Am zweite Summerstamm het sich e überschaubars Grüppli im Kannefäldpark droffe. Usgrüschtet mit Snacks, Getränk und gmüetliche Sitzglägeheite het me sich in e kompetitvs Pub-Quiz ähnlichs Spiel gstürzt, wo zwei Gruppe gegenenand ahträtte sinn. In verschiedene Kategorie het me si Wüsse zu Film, Geografie, de Wettstai, unnützem Wüsse und no meh chönne unter Bewies stelle, aber au s logische Dänke und s Talänt zum Schätze isch nid z churz cho.
Zwüsche de einzelne Kategorie isch das Ganze mit kurze Spieli, wo chli meh Bewegig gforderet hänn, ufglockeret worde. Die einte hänn sich bi dene altbekannte Pfadi-Spieli pudelwohl gfühlt, für anderi isch es Neuland gsi und die eigeni Komfortzone het no chli müesse usgwitet wärde. Au do sinn unbekannti Talänt zum Vorschin cho und au dr gröschti Bewegigslegastheniker unter uns het e Spielsieg für sini Gruppe chönne userisse.
Alles in Allem isch es e super-glatte Summerstamm gsi – mol öbbis Neus wo zeigt, dass sich Kreativität und Muet, mol öbbis anders uszprobiere, lohnt!
Viele Dank an d Astou und d Sina, wo dä Summerstamm organisiert hänn!
Pascale mit E