Dr Wegger schällt wie verruggt. S' isch öbbe halb drei am Moorge und d' Fasnächtler hüpfe voller Vorfreud us ihrem Näscht und ziehn ihr Goschdyym aa. Jetzt goots in Richtig Innerstadt zum Abmarschort vo dr Glygge, wo me scho gspannt uf dr Vieri-Schlaag warted. Umso nöcher sich dr Uhrzeiger richtig vieri bewegt, umso meh spürt me d' Spannig und d' Vorfreud vo de duusige Lüt wo sich langsam in dr Innerstadt versammled hän. „Yystoo" rieft dr Dambuurmajor, und schnäll stoot d Glygge in Reih und Glied paraat für dr gross Momänt. S' isch so wyt… d Martinsglogge lüted vier Mol, dr Dambuurmajor schreit „Moorgestraich – vorwärts – MAARSCH!" und s Liecht vo dr Innerstadt erlöscht. Überall hörsch d Kläng vom Moorgestraich, gspielt vo de zahlriiche Glygge. E Meer vo grosse Ladäärne und duusige glaine Kopfladäärnli triibt durch d' Gasse vo dr Basler Innerstadt. S' herrscht e Maagischi stimmig, wie's sy niene anderscht uf däre Wält git.
Wo's denn langsam hell wird goots für vieli Fasnächtler no für e paar Stündli ins Näscht, mir luege jetzt aber no zrugg uf d Aafäng vo de Wettstai am Moorgestraich.
Aagfange het alles im Joor 1953, wo d Wettstai ihri erscht Fasnacht und somit au dr erscht Moorgestraich bestritte het. Vo däm gschichtsträchtige Moorge kaa me no uff zwei Bilder gseh, wie sich d' Wettstai mit ihrne 3 Pfyffer und 10 Dambuure, aagfyyrt vom Niggi als Dambuurmajor, e Wääg durch die dicht Menschemängi baant.
Bsunders erwähnenswärt isch au s Joor 1956. Denn dr viert Moorgestraich vo dr Wettstai-Clique het bi 17 Grad unter Null stattgfunde! Abr Hauptsach kei Rääge;)
In de Glygge-Chronik stoot unter däm Bild vom Moorgestraich 1956 gschryybe „6 Drummler und e Alti Tachättere miehn iber d' Schnee- + Ysbärge glättere".