Wettstai Mehrkampfmeisterschaft 2022
Uf de Grendelmatte in Rieche wo genau in es paar Wuche d Lichtathletik Schwiizermeisterschaft stattfindet, hend Wettstainlemer dörfe ihres ganze sportliche (oder au unsportliche) Könne unter Bewyys stelle. Unser Trainer de Fabian Benkler het uns zerst zeigt, wie me die verschiidenschte Lichtathletik Diszipline usführt und mit wellere Technik me am schnellste, wytiste oder höchste chunnt. Denoch sind mir drah gsi und hend uns im Hürdelauf, Speerwurf, Diskus werfe, Wytsprung und im Sprint gmässe. Ich glaub ich lig nid falsch, wenni sag, dass me allne es Kränzli cha winde. So sportlich unterwägs hani unseri Wettstainlemer no nie gseh.
Bimene gmietliche Grillplausch sind mir verköstigt worde und hend s Reschtbier vom Riechedorffest gleert. Nachdem unseri Büüch voll gsi sind, hend mir mit unserm Wüsse über d Lichtathletik und gwiifter Taktik könne brilliere. Bi de lustige chline Chellenges het me nämmlig sin Kopf miesse bruche.
Klötzli so schnell wie möglich staple, Jass-Karte Wytwurf, PingPong Wytsprung mit Blossstechnik in Eierschaale oder es Lichtathletik Quizz hend zu de Böschte ghört.
Eh glungene 3. Summerstamm uf de Grendelmatte.
Viele liebe Dank goht an Fabian Benkler und am Lichtathletik Team vo Rieche.
Noemi