dur s Glaibasel mit em Peter Habicht
Zum erschte Summerstamm het uns dr Ruedi zue n-ere Fiehrig vom Peter Habicht yyglade. S isch diismol quer dur s Glaibasel gange. Gstarted hän mer bim Wettstei-Brunne.
Noch däm mer mit de erschte spannende Infos versorgt worde sin, ischs witer gange in Hof vom Waisehuus.
Dört hän mer e Huffe über d Vergangeheit vo dr Karthause, em Waisehuus und ihrne Bewohner dörfe erfahre. Noch eme kurze Stop vor em Räbhuus, hän mer im Hof vom Hattstätterhof Halt gmacht, wo mr under anderem über d Gschicht vo de Basler Katholike ufklärt worde sin. Wyter isch's gange dur d Rhygass mit Stop am Egge bim Huus «Zum rothen Schneck», wo ys dr Peter über d Wohnsituation vo de Glaibasler Arbeiterschicht im 19. Joorhundert unterrichted het. S Reverenzgässli durab zum Obere Rhywäg und füüre zur Mittlere Brugg und scho sin mer bi dr letschte Station vo däre Fiehri aaglangt. Dr Peter het ys dört mit de letschte Infos zur Gschicht vo dr Mittlere Brugg und em Glaibasel unterhalte und drnooch het denn dr Ruedi s Ghaimniss um dr Ort vo dr gmainsame Nahrigsiinahm glüftet. Mit grosse Schritt sin mer zem Restaurant PaSiWo gloffe, wo mr mit heerlige Cordon-Bleu und anderne Spezialitäte versorgt worde sin.
Doodrmit isch dä rund um glungeni Summerstammuftaggt z'Änd gange und so möcht i mi bim Ruedi für s organisiere und finanziere vo däm tolle Oobe bedangge. E wytere grosse Dangg goot an Peter Habicht für die spannend Fiehrig, s isch ys allne immer widr e grossi Freud.