Am Donnschtig, 25. Juli 2019 hett me döörfe uff e Margreetehügel styyge und das am e haisse Summeroobe. Dr Grund für dä schwaissdryybendi Uffstiig in s Sunnebaad isch gsi, dass allewyyl die mit eme graade Gebuurtsdaag ze däm scho dradizioonelle Jubilaare- Aaloss yylaade.
D Glygge hett ze Eere vo de Yylaadende e Ständeli brocht. Dr Thomas Schürch hett dr Yankee aagsait.
Denn hett dr Obmaa Pius folgende Jubilaare döörfe gratuliere und für d Yylaadig dangge:
dr Melina, dr Nora, dr Tanja, dr Isabelle, dr Bea, dr Claudia, em Andi, em Kurt, em Schnitzgge, em Thomas und em Fredi.
Dr Thomas Schürch hett zer entsprächende Persoon bassend e Wettstaibasilisgg gmoolt und die zämme mit em Pius de Jubilaare übergää.
Zem Abschluss vom Ständeli isch no dr Wettstaimarsch zelebriert woorde.
D Jubilaare hänn d Gedrängg sowie e Salat- und Dessertbuffet offeriert. Für s sälber mitbrochte vom Metzger sinn Grill zer Verfiegig gstande, wo me, je no Gusto sy Schwyyns-, Kalbs-, Rinds-, Lamm-, -blätzli, -schnitzel, -ragg, -wurscht und au vegetarischs wie Maiskolbe, Peperoni oder Aubergine, hett könne bröötle.
Die wo z haiss und d Baadglaider derbyy kaa hänn, sinn zwüsche duure im Bassin go sich abkiele. So isch e gsellige und luschtige Oobe mit eme ganz grooosse Dangg und Glüggwuntsch zem ruunde Gebuurtsdaag an d Jubilaare vo dr MS Wettstai z Änd gange.
Geschriebe vom Digge Pfyffer