitz im Zug präsentiert worden isch.

Wytter goots nur e paar Joor speeter im 1987, wo d Christoph Merian Stiftig s Kaffi-Spitz het drvor kenne bewahre fir s Rotliecht Milieu verwändet z wärde. Au do hets 3E-Spiil, d‘ Ueli etc. nadirlig nit derfe fähle in dr Sujetusspiilig.

Abr au ohni Kaffi-Spitz Probleem und ohni Theme beziiglig 3E het d Wettstai-Clique s gschafft d Dier vom 3E-Spiil in Ihres Sujet yyzbaue. So passiert im 1991, wo sie 60 Joor Niggi – 40 Joor Dambuuremajor gfyyrt und usgspiilt hän und Abbilder vo de Dier im Vordraab mitgloffe sin.

Ze gueter Letscht ischs denn drzue koo, ass dr Wettstai-Stamm im 2013 s Glaibasel in 3D – Diirne, Drägg und Droggedyyler usgspiilt het uffgrund vom hoche Vorkomme vo däne 3D im Glaibasel. Dr Zug isch uffdailt gsi in 3E-Spiil vor dr Ladäärne und mit 3D-Spiil hinter dr Ladäärne. E glungeni Fasnacht ischs gsi, do dr Schryybendi sicher drvo ka brichte.

So zieht sich dä verbindendi Faade durch d Zytt und wird no wytterhin lang erhalte blyybe, solangs dr Vogel Gryff und d Wettstai-Clique gää wird.

Jä ebe, aber worum isch denn aber das Hemmli vom Vogel Gryff styff?
Das weiss nur dä wo s Hemmli glettet. 

Es gRUESST mit glaibasler Griess: dr Drummelhundbizwienejunggardischt

Autore Gruess an alli Kindergärtner, Lehrer und die, wos no wärde wänn: Bitte bringet de Gnäggis s Vogel Gryff Lied wieder byy! Am Vogel Gryff 2019 hets e kaine kenne singe am Horst.

Do dr Täggscht drzue (me derf en au Usdrugge und mit in d Schuel nää:-))

Was glepft? E Schuss! Was mag das sy?
Dert danzt jo aine uff em Rhy.
E Dannebaimli schwingt er
und ains-zwai-drei verdringgt er.

Nai, nai, das gfallt im Wilde Maa.
D’ Kanone gracht. Jetzt kunnt er a.
E-n-Ueli bättlet Batze
Der Lai winggt mit de Datze.

Bim Käppelijoch gumpt stolz und styff
näbem Wilde Maa und Lai der Gryff,
und dausig Basler lache
Ab däne-n-alte Sache.