All ander Joor im Januar findet unsere Glygge-Oobe statt. E Highlight wo sich e jedes Glyggemitglied dick im Kaländer ydrait, wills e Aaloss isch, wo Gross und Glai uf sini Koschte kunnt.
Es isch jewils e kunterbunte Oobe mit divärse Uffdritt, wo die verschidene Zyschtigszügli und d Knorzi im Vorus dien ystudiere. Es wird drummlet und pfyffe, aber das isch lang nit alles. Au Schnitzelbängg, Guggemusike oder Uffdritt vo ächte Rockstars wie em Bruno Rammstein und sine Ängeli finde im Programm ihre Platz.
Drbi het dr Oobe meischtens au e Motto, däm sich d Glyggemitglider entsprächend mit me Goschdyym oder Accessoires dien apasse. So sin mir zum Bispil scho aimol um d Wält greist, hän e Tournee durch d USA gmacht, sin in Dschungel ydaucht oder hän e verruckti Huetparty gfiirt. Ihr mergget: Dr Kreativität vom Organisator und de Uffdrättende sin keini Gränze gsetzt. Es isch dä Ort, wo d Wettstainlemer*inne ihri Talänt könne präsentiere, ganz egal obs e fasnächtligs isch oder nit. Au kulinarisch kunnt me uf sini Koschte. Drmit e jede gstärkt s Programm ka witer verfolge, gits Burger, Spaghetti oder au Hörnli mit Ghacktem. E stärkig bruchts, denn sone Programm hets nämlig au ganz schön in sich, wenn me zum Bispil bimene Line-Dance-Workshop sini Tanz-Künscht unter Bewis stelle muess. Aber kei Angscht bi uns isch alles freiwillig.Während die eine s Rampeliecht gniesse, dien die andere ganz gmietlig d Darbietige vo usse betrachte.
Und s Highlight vom Programm kunnt denn jewils zum Schluss, nämlig denn, wenn die ganz Glygge uf dr Bühni stoot und dr Wettstaimarsch zum Beschte git.
Doch au denn isch dr Oobe no lang nonig verbi. Für dr Durscht isch jewils no d Bar offe und me ka gmietlig no zämme plaudere und eins näh, bevor me denn wider gspannt dr Heimwäg adritt und druff wartet, bis dr nägschti Glygge-Oobe wider vor dr Türe stoot.
Melina