70 Joor Wettstai

Hüt vor 70-Joor, am 18. April 1952, isch im Gifthüttli e Glygge gebore, wo uf dr Name „Wettstai-Clique“ tauft worde isch.

Im folgende Byydraag möcht y euch uf e glaini Rais durch acht Joorzäähnt Glyggegschicht mitnäh.

Mir gumpe diräkt ins Joor 1956, wo d Wetttstai s erscht Mol am Drummeli het dörfe mitmache. Als dritti Nummere het me dr „Querpfyffer“ uf dr Kiechli-Byhni zem Beschte gää. Doo unser letschts Drummeli per Zuefall ebefalls im Kiechli stattgfunde het, wänn mr doch die zwei Uftritt, wo genau 70-Joor usenandr liige, bildlich mitenandr verglyyche. 

Wyter goot unseri Rais im Joor 1962, wo an dr Generalversammlig d Wettstai-Knorzi gründet worde sin. An ihrer erschte Fasnacht im 63, sin sy nur am Fasnachtszyschtig gloffe, do sy no zwenig gsyy sin für e Cortège. Au e Ladärne und e Requisit hän no gfählt, wie au e Tambourmajor. Defür het me e tolle Zeedel ka, zem Sujet „S‘ Zitterschuelhuus Rosedal“.

Unser nägschts Highlight isch e Sportligs, mer luege zrugg uf dr erscht Wettstai-Fuessballmatch im Joor 1970. In dr Yladig hets ghaisse „ Au d Clique will go fuessballspiele. Dasch ebbe glych wie schutte, gingge, schupfe, catche, pfätze, drugge, knalle und was alles no unter dä Begriff fallt. Dorum stürze mir ys in kurzi Ringerheesli, in Stülpe und Fuessball-Lybli und kämpfe um dr hochbegährti Sieg als Wettstai-Maischter.“ Gspielt hän d Pfyffer gege d Dambuure. D Verlierer hän e 30L Fass Bier miesse stifte, wo nach em Match gmeinsam im Sääli vom Stadtkäller gleert worde isch.

In de Achtzgerjoor wärfe mr e Bligg uf d Generalversammlig 1982, wo imene speziellere Raame stattgfunde het. Me het sich am Bahnhof SBB droffe und isch drnoo an Flughafe gfaare. Vo doo aa los i dr Chronischt verzelle. „ D Faart uff dr Flughaafe isch no guet verloffe, derno het me nit so gnau gwissd wo’s Check-In isch… Wo das Broblem gleest gsi isch, het me voller Fraid dr Yystiig unter d Fiess gno. Das goot nadyrlig nid so gschwind bi sovyyle Raisedailnäämer. S hän denne doch alli e Sitzblatz gfunde. Dä Vogel isch aber scho lenger an der Sunne gstande. Doo simmer grad an der Jooresrächnig…das isch no guet gange – hejoo, die isch jo vomene Brofi -, aber dä haissi Maderialbricht dodrnääbe het derzue gfiert, ass der Räschte vo dr GV underem schattige Fligel vorussen abghalte worden isch.“

Als nägschts luege mer uns e Sujet aa, wo mir bsunders gfalle hät, wäri damals scho drbyy gsi (immerhin han i s scho knapp in Buuch gschafft). S isch das s Sujet „Uns längts – nid! Mir hänn kai Gäld und au kai Zyt drum simmer mit em Sujet noonig wyt“, vo dr Fasnacht 1996. Me isch komplett wyss, sowool d Ladärne als au s Spiil, am Mändig in Cortège gstartet. Wärend de Hält isch denn flissig gschaft worde. D Ladärne het me gmoolt, sowie au d Larve und dezue sin d Goschdym mit farbige Stoffblätz erwytered worde. Bis am Mittwuchoobe isch denn Stügg für Stügg e wunderbar farbige Zug entstande.

Für d Nullerjoor han i e speziellere Aaloss usegsuecht. Und zwar isch d Wettstai im Joor 2004, ai Wuche vor dr Basler Fasnacht, am Mainzer Karneval drbyy gsi. Vom Mainzer Carnevals Club, kurz MCC, yyglade, isch me für drey Daag uf Mainz graist. Nach eme vielfältige Programm us Umzüüg, Maskeball und Stadtfiehrig an de erschte zwei Dääg, ischs grosse Highlight am Määndig agstande. Me het dörfe in dr Formation vom MCC am Mainzer Rosenmontagumzug dail nää. 12 Vorträbler, 27 Pfyffer, 17 Dambuure, 2 Dambuurmajore und 1 Pauker hän die 7 Kilometer langi Umzugsstrecki absolviert…ohni Halt muess erwähnt sy! Vor dr Wettstai isch d Frauetanzgruppe vom MCC gloffe, wo aafänglich no gmaint het, sy könnte zu de Märsch tanze, was sich denn als nit all zu aifach usegstellt het. Sehr beiidruggend sig au dr Zueschauer-Ufmarsch am Strooserand gsi, öbbe e halbi Million Lüt hän däm Spektakel byygwohnt.

In de 10er Joor luege mer nomol uf e bsunders Sujet. Im 2011 het s Sujet ghaisse „Gly isch’s so wyt 2012 s Aend vo dr Zyt. Zrugg uff d Arche!“. Nit nur die wunderschöne Goschdym hän dä Joorgang zu ebbis bsunderem gmacht, mer hän au zem erschte Mol gmainsam mit de Ammedysli e Sujet usgspiilt. Im 2012 hät jo bekanntligg dr Wältuntergang sotte stattfinde und drum het d Wettstai, als Dierli, aagfiehrt vom Noah, zrugg uf d Arche miesse, em Ammedysliwaage. So isch e herrligge Zug entstande mit ere wahnsinnig schöne Diervielfalt und eme genial baute Waage wo mr jetzt nomol könne gniesse uf de nochfolgende Bilder.

Abschliesse dien mr die Rais mit unserer aigentligg Siebzigschte Fasnacht, wo leider erscht die 68-igscht gsii isch. Und siehe daa, so e Giraff us em 2011 hets bis zem Dambuurmajor gschafft! S isch e herrliggi Fasnacht gsi, bi beschtem Wätter und Luune. Zem Glygg hän mr alli so e scheene Campingstuehl drbyy kaa, so het sich s Fasnachtstryybe wärend de Hält no besser lo gniesse. Mee muess i zu däre Fasnacht glaub nit verzelle, mer hän sy doch alli no beschtens in Errinnerig!